ប្រភពព័ត៌មានទាន់ហេតុការណ៍ក្រុងភ្នំពេញ

ប្រជាពលរដ្ឋនៅខណ្ឌទួលគោកបាន លើកឡើងជាសំណើរនិងសំណូមពរជាច្រើន ដើម្បីជម្រុញអោយអាជ្ញាធររាជធានីជួយដោះស្រាយ ក្នុងវេទិកាសាធារណៈ

5

ភ្នំពេញ៖ ប្រជាពលរដ្ឋនៅខណ្ឌទួលគោកបានលើកឡើងជាច្រើនបញ្ហា ដោយជម្រុញអោយអាជ្ញាធររាជធានីជួយដោះស្រាយ ក្នុងនោះមានទាំងបញ្ហាកកស្ទះសំរាម  គ្មានចំណតសាធារណៈ ការកែលម្អ ជួសជុលជង្ហុកសំបុកមាន់ រួមទំាងការស្តារប្រព័ន្ធ ប្រឡាយលូជាដើម ដើម្បីជួយសម្រួលការលំបាករបស់ពួកគាត់និងលើកកម្ពស់សោភ័ណភាពទីក្រុងឲ្យកាន់តែស្រស់ស្អាតបន្ថែមទៀត។

    ការជម្រុញនិងលើកឡើងបែបនេះរបស់បងប្អូនប្រជាពលរដ្ឋបានធ្វើឡើង កាលពីព្រឹកថ្ងៃទី១០ ខែតុលានេះ ក្នុងវេទិកាផ្សព្វផ្សាយនិងពិគ្រោះយោបល់របស់ក្រុមប្រឹក្សារាជធានីភ្នំពេញ អាណត្តិទី៣ នៅសាលបហោស្របចេនឡាខណ្ឌទួកគោក។

     បញ្ហាប្រឈមដែលប្រជាពលរដ្ឋបានលើក ដើម្បីអោយអាជ្ញាធររាជធានី ខណ្ឌនិងមន្ទីរជំនាញដោះស្រាយ ក្នុងវេទិកានេះមានដូចជា ការប្រមូលសំរាមមិនទាន់បានល្អរបស់ក្រុមហ៊ុនស៊ិនទ្រី បណ្តាញផ្លូវនៅភូមិមួយចំនួនក្នុង សង្កាត់បឹងសាឡាង និងតំបន់បឹងកក់សំបូរទៅដោយជង្ហុកសំបុកមាន់ ដែលទាមទារអោយ អាជ្ញាធរចាត់វិធានការជួសជុលកែលម្អជាបន្ទាន់ ដើម្បីងាយស្រួលសល់ការធ្វើដំណើររបស់ប្រជា ពលរដ្ឋ។ បន្ថែមពីនេះទៀតក្រុមប្រជាពលរដ្ឋក៏បានឡើងពីបញ្ហាការចតយានយន្តគ្មានសណ្តាប់ ធ្នាប់ដែលរំដល់ការធ្វើដំណើរ ហើយសម្រាប់បណ្តាញលូសាធារណៈមួយចំនួនបានខូចឬស្ទះ ដែលធ្វើឲ្យទឹកភ្លៀងហូរពុំបានលឿនប្រឈមដល់ការជន់លិចជាដើម។

លោកឯក ឃុនឌឿន អភិបាលខណ្ឌទួលគោកបានអៈអាងថា រាល់សំណើនិងសំណូមពរ ដែលប្រជាពលរដ្ឋបានលើកឡើងទំាងអស់នេះ អាជ្ញាធរនិងធ្វើការដោះស្រាយទៅតាមជំនាញ។ ជាក់ស្តែងការជួសជុលផ្លូវ ជង្ហុកសំបុកមាន់ និងការដាក់លូបន្ថែម នឹងត្រូវធ្វើឡើងនៅដើមឆ្នាំ ក្រោយនេះ។

លោកបញ្ជាក់ថា សម្រាប់បញ្ហាចតយានយន្តគ្មានសណ្តាប់ធ្នាប់នៅតាមដងផ្លូវក្នុង ភូមិសាស្រ្តនៃខណ្ឌទួលគោក គឺចាប់ពីពេលនេះទៅកម្លាំងសមត្ថកិច្ចនឹងប្រើខ្នោះចាក់រថយន្តទំាង នោះនៅនឹងកន្លែងឬអួសទៅអធិការនគរបាលខណ្ឌដើម្បីដោះស្រាយតាមវិធានការច្បាប់។ បន្ថែមពីនេះទៀតលោកអភិបាលខណ្ឌបានបញ្ជាក់ថា ក្រុមការងារខណ្ឌនឹងបន្តពិភាក្សាជាមួយ ក្រុមហ៊ុនស៊ិនទ្រី ដើម្បីធ្វើយ៉ាងណាឲ្យក្រុមហ៊ុននេះផ្តល់សេវាប្រមូលសំរាមនៅតាមមូលដ្ឋានឲ្យ បានល្អ ដើម្បីកាត់បន្ថយកុំឲ្យមានគំនរសំរាមនៅតាមដងផ្លូវដែលនាំឲ្យប៉ៈពាល់ដល់បរិស្ថាន និង សោភ័ណភាពទីក្រុង។

លោកប៉ា សុជាតិវង្ស ប្រធានក្រុមប្រឹក្សារាជធានីភ្នំពេញបានមានប្រសាសន៍ថា ការបើកវេទិកា និងពិគ្រោះយោបល់រវាងអាជ្ញាធរ និងប្រជាពលរដ្ឋនេះ គឺមានសារៈសំខាន់ណាស់ ដើម្បីផ្តល់ឱកាសជូនប្រជាពលរដ្ឋបានប្រាស្រ័យទាក់ទងគ្នាទៅវិញទៅមករវាងរដ្ឋបាល រាជធានីភ្នំពេញ ជាមួយរដ្ឋបាលខណ្ឌ រដ្ឋបាលសង្កាត់ ប្រជាពលរដ្ឋ តំណាងសង្គមស៊ីវិល និងវិស័យឯកជន ដើម្បីផ្លាស់ប្តូរមតិយោបល់ក្នុងការអភិវឌ្ឍទីក្រុងប្រកបដោយ ចីរភាព តម្លាភាព និងប្រសិទ្ធភាព។

     សូមបញ្ជាក់ថា កាលពីឆ្នាំ២០១៨កន្លងទៅនេះ ក្រុមប្រឹក្សារាជធានីបានទទួលសំនួរ សំណើ និងសំណូមពររបស់ប្រជាពលរដ្ឋនៅក្នុងខណ្ឌទួលគោក មានរហូតដល់១០៦បញ្ហា ក្នុងនោះ បានដោះស្រាយរួចរាល់ជូនប្រជាពលរដ្ឋបានចំនួន៨៤បញ្ហា បានសិក្សាដាក់បញ្ជូលក្នុងកម្មវិធីវិនិ យោគ៣ឆ្នាំរំកិលមានចំនួន២១បញ្ហា និងមិនទាន់ដោះស្រាយមានចំនួន១បញ្ហា៕

 

អត្ថបទដែលជាប់ទាក់ទង