មនុស្សជាង៦០នាក់ ស្លាប់ និងរបួសជាច្រើននាក់ ក្នុងការបំផ្ទុះគ្រាប់បែកនៅព្រះវិហារអាហ្គានីស្ថាន
មនុស្សចំនួន ៦២នាក់បានស្លាប់ និងជាច្រើននាក់ទៀតរងរបួស ក្នុងអំឡុងការវាយប្រហារដោយបំផ្ទុះគ្រាប់បែកកាលពីថ្ងៃសុក្រម្សិលមិញនេះ ខណៈដែលអ្នកកាន់សាសនាកំពុងប្រមូលផ្តុំគ្នាបួងសួង នៅក្នុងព្រះវិហារ ស្ថិតក្នុងប្រទេសអាហ្គានីស្ថាន។
ការវាយប្រហារកើតឡើងនៅក្នុងខេត្ត Nangarhar ភាគខាងកើតប្រទេស។
រហូតមកដល់ពេលនេះ មិនទាន់មានក្រុមណាមួយចេញមុខអះអាងពីការវាយប្រហាររបស់ពួកគេឡើយ។
ការវាយប្រហារដ៏កក្រើកនេះកើតឡើងតែមួយថ្ងៃប៉ុណ្ណោះ ក្រោយពេលអង្គការសហប្រជាជាតិបាននិយាយថា ចំនួនជនស៊ីវិលស្លាប់នៅក្នុងប្រទេសញាំញីដោយសង្រ្គាមកើនឡើងយ៉ាងខ្លាំងមិនធ្លាប់មានពីមុនមក។
បើតាមរបាយការណ៍របស់អង្គការសហប្រជាជាតិ ជនស៊ីវិលចំនួន ១.១៧៤នាក់ ត្រូវបានសម្លាប់ នៅក្នុងចន្លោះខែកក្កដា និងកញ្ញា។
លោក Attaullah Khogyani អ្នកនាំពាក្យរបស់អភិបាលខេត្តខាងលើ បានថ្លែងប្រាប់ BBC ថា មនុស្សយ៉ាងតិច ៦២នាក់បានស្លាប់ និង ៣៦នាក់បានរងរបួស នៅក្នុងការវាយប្រហារលើអ្នកបួងសួង។
អ្នកឃើញហេតុការណ៍បាននិយាយថា ពួកគេបានឮសំឡេងផ្ទុះលាន់កក្រើក មុនពេលដំបូលព្រះវិហារបាក់ស្រុត។ គ្រឿងផ្ទុះជាច្រើនត្រូវបានគេជឿជាក់ថា បានប្រើប្រាស់ក្នុងការវាយប្រហារនោះ៕
