ដាក់វិធានការទប់ស្កាត់ ទឹកកខ្វក់ស្អុយ កុំឲ្យហូរចូលមកសមុទ្រ
ព្រះសីហនុ៖ ខេត្តព្រះសីហនុ ក៏ត្រូវប្រឈមនឹងបញ្ហាទឹកកខ្វក់ស្អុយផងដែរ គឺត្រូវតែមានវិធានការទប់ស្កាត់ កុំឲ្យហូរចូលមកសមុទ្រ។ សម្តេចតេជោនាយករដ្ឋមន្រ្តី បានណែនាំឲ្យប្រើប្រាស់ថវិកាប្រមាណ ១៧០ លានដុល្លារបន្ថែមទៀត សម្រាប់គម្រោងទឹកស្អាត ដែលប្រទេសចិនជាមិត្តបានជួយជាជំនួយឥតសំណងលើទឹកប្រាក់សរុបប្រមាណ ៦០០ លានដុល្លារអាមេរិក។
នៅព្រឹកថ្ងៃសៅរ៍ ទី១៦ ខែវិច្ឆិកា ឆ្នាំ២០១៩នេះ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអញ្ជើញជាអធិបតីដ៏ខ្ពង់ខ្ពស់ នៅក្នុងពិធីបើកការដ្ឋានសាងសង់ផ្លូវចំនួន ៣៤ ខ្សែ នៅក្នុងក្រុងព្រះសីហនុ ខេត្តព្រះសីហនុ។
សម្តេចតេជោ ហ៊ុន សែន បានថ្លែងអំណរគុណ ដល់បងប្អូនប្រជាពលរដ្ឋខេត្តព្រះសីហនុ ដែលបានចូលរួមគាំទ្រគម្រោងសាងសង់ផ្លូវក្នុងក្រុងចំនួន ៣៤ ខ្សែ លើទឹកប្រាក់ប្រមាណ ២៩៤ លានដុល្លារ ដែលត្រូវសាងសង់ឲ្យហើយនៅក្នុងរយៈពេលតែជាង ៨ខែ គិតចាប់ពីថ្ងៃបើការដ្ឋានសាងសង់នៅថ្ងៃទី ១៦ ខែ វិច្ឆិកា ឆ្នាំ ២០១៩ នេះ។
សម្តេចតេជោ បានថ្លែងថា ខេត្តព្រះសីហនុគឺជាខេត្តដែលមានសក្តានុពលបំផុតមួយ ដែលក្នុងឆ្នាំ ២០១៩ នេះ គឺបានទាក់ទាញភ្ញៀវទេសចរណ៍ប្រមាណ ១លាន ៩សែននាក់ ដែលក្នុងនោះគឺមានទេសចរជាតិប្រមាណ ១លាន២សែន នាក់ និងទេសចរបរទេសប្រមាណ ៧៣ម៉ឺននាក់ ចំនួននេះគឺមានការកើនឡើងប្រមាណ ១០,៦២%។ ទន្ទឹមនឹងនេះដែរ ខេត្តព្រះសីហនុក៏ត្រូវប្រឈម នឹងបញ្ហាទឹកកខ្វក់ស្អុយផងដែរ គឺត្រូវតែមានវិធានការទប់ស្កាត់កុំឲ្យហូរចូលមកសមុទ្រ។ សម្តេចតេជោនាយករដ្ឋមន្រ្តី បានណែនាំឲ្យប្រើប្រាស់ថវិកាប្រមាណ ១៧០ លានដុល្លារបន្ថែមទៀត សម្រាប់គម្រោងទឹកស្អាត ដែលប្រទេសចិនជាមិត្តបានជួយជាជំនួយឥតសំណងលើទឹកប្រាក់សរុបប្រមាណ ៦០០ លានដុល្លារអាមេរិក។
សម្តេចតេជោ បានបញ្ជាក់បន្ថែមថា មិនថាតែក្រុងព្រះសីហនុទេ គឺសូមបងប្អូនប្រជាពលរដ្ឋនៅទូទាំងប្រទេស នាំគ្នាថែរក្សាសម្អាតសំរាមឲ្យបានស្អាតល្អ ជាពិសេសនៅតាមសមុទ្រ កុំបោះសំរាមចោលពាសវាលពាសកាល ជាពិសេសថង់ប្លាស្ទិក ដែលធ្វើឲ្យប៉ះពាល់ដល់បរិស្ថានយ៉ាងធ្ងន់ធ្ងរ។ ដើម្បីសោភ័ណភាព ខេត្ត ក្រុង និងមុខមាត់ ប្រទេសជាតិយើង គឺយើងទាំងអស់គ្នាត្រូវចូលរួមសម្អាតអនាម័យឲ្យបានគ្រប់ៗគ្នានៅទូទាំងប្រទេស៕
