ទីក្រុងប៉េកាំង អំពាវនាវឱ្យទីក្រុងវ៉ាស៊ីនតោន បញ្ឈប់“ ការបញ្ចេញសាច់ដុំ” នៅសមុទ្រចិនខាងត្បូង
កាលពីដើមខែវិច្ឆិកា នាវាចម្បាំងមីស៊ីល ដឹកនាំដោយសហរដ្ឋអាមេរិក បានបើកតាមច្រកសមុទ្រតៃវ៉ាន់ រវាងចិន និងកោះតៃវ៉ាន់ ដោយការឆ្លងកាត់នេះជាលើកទី ៩ ធ្វើដោយកងនាវាចរអាមេរិកនៅឆ្នាំនេះ។
នៅក្នុងកិច្ចពិភាក្សាការពារជាតិ កាលពីថ្ងៃចន្ទ នៅទីក្រុងបាងកក រដ្ឋមន្ត្រីការពារជាតិចិន លោក Wei Fenghe បានទទូចដល់រដ្ឋមន្រ្តីក្រសួងការពារជាតិអាមេរិក លោក Mark Esper ឲ្យ បញ្ឈប់ការបញ្ចេញសាច់ដុំរបស់ខ្លួន នៅក្នុងសមុទ្រចិនខាងត្បូង និងចៀសវាងបន្ថែម“ ភាពមិនប្រាកដប្រជាថ្មីៗ” លើកោះតៃវ៉ាន់ ដោយសង្កត់ធ្ងន់លើភាពតានតឹង រវាងប្រទេសមហាអំណាចទាំងពីរ លើពិភពលោក។ ទីភ្នាក់ងាររ៉យទ័រ បានរាយការណ៍។
យោងតាមអ្នកនាំពាក្យក្រសួងការពារជាតិចិន លោក Wu Qian រដ្ឋមន្ត្រីបានអំពាវនាវ ដល់សមភាគីអាមេរិក របស់លោក ឱ្យបញ្ឈប់ការបញ្ចេញសាច់ដុំ នៅសមុទ្រចិនខាងត្បូង និងកុំបង្កនិងបង្កើនភាពតានតឹង នៅសមុទ្រចិនខាងត្បូង។
រហូតមកដល់ពេលនេះ មិនទាន់មានការឆ្លើយតបណាមួយ ពីសហរដ្ឋអាមេរិកនៅឡើយទេ ទោះបីជាពួកគេ បានស្តីបន្ទោសទីក្រុងប៉េកាំង ចំពោះការធ្វើយោធា នៅសមុទ្រចិនខាងត្បូងក៏ដោយ។
នៅថ្ងៃអាទិត្យនេះលោក Mark Esper បានថ្លែងថា មហាអំណាចអាស៊ីខាងកើត កំពុងបង្កើនការបង្ខិតបង្ខំ និងការបំភិតបំភ័យ ដើម្បីជំរុញគោលដៅយុទ្ធសាស្ត្ររបស់ខ្លួន នៅក្នុងតំបន់។
សហរដ្ឋអាមេរិក ក៏បានចោទប្រកាន់ប្រទេសចិនថា បានពង្រីកវិសាលភាពយោធារបស់ខ្លួន នៅក្នុងតំបន់រួមទាំង តាមរយៈការដំឡើងយោធា នៅលើកោះសិប្បនិម្មិត។ ចិនទទូចថាការដំឡើងរបស់វានៅសមុទ្រចិនខាងត្បូង បម្រើគោលបំណងការពារ ហើយកំពុងត្រូវបានប្រើជាចម្បង សម្រាប់ការស្រាវជ្រាវវិទ្យាសាស្ត្រ និងកម្មវិធីសុវត្ថិភាពដែនសមុទ្រ៕