បុគ្គលិកសន្តិសុខអ៊ីរ៉ង់បីនាក់ ត្រូវបានសម្លាប់ ក្នុងពេលតវ៉ាប្រឆាំងនឹងការឡើងថ្លៃប្រេងសាំង
សារព័ត៌មាន Sputnik បានផ្សាយនៅថ្ងៃទី១៩វិច្ឆិកានេះថា ទីភ្នាក់ងារសារព័ត៌មាន ISNA របស់អ៊ីរ៉ង់ បានរាយការណ៍នៅថ្ងៃអង្គារនេះថា សមាជិកសន្តិសុខ ៣ នាក់ របស់អ៊ីរ៉ង់ ត្រូវបានសម្លាប់ក្នុងអំឡុងពេល មានភាពចលាចលនៅក្នុងទីក្រុងតេអេរ៉ង់ ដែលជាផ្នែកមួយ នៃការតវ៉ាដ៏ធំប្រឆាំងនឹងការឡើងថ្លៃប្រេងសាំង នៅទូទាំងប្រទេស។
ក្នុងចំណោមអ្នកដែលត្រូវបានសម្លាប់ មានសមាជិកម្នាក់ នៃកងឆ្មាំបដិវត្តអ៊ីស្លាម ខណៈដែលពីរនាក់ទៀត ជាសមាជិកនៃកងជីវពល Basij ដែលត្រូវបានគេដាក់ពង្រាយ ទៅកាន់ទីក្រុងផងដែរ ដើម្បីធានាសន្តិសុខនៅពេលមានការតវ៉ា។
កាលពីថ្ងៃចន្ទ អ្នកនាំពាក្យរដ្ឋាភិបាលលោក Ali Rabiei បាននិយាយថា មន្រ្តីអនុវត្តច្បាប់ជាច្រើន ត្រូវបានសម្លាប់ក្នុងអំឡុងពេល នៃការប្រមូលផ្តុំនៅអ៊ីរ៉ង់។
ប្រជាជនចូលរួមបាតុកម្ម ដែលរៀបចំឡើងដោយក្រុមប្រឹក្សាជាតិតស៊ូ ប្រឆាំងអ៊ីរ៉ង់ នៅប្រទេសអាល្លឺម៉ង់ ដើម្បីគាំទ្របាតុកម្មទូទាំងប្រទេសនៅអ៊ីរ៉ង់ ប្រឆាំងនឹងការឡើងថ្លៃសាំង នៅទីក្រុងប៊ែកឡាំង ប្រទេសអាឡឺម៉ង់ ថ្ងៃទី ១៧ ខែវិច្ឆិកាឆ្នាំ ២០១៩ ។
កាលពីសប្តាហ៍មុន រដ្ឋាភិបាលអ៊ីរ៉ង់ បានប្រកាសដំឡើងថ្លៃសាំង ដែលបង្កឱ្យមានការតវ៉ាទ្រង់ទ្រាយធំ។
អាជ្ញាធរអ៊ីរ៉ង់ បាននិយាយថា ពួកគេបានចាប់ខ្លួនមនុស្សប្រហែល ១.០០០ នាក់ ពីបទកុបកម្មនិងសកម្មភាពបំផ្លិចបំផ្លាញ ក្នុងរយៈពេលជាច្រើនថ្ងៃកន្លងមកហើយ ។ របាយការណ៍ប្រព័ន្ធផ្សព្វផ្សាយ បានបង្ហាញថា ចំនួនអ្នកតវ៉ាសរុបមានលើសពី ៨៧.០០០ នាក់៕