អគាររបស់រាជបណ្ឌិតសភាកម្ពុជា សម្រាប់បម្រើការងារ និងជាកន្លែងប្រមូលធនធានមនុស្ស ដើម្បីរួមគ្នាសិក្សាស្រាវជ្រាវកិច្ចការផ្សេងៗ
ភ្នំពេញ៖ សម្តេចតេជោនាយករដ្ឋមន្ត្រី បានមានប្រសាសន៍ជំរុញដល់អ្នកស្រាវទាំងអស់ ត្រូវខិតខំស្រាវជ្រាវទាំងលក្ខណៈវិទ្យាសាស្ត្រ និងសង្គមសាស្រ្ត ដោយបើកទូលាយឲ្យមានកម្រិតស្រាវជ្រាវ ទាំងក្នុងប្រទេសជាតិ និងអន្តរជាតិផងដែរ ដើម្បីឲ្យយើងបានដឹងពីសភាពការណ៍ខាងក្រៅផង មិនត្រូវគិតសិក្សាស្រាវជ្រាវតែក្នុងប្រទេសមួយមុខប៉ុណ្ណោះ។
នៅព្រឹកថ្ងៃ ព្រហស្បតិ៍ ទី២១ ខែវិច្ឆិកា ឆ្នាំ២០១៩នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអញ្ជើញជាអធិបតីដ៏ខ្ពង់ខ្ពស់ សម្ពោធ អគារឥន្ទ្រទេវី របស់រាជបណ្ឌិត្យសភាកម្ពុជា រួមទាំងអបអរសាទរខួប២០ឆ្នាំ នៃការបង្កើតរាជ្យបណ្ឌិត្យសភាកម្ពុជា និងការប្រគល់សញ្ញាបត្រ។
លោក បណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា បានថ្លែងថា អគារនេះមានកម្ពស់បីជាន់ ស្មើនឹង១៨ម៉ែត្រ មានបណ្ដោយប្រវែង៤០ម៉ែត្រ ទទឹង១៧ម៉ែត្រ។ អគារឥន្ទ្រទេវី ជាសមិទ្ធផលថ្មីមួយសម្រាប់រាជបណ្ឌិត្យសភាកម្ពុជា ដែលជាកន្លែងប្រមូលផ្តុំដោយធនធានបញ្ញា សម្រាប់បម្រើការងារជាឧត្តមប្រយោជន៍ដល់សង្គមជាតិ។ អគារនេះគឺជាកន្លែងបណ្តុះបណ្តាលនិស្សិតថ្នាក់បរិញ្ញាបត្រជាន់ខ្ពស់ (អនុបណ្ឌិត) លើគ្រប់មុខជំនាញ, ជាមជ្ឈមណ្ឌលបកប្រែភាសាបរទេស និង ជាកន្លែងស្រាវជ្រាវ ប្រមូលផ្តុំបញ្ញវន្ត តាមរយៈការរៀបចំសិក្ខាសាលា សន្និសីទ និង កម្មវិធីតុមូលផ្សេងៗ សម្រាប់បញ្ញវន្តធ្វើការវិភាគអំពីបញ្ហាសង្គម នយោបាយ សេដ្ឋកិច្ច បច្ចេកវិទ្យាទំនើបៗរបស់ពិភពលោកថ្មីៗ និងជាទីបម្រើដល់បញ្ញវន្តទាំងខាងផ្នែកវិទ្យាសាស្រ្តពិតនិងវិទ្យាសាស្រ្តសង្គម ដើម្បីឱ្យបញ្ញវន្តទាំងឡាយបានបង្ហាញស្នាដៃរបស់ខ្លួន សម្រាប់ការរួមចំណែកក្នុងការអភិវឌ្ឍសង្គមជាតិ។
អគារឥន្ទ្រទេវី មានគោលបំណងនៃការសាងសង់អគារនេះឡើង គឺដើម្បីបំពេញតម្រូវការនៃការរីកចម្រើនរបស់រាជបណ្ឌិត្យសភាកម្ពុជា លើបីចំណុច សំខាន់៖ ទី១. ជាកន្លែងបណ្តុះបណ្តាលនិស្សិតថ្នាក់បរិញ្ញាបត្រជាន់ខ្ពស់ និងថ្នាក់បណ្ឌិតផ្នែកភាសាចិន, ទី២. ជាមជ្ឈមណ្ឌលបកប្រែភាសាបរទេស (ជាទិសដៅនាពេលអនាគត) រាជបណ្ឌិត្យសភាកម្ពុជាមានបំណងប្រមូលផ្តុំអ្នកមានចំណេះដឹងខាងភាសាផ្សេងៗ ហើយសុំសិទ្ធិធ្វើការបកប្រែនូវរាល់ស្នាដៃ ឬផលិតផលដែលមានតម្លៃសម្រាប់ជាតិមកជាខេមរភាសា) និងទី៣. ជាកន្លែងស្រាវជ្រាវ ប្រមូលផ្តុំបញ្ញវន្ត សិក្ខាសាលា ហើយជាទិសដៅចំពោះមុខ អគារនេះក៏អាចបង្កើតជាតុមូលសម្រាប់បញ្ញវន្តធ្វើការវិភាគពីបញ្ហាសង្គម នយោបាយ សេដ្ឋកិច្ច បច្ចេកវិទ្យាទំនើបៗរបស់ពិភពលោកថ្មីៗនេះផងដែរ។
សម្តេចតេជោ បានមានប្រសាន៍ ដោយក្តីមោទនភាពចំពោះវឌ្ឍភាព និងបានអបអរសាទរ ចំពោះសមិទ្ធផលថ្មីនៃអគាររបស់រាជបណ្ឌិតសភាកម្ពុជា សម្រាប់បម្រើការងារ និងជាកន្លែងប្រមូលធនធានមនុស្ស ដើម្បីរួមគ្នាសិក្សាស្រាវជ្រាវកិច្ចការផ្សេងៗ ក្នុងសង្គមជាតិ។
ដើម្បីបានដឹងជាប្រវត្តិខ្លះៗអំពីទីតាំងនេះ សម្តេចតេជោនាយករដ្ឋមន្រ្តី បានមានប្រសាសន៍បា្រប់ថា កន្លែងរាជបណ្ឌិត្យសភាកម្ពុជានេះ ពីមុនជាអចនទ្រព្យរបស់ គណបក្សប្រជាជនកម្ពុជា (សាលានយោបាយ) ដែលគិតរហូតមកដល់ពេលនេះ គឺមានអាយុកាលប្រមាណជា៣០ឆ្នាំទៅហើយ ហើយពីមុនកន្លែងនេះ គឺស្ថិតនៅក្នុងទឹកដីនៃខេត្តកណ្តាលទេ តែក្រោយមកក៏ត្រូវបានកាត់ចូលក្រុងភ្នំពេញ។
ទាក់ទងទៅនឹងស្ថាប័នស្រាវជ្រាវនេះ សម្តេចតេជោមានមានប្រសាសន៍ថា នៅឆ្នាំ១៩៩៧ រាជរដ្ឋាភិបាលក៏បានបង្កើតក្រុមស្រាវជ្រាវមួយទៀត ដែលមានឈ្នោះថា CAP ដែលក្រុមនេះមានតួនាទីស្រាវជ្រាវផ្នែកចារកិច្ច, ក្នុងនោះយើងក៏មានក្រុមស្រាវជ្រាវរបស់ក្រសួងការបទេស និងមួយទៀតជាក្រុមស្រាវជ្រាវ នៃគណៈកម្មការគោលនយោបាយសេដ្ឋកិច្ចជាតិផងដែរ។
សម្តេចតេជោនាយករដ្ឋមន្ត្រី បានមានប្រសាសន៍ អំពីកិច្ចការដែលយើងត្រូវសិក្សាស្រាវជ្រាវ គឺជារឿងអ្វីដែលជាកិច្ចការបន្ទាន់ និងមានភាពចាំចាច់សម្រាប់ជាប្រយោជន៍សង្គម។ ទន្ទឹមនឹងនោះ សម្តេចតេជោ ហ៊ុន សែន បានចែករំលែកអំពីការស្រាវជ្រាវផ្ទាល់របស់ សម្តេចមុននឹងដាក់នឹងចេញនូវនយោបាយ ឈ្នះ-ឈ្នះ ដើម្បីបញ្ចប់សង្រ្គាមស៊ីវិលទាំងស្រុងនៅកម្ពុជា ជាពិសេសបញ្ចប់សកម្មភាពកងទ័ពប៉ុលពត ដើម្បីឲ្យពួកគេបានវិលត្រឡប់ចូលមករួមរស់នៅក្នុងសង្គមជាតិវិញ ដែលក្នុងនោះក្រោយពីបានសិក្សាស្រាវជ្រាវ អំពីព័ត៌មានទាំងឡាយ ដែលសម្តេចតេជោ ទទួលបានរួចហើយ គឺសម្តេចបានដាក់ចេញនូវគោលនយោបាយឈ្នះឈ្នះ ដែលមានបីចំណុចសំខាន់ៗដូចជា ៖ ១) ធានាអាយុជីវិតប្រជាជនមិនឲ្យមានការធ្វើទុក្ខទោសអ្វីឡើយ។ ២) ធានារក្សាការងារតួនាទីមុខតំណែងដែលពួគេមានពីមុន ។ ៣) ធានាការការពារទ្រព្យសម្បត្តិរបស់ពួកគេ មិនឲ្យមានការបាត់បង់ ដែលកម្ពុជាបានធ្វើការបង្រួបបង្រួមជាតិចុងក្រោយ បញ្ចប់សង្រ្គាម ហើយបាននាំមកនូវសុខសន្តិភាព ពេញលេញសម្រាប់ប្រទេសជាតិទាំងមូល មកទល់សព្វថ្ងៃនេះ ដែលមានរយៈពេលជាង ២០ឆ្នាំមកហើយ (១៩៩៨-២០១៩)។
ចំពោះគុណតម្លៃនៃអគារថ្មីនេះ សម្តេចតេជោ ហ៊ុន សែន នាយករដ្ឋមន្ត្រី មានសង្ឃឹមយ៉ាងមុតមាំថា នឹងបានចូលរួមចំណែកបម្រើវិស័យអប់រំ និងការសិក្សាស្រាវដ៏សំខាន់សម្រាប់សង្គមជាតិយើង។ សម្តេចតេជោ ក៏បានថ្លែងអំណរគុណ ចំពោះក្រុមការងាររាជបណ្ឌិត្យសភាកម្ពុជា ដែលបានចូលរួមចំណែកក្នុងការសិក្សាស្រាវជ្រាវ និងចូលរួមអភិវឌ្ឍន៍ប្រទេសកម្ពុជា៕
