ពួកអស់លោកមិនអាចដឹកនាំកុំថាឡើយដឹកនាំប្រទេស សូម្បីតែដឹកនាំកូនបក្សមួយ ឬភូមិមួយក៏មិនបានផង ព្រោះតែអស់លោកគ្មានគុណធម៌ និងសីលធម៌
(ភ្នំពេញ)៖ ស្របពេលដែលម្តាយក្មេកសម្តេចតេជោ ហ៊ុន សែន កំពុងមានជំងឺធ្ងន់ហើយសង្រ្គោះបន្ទាន់នៅមន្ទីរពេទ្យកាលម៉ែតនោះ សម្តេចតេជោបានប្រតិកម្មតាមរយៈខមមិននៅលើហ្វេកប៊ុកទៅក្រុមប្រឆាំងថា ពួកអស់លោកមិនអាចដឹកនាំប្រទេស ឬកូនបក្សមួយបានទេ ព្រោះតែអស់លោកគ្មានគុណធម៌និងសីលធម៌។ បើសូម្បីតែម្តាយខ្លួនឯង អស់លោកមិនស្រឡាញ់ និងយកចិត្តទុកដាក់ផងនោះ តើអស់លោកអាចស្រឡាញ់ និងយកចិត្តទុកដាក់ដល់ប្រជាជនយ៉ាងណាទៅ។
សាររបស់សម្តេចតេជោ ហ៊ុន សែន បានធ្វើឡើងបន្ទាប់ពីសកម្មជនម្នាក់របស់ក្រុមប្រឆាំងឈ្មោះ Sovannara Som បានបង្ហោះសារវាយប្រហារ និងប្រមាថដល់សម្តេចតេជោ តាមរយៈនៅក្នុងរឿងដែលសម្តេចបានបង្ហោះ និងបង្ហាញរូបភាពអំពីស្ថានភាពជំងឺម្តាយក្មេករបស់សម្តេចនាព្រឹកថ្ងៃទី២៥ ខែវិច្ឆិកា ឆ្នាំ២០១៩នេះ។
សម្តេចតេជោ ហ៊ុន សែន បានប្រតិកម្មនឹងក្រុមប្រឆាំងយ៉ាងជាមួយខ្លឹមសារថា៖ “បងប្អូនជនរួមជាតិមើលចរិតពួកជ្រុលនិយម ដែលបានលើកឡើងខាងលើ។ ខ្ញុំចង់ប្រាប់លោកថា ពួកអស់លោកមិនអាចដឹកនាំកុំថាឡើយដឹកនាំប្រទេស សូម្បីតែដឹកនាំកូនបក្សមួយ ឬភូមិមួយក៏មិនបានផង ព្រោះតែអស់លោកគ្មានគុណធម៌ និងសីលធម៌”។
សូមដាក់ចេញជាសំនួរថា៖ “បើអស់លោកមិនគិតដល់ម្តាយរបស់ខ្លួនទៅហើយ តើអស់លោកអាចស្រឡាញ់ និងយកចិត្តទុកដាក់ដល់ប្រជាជនយ៉ាងណាទៅ បើសូម្បីតែម្តាយខ្លួនឯង អស់លោកមិនស្រឡាញ់និងយកចិត្តទុកដាក់ផងនោះ។ ម្យ៉ាងទៀតពេលនេះខ្ញុំកំពុងមានទុក្ខ ពួកលោកចូលមករករឿងខ្ញុំ ដូចនេះអ្វីដែលខ្ញុំបានចាប់ពួកលោកញាត់គុក ពេលដែលពួកលោកប្រព្រឹត្តខុសច្បាប់ គឺសមហេតុផលណាស់។ ដោយសារតែចរិតទាំងមេទាំងកូនបែបនេះហើយ ទើបនាំដល់ការរលាយបក្ស និងជាប់គុក ព្រោះគ្មានស្មារតីបង្រួមជាតិនិងគិតតែរឿងបំផ្លាញជាតិ”។
សូមជំរាបថា នៅព្រឹកថ្ងៃទី២៥ ខែវិច្ឆិកា ឆ្នាំ២០១៩នេះ សម្តេចតេជោ ហ៊ុន សែន បានបង្ហោះសារ និងបង្ហាញរូបភាព ដើម្បីបង្ហាញជូនជនរួមជាតិ អំពីស្ថានភាពជំងឺម្តាយក្មេករបស់សម្តេច ដែលកំពុងស្ថិតក្នុងដំណាក់ការសង្រ្គោះបន្ទាន់នៅឡើយ តម្រូវឱ្យកូនចៅនៅក្បែរជានិច្ច៕
