រដ្ឋមន្រ្តីការបរទេសកម្ពុជា កូរ៉េ បានចុះហត្ថលេខា លើឯកសារចំនួនពីរ
កូរ៉េ៖ ក្រសួងការបរទេសកម្ពុជា បានប្រកាសព័ត៌មានា នៅរសៀលថ្ងៃទី២៥ ខែវិច្ឆិកា ឆ្នាំ២០១៩ លោកឧបនាយករដ្ឋមន្ត្រី ប្រាក់ សុខុន បានជួបពិភាក្សាទ្វេភាគីជាមួយលោកស្រី កាង ឃ្យុង-វ៉ា (Kang Kyung-wha) រដ្ឋមន្រ្តីការបរទេសនៃសាធារណរដ្ឋកូរ៉េ។ នៅចុងបញ្ចប់នៃជំនួប រដ្ឋមន្រ្តីការបរទេសទាំងពីរបាន ចុះហត្ថលេខាលើឯកសារចំនួនពីរ។
លោក ឡុង ឌីម៉ង់ ឯកអគ្គរដ្ឋទូតកម្ពុជាប្រចាំសាធារណរដ្ឋកូរ៉េ ដែលអមលោកឧបនាយករដ្ឋមន្ត្រី ប្រាក់ សុខុន ចូលរួមជំនួបពិភាក្សានេះ បានឱ្យថា លោកឧបនាយករដ្ឋមន្ត្រី បានថ្លែងអំណរគុណដល់សាធារណរដ្ឋកូរ៉េ ដែលបានផ្តល់ការងារជូនពលករខ្មែរ។ លោកឧបនាយករដ្ឋមន្ត្រី បានលើកឡើងថា ពលករខ្មែរដែលបានមកធ្វើការនៅសាធារណរដ្ឋកូរ៉េនេះ មិនត្រឹមតែទទួលបានចំណូលខ្ពស់ សម្រាប់ទ្រទ្រង់ជីវភាពផ្ទាល់ខ្លួន និងគ្រួសារប៉ុណ្ណោះទេ ប៉ុន្តែថែមបានជួយឱ្យពួកគេមានជំនាញខ្ពស់ សម្រាប់ប្រកបរបរនៅពេលត្រឡប់ទៅកម្ពុជាវិញ។
លោក ឡុង ឌីម៉ង់ បានបញ្ជាក់ថា លោកឧបនាយករដ្ឋមន្ត្រី បានស្នើសុំឱ្យមានការបង្កើនកូតាបន្ថែមទៀត។ ការបង្កើនកូតានេះ មិនត្រឹមតែជួយឱ្យពលរដ្ឋកម្ពុជាទទួលបានប្រាក់ឈ្នួលខ្ពស់នោះទេ ប៉ុន្តែបានទាំងជំនាញថែមទៀត។
លោកឯកអគ្គរាជទូត បានបន្ថែមថា លោកស្រី កាង ឈៀង-វ៉ា មិនទាន់មានការឆ្លើយតបបែបណានៅឡើយទេ ចំពោះសំណើនេះ។ ប៉ុន្តែលោកស្រី បានបង្ហាញការរីករាយ នៅពេលសាធារណរដ្ឋកូរ៉េ បានរួមចំណែកធ្វើឱ្យជីវភាព ប្រជាពលរដ្ឋខ្មែរ បានប្រសើរតាមរយៈការងារនេះ។ លោកស្រី ក៏បានបញ្ជាក់ផងដែរថា សាធារណរដ្ឋកូរ៉េ មានលក្ខខណ្ឌការងារច្បាស់លាស់ និងមានការគាំពារខ្ពស់ដល់សិទ្ធិ សុខុមាលភាពរបស់ពលករ។
លោកស្រីរដ្ឋមន្ត្រីការបរទេសសាធារណរដ្ឋកូរ៉េ ក៏បានអះអាងដែរថា ពលករកម្ពុជា ដែលបាននិងកំពុងធ្វើការ នៅក្នុងប្រទេសកូរ៉េនេះ បានរួមចំណែកដល់ការអភិវឌ្ឍសេដ្ឋកិច្ច របស់សាធារណរដ្ឋកូរ៉េ៕