កីឡាករ កីឡាការិនី កម្ពុជា ចេញដំណើរទៅកាន់ប្រទេសហ្វីលីពីន ដើម្បីចូលរួមការប្រកួតកីឡាស៊ីហ្គេមលើកទី ៣០
ភ្នំពេញ៖ លោកវ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា និងជានាយបេសកកម្មប្រតិភូកីឡាស៊ីហ្គេម នៅហ្វីលីពីន បានមានប្រសាសន៍ នៅព្រលានយន្តហោះអន្តរជាតិភ្នំពេញ កាលពីជិតអធ្រាត្រ យប់ថ្ងៃទី 26 វិច្ឆិកាឲ្យដឹងថា យប់នេះកីឡា ៣ ប្រភេទដែលមានកីឡាទូកក្តោង កីឡាបាល់ទះឆ្នេរខ្សាច់ និងកីឡាកាយសម្ព័ន្ធ (អាអេរ៉ូប៊ិក) បានចេញដំណើរទៅកាន់ប្រទេសហ្វីលីពីន ដើម្បីចូលរួមការប្រកួតកីឡាស៊ីហ្គេមលើកទី ៣០ នៅប្រទេសហ្វីលីពីន។ ហើយនៅថ្ងៃទី 28 វិច្ឆិកានេះ នឹងចេញទៅ ៩ ប្រភេទកីឡាទៀត គឺចេញជាបន្តបន្ទាប់ ដែលប្រភេទកីឡាទាំងអស់នេះ នឹងត្រូវចាប់ផ្តើមធ្វើការប្រកួតនៅថ្ងៃទី៣០ វិច្ឆិកា និងថ្ងៃទី ១ ខែធ្នូ ។ លោកវាត់ ចំរើន បានឲ្យដឹងថា ប្រតិភូដែលបានទៅចូលរួមនេះ គឺមានភាពកក់ក្តៅដោយសារការដឹកនាំចង្អុលបង្ហាញ និងអនុសាសន៍ជាបន្តបន្ទាប់ ពីថ្នាក់ដឹកនាំ ក្នុងការរៀបចំដំណើរចេញ ទៅការប្រកួតកីឡាស៊ីហ្គេមលើកទី ៣០ នៅប្រទេសហ្វីលីពីននេះ។ លោកក៏បានបញ្ជាក់ឱ្យដឹងដែរថា ប្រតិភូកីឡាជម្រើស ជាតិកម្ពុជាដែលចេញទៅស៊ីហ្គេមនេះ គឺចេញតាំងពីថ្ងៃទី ២៣ ខែវិច្ឆិកាកន្លងមកម្ល៉េះ ដែលពេលនោះ គឺប្រភេទកីឡាបាល់ ទាត់ដែលបានលេងមុនគេនៅថ្ងៃទី ២៥ វិច្ឆិកា ដែលលេងស្មើជាមួយនឹងម្ចាស់ផ្ទះមួយទល់នឹងមួយ។
ចំពោះក្រុមផ្នែករដ្ឋបាលកីឡារបស់កម្ពុជា ក៏បានចេញទៅដល់ប្រទេសហ្វីលីពីននេះ រួចអស់ហើយដែរ ដើម្បីរកចាំទទួលនិងសម្រួលរៀបចំជូនកីឡាករកីឡាការិនី និងថ្នាក់ដឹកនាំ។
លោកក៏បានបញ្ជាក់ឲ្យដឹងផងដែរថា សម្រាប់ការប្រកួតកីឡាស៊ីហ្គេមលើកទី ៣០ នៅប្រទេសហ្វីលីពីននេះ ក្នុងចំណោមប្រភេទកីឡាដែលកម្ពុជា បញ្ជូនទៅចំនួន ៣១កីឡានោះ ក៏មានប្រភេទកីឡា ដែលមានសក្តានុពល និងសង្ឃឹមថា បានទទួលមេដាយពីការប្រកួតនេះផងដែរ។
លោកបញ្ជាក់ថា ពេលនេះនៅហ្វីលីពីនកីឡាល្បុក្កតោ របស់កម្ពុជា កំពុងស្ថិតនៅទីនោះ ហើយដែលជាប្រភេទកីឡាមួយ ដែលយើងសង្ឃឹមថា នឹងទទួលបានមេដាយ ហើយបន្ទាប់ទៀតនោះ ក៏មានណាកីឡាគុនខ្មែរ ប្រដាល់ ប៉េតង់ ជិតជីដូ សូតេន្នីស្ត វាយកូនបាល់ ការ៉ាតេ ក៏សង្ឃឹមបានមេដាយដែរ គ្រាន់តែយើងមិនទាន់ហ៊ានទាយពីពណ៌មេដាយថាបានប៉ុន្មាន ។ លោកបានបញ្ជាក់ទៀតថា មេដាយដែលយើងចង់បានសម្រាប់ស៊ីហ្គេមលើកនេះ គឺធ្វើយ៉ាងណាមេដាយមាស ត្រូវដណ្តើមយកឲ្យបានលើសពីស៊ីហ្គេមលើកទី ២៩ នៅកូឡាឡំពួ ប្រទេសម៉ាឡេស៊ី កាលពីឆ្នាំ ២០១៧នោះ៕
