មនុស្សស្លាប់២៦នាក់ និង ៦៥០នាក់របួស ក្នុងគ្រោះរញ្ជួយដី នៅអាល់បានី

អាជ្ញាធរនៃប្រទេសអាល់បានី បានឱ្យដឹងនៅថ្ងៃពុធនេះថា ចំនួនអ្នកស្លាប់ដោយសារតែគ្រោះរញ្ជួយដី កាលពីថ្ងៃអង្គារ ចំនួន២៦នាក់ និងជាង៦៥០នាក់រងរបួស។ នេះបើតាមការចេញផ្សាយដោយ សារព័ត៌មាន BBC នៅថ្ងៃពុធ ទី២៧ ខែវិច្ឆិកា ឆ្នាំ២០១៩។

គ្រោះរញ្ជួយដីកម្រិត៦,៤រ៉ិចទ័រ បានវាយប្រហារលើរដ្ឋធានី Tirana និងទីក្រុង Durres នៃប្រទេសអាល់បានី ហើយ
បើតាមទីភ្នាក់ងារឃ្លាំមើលគ្រោះរញ្ជួយដីអាមេរិក (USGS) គ្រោះរញ្ជួយដីនេះមានជម្រៅទៅក្នុងដី១០គីឡូម៉ែត្រ ព្រមទាំងមានចំណុចរញ្ជួយស្ថិតនៅចំងាយ៣០គីឡូម៉ែត្រពីរដ្ឋធានី Tirana។ ម្យ៉ាងវិញទៀត គិតមកទល់នឹងពេលនេះ មនុស្សច្រើនជាង៤០នាក់ ត្រូវបានគេទាញចេញពីគំនរអគារបាក់បែក រីឯក្រុមអ្នកជួយសង្រ្គោះកំពុងបន្តប្រតិបត្តិការ របស់ពួកគេ ខណៈរដ្ឋាភិបាលប្រកាសកាន់ទុក្ខចំនួនមួយថ្ងៃ នៅថ្ងៃពុធនេះ៕