លី ភា លេចមុខមកប្រកួត ជាមួយអ្នកប្រដាល់ថៃ ចំណូលថ្មី

ភ្នំពេញ៖លើសង្វៀនBoostrong Fighter on Fireរបស់អាស៊ីអាគ្នេយ៍ ព្រឹកថ្ងៃទី១ធ្នូ អ្នកប្រដាល់ជើងខ្លាំកម្ពុជាលី ភាក្លិប
សំរោងកោងកីឡាខេត្តបាត់ដំបង នឹងប្រកួតជាមួយអ្នកប្រដាល់ថៃ ប៊ូ វី (Bou Vy) ដោយប្រកួតគ្នា ក្នុងប្រភេទទម្ងន់៦០គីឡូក្រាម។
លី ភាជាអ្នកប្រដាល់មួយរូប ដែលឧស្សាហ៍ចេញទៅប្រកួត ក្នុងទ្រុងនៅក្រៅប្រទេស ហើយអ្នកប្រដាល់ថៃតែងតែ
ចាត់ទុកថា អ្នកប្រដាល់កម្ពុជារូបនេះ មិនមែនជាដុំសាច់ ដែលស្រួលទំពារនោះទេ ។ចំពោះប៊ូ វីវិញ នេះជាលើកដំបូងហើយដែល
គេឆ្លងដែន មកប្រកួតនៅស្រុកខ្មែរ ។
ប៊ូ វី បើតាមការឲ្យដឹងពីលោកថៃ អ៊ូ ដែលជាអ្នកដឹកនាំអ្នកប្រដាល់ថៃ មកប្រកួតនៅសង្វៀនអាស៊ីអាគ្នេយ៍នោះថា គេ
មានសមត្ថភាពប្រហាក់ប្រហែល នឹងលី ភាដែរទេ ។ លោកអះអាងបន្តថា ជំនួបរវាងអ្នកប្រដាល់ទាំង២រូបនេះ ពិតជាធ្វើឲ្យមាន
ការជក់ចិត្តមិនខានឡើយ ។ ជំនួបមួយនេះ ទាំងអ្នកឈ្នះទាំងអ្នកចាញ់ប្រាកដ ជាទ្រមខ្លួនដូចគ្នាមិនខាន ។
លី ភា មានប្រវត្តិប្រកួតចំនួន៨៣ដង ឈ្នះ៦៩ដង ចាញ់១៤ ដង ។ ចំពោះអ្នកប្រដាល់ថៃប៊ូ វីវិញ គេមានប្រវត្តិប្រកួតចំនួន៦៨ដង ឈ្នះ៥៥ដង ចាញ់១២ដង និងស្មើពិន្ទុ១ដង ។ ជ័យជំនះជារបស់លី ភា ឬរបស់ប៊ូ វី ?
ជំនួបរវាងអ្នកប្រដាល់រួមជាតិវិញនោះ ឡុង ហាក់ក្លិបកងយោធពលខេមរភូមិន្ទ ប្រកួតជាមួយអ្នកប្រដាល់សួរ ចាន់រាជ ក្លិបតាព្រហ្មមានជ័យ ក្នុងប្រភេទទម្ងន់៤៨គីឡូក្រាម ។
ឡុង ហាក់មិនសូវមានអ្នកស្គាល់ឡើយ តែចាន់ រាជគឺពិតជាអ្នកខ្លាំង ស្រករក្រោយមែន គេមានផ្លែវ៉ៃល្អ និងក្លាហានណាស់ ។ ឡុង ហាក់ទំនងជាមិនអន់ទេ ទើបមន្ត្រីផ្គូរផ្គងដាក់ឲ្យប្រកួត ជាមួយសួរ ចាន់រាជបែបនេះនោះ ។ ជំនួបមួយនេះ នរណាឈ្នះនរណាចាញ់ ។
សេក គឹមអានក្លិបអង្គរមានជ័យខេត្តសៀមរាប ប្រកួតជាមួយអ្នកប្រដាល់រឿង សារិទ្ធក្លិបម្កុដរាជសីហ៍ ដោយប្រកួតគ្នា
ក្នុងប្រភេទទម្ងន់៦០គីឡូក្រាម ។
ពួកគេជាអ្នកលេងលើសង្វៀន ដែលមិនខ្សោយដូចគ្នា ។ ជំនួបមួយនេះ ទោះបីគេមិនអាចទស្សន៍ទាយមុនថា តើនរណាជា ឈ្នះក៏ពិតមែន តែគេអាចនិយាយបានថា ជាជំនួបអស្ចារ្យមួយ ដែលការប្រកួតអាច នឹងឈ្នះចាញ់ក្រោយបញ្ចប់ទឹកទី៥ ហើយ
ក៏អាចនឹងបញ្ចប់មុនទឹកទី៥បានដែរ ។
ពុទ្ធ ម៉ាណូយក្លិបពុទ្ធសេរីវង្ស ត្រូវបានផ្គូរផ្គង ឲ្យប្រកួតជាមួយជើងខ្លាំងឡុង រ៉ាមី របស់ក្លិបខ្លារខិនមានរិទ្ធ ដែលពួកគេ ទាំង២ នឹងប្រកួតគ្នាក្នុង ប្រភេទទម្ងន់៥៧គីឡូក្រាម ។
ឡុង សំណាងក្លិបពន្លឺវិបុលដារិទ្ធខ័ណ្ឌពោធិ៍សែនជ័យ ប្រកួតជាមួយអ្នកប្រដាល់ធា វាសនារបស់ក្លិបខេត្តរតនគីរី
ដោយពួកគេ ប្រកួតគ្នាក្នុងប្រភេទទម្ងន់៦០គីឡូក្រាម ៕