សម្តេចតេជោ ចុះសួរសុខទុក្ខ ដោយផ្ទាល់នៅបន្ទប់សំរាកព្យាបាល លោក អនុសេនីយ៍ឯក ទូច សៅហេង ដែលរថយន្តបុករបួសធ្ងន់
ភ្នំពេញ៖ ស្នងការនគរបាលខេត្តកណ្តាល បានថ្លែងថា សម្តេចតេជោ ហ៊ុន សែន បានឆ្លៀតឱកាសដ៏មមាញឹក គោរពអញ្ជើញមកសាកសួរសុខទុក្ខ ដោយផ្ទាល់នៅបន្ទប់សំរាកព្យាបាល លោក អនុសេនីយ៍ឯក ទូច សៅហេង នៅមន្ទីរពេទ្យកាល់ម៉ែត បន្ទាប់ពីរងរបួសធ្ងន់ ដោយសារតែរថយន្តតាកូម៉ាមួយគ្រឿង បើកបំបុក ហើយរថយន្តនោះ ថែមល្បឿនបើករត់គេចបាត់។
លោកអ៊ាវ ចំរើន ស្នងការនគរបាលខេត្តកណ្តាល បានថ្លែងថា “ជំនួសមុខឲ្យមន្ត្រីនគរបាលចរាចរណ៍ខេត្តកណ្តាលមួយរូប ដែលត្រូវរថយន្តបុកពេលកំពុងបំពេញការងារ និងក្រុមគ្រួសារ ខ្ញុំបាទផ្ទាល់ក៏ដូចជា នគរបាលចរាចរណ៍ទាំងអស់ នៃស្នងការដ្ឋាននគរបាលខេត្តកណ្តាល សូមគោរពអរគុណយ៉ាងជ្រាលជ្រៅបំផុតចំពោះសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលបានឆ្លៀតឱកាសដ៏មមាញឹក គោរពអញ្ជើញមកសាកសួរសុខទុក្ខ ដោយផ្ទាល់នៅបន្ទប់សំរាកព្យាបាល លោក អនុសេនីយ៍ឯក ទូច សៅហេង និងក្រុមគ្រួសារនៅមន្ទីរពេទ្យកាល់ម៉ែត ក្នុងគ្រាដែលសម្តេច កំពុងបំពេញកាតព្វកិច្ចដ៏កតញ្ញូបំផុត គឺមើលថែទាំអ្នកម្តាយ នៅមន្ទីរពេទ្យកាល់ម៉ែតនេះស្រាប់ “។
លោកស្នងការ បានលើកឡើងថា “សកម្មភាពនេះ គឺជាកាយវិការគំរូ នៃថ្នាក់ដឹកនាំរបស់យើងដែលមិនអាចបំភ្លេចបានឡើយ ហើយបានបង្ហាញអំពីការយកចិត្តទុកដាក់ ចំពោះកងកម្លាំងប្រដាប់អាវុធ គ្រប់ជាន់ថ្នាក់ ដែលជួបបញ្ហាផ្សេងៗ និងផលលំបាកចំពោះមុខ “។
លោក បានបន្តថា “ឆ្លៀតក្នុងឱកាសនេះ ខ្ញុំបាទ ជំនួសមុខឲ្យមន្ត្រីនគរបាលទាំងអស់ ទូទាំងខេត្តកណ្តាល សូមគោរពជូនពរសម្តេចតេជោ និងសម្តេចកិត្តិព្រឹទ្ធបណ្ឌិត ព្រមទាំងក្រុមគ្រួសារ សូមជួបនូវពុទ្ធពរទាំង៤ប្រការ គឺអាយុ វណ្ណ: សុខ: ពល: កុំបីឃ្លៀងឃ្លាតឡើយ និងជាពិសេស គឺសូមគោរពជូនពរអ្នកម្តាយ របស់សម្តេចទាំងទ្វេ ឆាប់បានធូរស្បើយ បន្តជាម្លប់ជួបជុំបុត្រធីតាយូរអង្វែងតទៅមុខទៀត” ។
លោកអ៊ាវ ចំរើន ស្នងការនគរបាលខេត្តកណ្តាល បានឲ្យដឹងថា នគរបាលចរាចរណ៍ផ្លូវគោកនៃស្នងការដ្ឋាននគរបាលខេត្តកណ្តាលម្នាក់រងរបួសធ្ងន់បាក់ជើងទាំងសងខាងខណ:ពេលកំពុងបំពេញភារកិច្ចសម្រួលចរាចរណ៍លើដងផ្លូវ ដែលគ្រោះថ្នាក់នេះកើតឡើងនៅវេលាម៉ោង២០និង០០នាទី នាថ្ងៃទី២៨ វិច្ឆកា ២០១៩ បង្កឡើងដោយម្ចាស់រថយន្ត Tacoma ល្មើសបំពានមិនស្តាប់ការបញ្ជារបស់នគរបាលចរាចរណ៌ដែលមានឈ្មោះអនុសេនីយ៍ឯក ទូច សៅហេង ឲ្យអែបខាង មិនតែប៉ុណ្ណោះថែមទាំងបើកបំបុកបណ្តាលឲ្យប៉ើងនគរបាលចរាចរណ៍ខ្ទាត៥ម៉ែត្រ មិនត្រឹមតែប៉ុណ្ណោះថែមល្បឿនបើករត់គេចទៀត យ៉ាងណាម៉ិញដោយមានការសហការល្អរបស់សមត្ថកិច្ចបានធ្វើការឃាត់បានរថយន្តភ្លាមៗផងដែរ ប៉ុន្តែជាអកុសលម្ចាស់រថយន្តបានរត់គេចចេញបាត់ទៅហើយ។
លោកស្នងការ បានថ្លែងថា “យើងសង្ឃឹមថាទោះម្ចាស់រថយន្តរត់ទៅដល់ទីណាក៏មិនរួចផុតពីសំណាញ់សមត្ថកិច្ចឡើយ សូមអញ្ជើញម្ចាស់រថយន្តចូលខ្លួនសារភាពកំហុសជាបន្ទាន់ យើងជឿថាលោកអាចស្គាល់ពីសមត្ថភាពរបស់មន្ត្រីនគរបាលខេត្តកណ្តាលរួចហើយ”។
លោកបន្តថា ” យើងខ្ញុំទាំងអស់គ្នាជាមន្ត្រីរួមអាជីពជាមួយលោកអនុសេនីយ៍ឯក ទូច សៅហេង សូមចូលរួមសោកស្តាយដែលត្រូវជនពាលអវិជ្ជាប្រមាថដល់ជីវិតក្នុងពេលបំពេញបេកម្មបែបនេះ យើងខ្ញុំសូមចូលរួមរំលែកនៅទុក្ខដ៏ធ្ងន់ធ្ងរនេះផង “៕
