សម្តេចតេជោ ៖ បច្ចុប្បន្ននេះវៀតណាម នាំចូលទំនិញមកកម្ពុជា ច្រើនជាងកម្ពុជា នាំចូលទៅវៀតណាម

ភ្នំពេញ៖ សម្តេចតេជោនាយករដ្ឋមន្ត្រី បានស្នើអោយរដ្ឋាភិបាលវៀតណាម តាមរយៈក្រសួងពាណិជ្ជកម្មវៀតណាម ត្រូវរួមសហការគ្នាជាមួយក្រសួងពាណិជ្ជកម្មកម្ពុជា ជាពិសេសត្រូវបង្កើនការនាំផលិតផលពីកម្ពុជាទៅវៀតណាមបន្ថែមទៀត ពីព្រោះបច្ចុប្បន្ននេះវៀតណាម នាំចូលមកកម្ពុជាច្រើនជាងកម្ពុជា នាំចូលទៅវៀតណាម ស្របពេលដែលវឌ្ឍនភាព និងភាពរីកចម្រើន នៃទំហំពាណិជ្ជម្មនៃប្រទេសទាំងពីរ ដែលតាមការគ្រោងទុក នឹងសម្រេចអោយបាន៥ពាន់លានដុល្លារក្នុងឆ្នាំ២០២០ ក៏ប៉ុន្តែសម្តេចតេជោ បានប៉ាន់ប្រមាណថា ទំហំពាណិជ្ជកម្មនៃប្រទេសទាំងពីរអាចលើសពី ៥ពាន់លានដុល្លារ។

នៅព្រឹកថ្ងៃអង្គារទី២៤ ខែធ្នូ ឆ្នាំ២០១៩នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអញ្ជើញសម្ពោធផ្សារដោះដូរទំនិញកម្ពុជា-វៀតណាម នៅព្រំដែនកម្ពុជា-វៀតណាម ខេត្តត្បូងឃ្មុំ ដែលពិធីសម្ពោធផ្សារនេះក៏មានការអញ្ជើញចូលរួមពី លោក ជីញ ឌិញ ស៊ុង (TRINH DINH DUNG) ឧបនាយករដ្ឋមន្ត្រីវៀតណាម ផងដែរ។

តាមរបាយការណ៍របស់លោក ប៉ាន សូរសក្តិ រដ្ឋមន្ត្រីក្រសួងពាណិជ្ជកម្មបាបអោយដឹងថា ផ្សារដោះដូរទំនិញកម្ពុជា-វៀតណាម មានឈ្មោះថា ផ្សារគំរូព្រំដែនកម្ពុជា (ផ្សារដារ) ដែលមានទីតាំងស្ថិតនៅក្នុងតំបន់សេដ្ឋកិច្ចពិសេសថារីត្បូងឃ្មុំ ភូមិដារកណ្តោល ឃុំដារ ស្រុកមេមត់ ខេត្តត្បូងឃ្មុំ លើផ្ទៃដីទំហំជិត២ហិកតា ចម្ងាយប្រមាណជា ៣០០ម៉ែត្រពីព្រំដែនកម្ពុជា-វៀតណាម។ ផ្សារនេះត្រូវបានបើកការដ្ឋានសាងសង់នៅឆ្នាំ២០១៨ ដោយចំណាយថវិកាជិត ២លានដុល្លារអាមេរិក ដែលជាថវិការបស់រដ្ឋាភិបាលវៀតណាម។ ផ្សារនេះមានចំនួន ៦៨ស្តង់ ចែកចេញជា៦ប្រភេទ។

ផ្សារគំរូព្រំដែនកម្ពុជា ត្រូវបានអនុញ្ញាតឱ្យដាក់លក់តែផលិតផលរបស់កម្ពុជា និងវៀតណាម ដោយមិនអនុញ្ញាតឱ្យលក់ផលិតប្រទេសដទៃនោះឡើយ។ ផ្សារគំរូព្រំដែនកម្ពុជានេះ មានសក្ដានុពលខ្ពស់ក្នុងការបង្កើតការងារបង្កើនចំណូលបន្ថែមសម្រាប់ប្រជាពលរដ្ឋ តាមព្រំដែន និងជំរុញទំហំពាណិជ្ជកម្មទ្វេភាគីរវាងប្រទេសទាំងពីរឱ្យបាន ៥ពាន់លានដុល្លារអាមេរិក តាមផែនការដែលប្រទេសទាំងពីរបានគ្រោងទុក។

សម្តេចតេជោនាយករដ្ឋមន្ត្រីបានថ្លែងអំណរគុណចំពោះរដ្ឋាភិបាល និងប្រជាពលរដ្ឋវៀតណាមដែលបានផ្តល់ជូននូវផ្សារនេះ សម្រាប់បម្រើដល់ជីវភាពនៃប្រជាពលរដ្ឋនៃប្រទេសទាំងពីរ។ សម្តេចតេជោក៏បានកោតសរសើរ ចំពោះក្រសួងពាណិជ្ជកម្មនៃប្រទេសទាំងពីរផងដែរ ដែលបានបង្កលក្ខណៈងាយស្រួល សម្រាប់ប្រជាពលរដ្ឋនៃប្រទេសទាំង២ បានដោះដូរទំនិញគ្នាទៅវិញទៅមក។

ជាថ្មីម្តងទៀត នៅថ្ងៃនេះ សម្តេចតេជោនាយករដ្ឋមន្ត្រីបានមានប្រសាសន៍ រំលឹកពីគោលដៅសំខាន់២ ដែលសម្តេចតេជោបានដាក់ចេញ ក្រោយពីការដាក់ចេញនូវនយោបាយ ឈ្នះ ឈ្នះ ដើម្បីកសាងអភិវឌ្ឍប្រទេសជាតិដែលក្នុងនោះរួមមាន៖
ទី១) គឺការប្រែក្លាយតំបន់ដែលជាអតីសមរភូមិក្តៅ កន្លែងដែលធ្លាប់កើតមាននូវភ្លើងសង្គ្រាម ទៅជាតំបន់ដែលមានសុខសន្តិភាព មានការអភិវឌ្ឍ និងជាតំបន់ទីផ្សារ ។ ទី២)គឺការប្រែក្លាយតំបន់ព្រំដែននៃប្រទេសជិតខាង អោយទៅជាតំបន់មានសន្តិភាព មិត្តភាព និងកិច្ចសហប្រតិបត្តិការល្អនឹងគ្នា។

ជាក់ស្តែងពេលនេះ គឺយើងបាននឹងកំពុងប្រែក្លាយតំបន់នេះផ្ទាល់ អោយទៅជាតំបន់ទីផ្សារ តំបន់សន្តិភាព និងតំបន់ដែលមានការអភិវឌ្ឍ ហើយនៅទីនេះ យើងក៏មានជាតំបន់សេដ្ឋកិច្ចពិសេសផងដែរ សម្រាប់ទាក់ទាញកាវិនិយោគផ្សេងៗ។ ទន្ទឹមនឹងនេះ សម្តេចនាយករដ្ឋមន្ត្រី ក៏បានជំរុញអោយកសិករ ពាណិជ្ជករ ត្រូវខិតខំកែច្នៃផលិតផលក្នុងស្រុកអោយទៅជាផលិតផលសម្រេចដើម្បីធ្វើការនាំចេញ។ ជាមួយគ្នានោះ សម្តេចតេជោនាយករដ្ឋមន្ត្រីក៏បានស្នើអោយរដ្ឋាភិបាលវៀតណាម តាមរយៈក្រសួងពាណិជ្ជកម្មវៀតណាម ត្រូវរួមសហការគ្នាជាមួយក្រសួងពាណិជ្ជកម្មកម្ពុជា ជាពិសេសត្រូវបង្កើនការនាំផលិតផលពីកម្ពុជាទៅវៀតណាមបន្ថែមទៀត ពីព្រោះបច្ចុប្បន្ននេះវៀតណាមនាំចូលមកកម្ពុជាច្រើនជាងកម្ពុជានាំចូលទៅវៀតណាម។

សម្តេចតេជោនាយករដ្ឋមន្ត្រី បានបង្ហាញពីវឌ្ឍនភាព និងភាពរីកចម្រើននៃទំហំពាណិជ្ជម្មនៃប្រទេសទាំងពីរ ដែលតាមការគ្រោងទុកនឹងសម្រេចអោយបាន៥ពាន់លានដុល្លារក្នុងឆ្នាំ២០២០ ក៏ប៉ុន្តែសម្តេចតេជោ បានប៉ាន់ប្រមាណថា ទំហំពាណិជ្ជកម្មនៃប្រទេសទាំងពីរអាចលើសពី ៥ពាន់លានដុល្លារទៅទៀត ពីព្រោះទំនិញមួយចំនួនដែលកម្ពុជានាំទៅវៀតណាមខ្លះ គឺមិនបានចុះបញ្ជីនោះទេ ដូចជាស្រូវជាដើម ដែលប្រជាពលរដ្ឋបានលក់ទៅវៀតណាមនោះ គឺមិនត្រូវបានកត់ត្រាឡើយ។ ជាមួយគ្នានេះ សម្តេចតេជោបានមានប្រសាសន៍បញ្ជាក់ថា ផ្សារនេះគឺចាត់ទុកជាផ្សារគំរូមួយ បើផ្សារនេះមិនទទួលបានជោគជ័យ ក៏យើងមិនអាចដំណើរការនៅកន្លែងផ្សេងៗទៀតបានដែរ។ ទន្ទឹមនឹងនេះ អភិបាលខេត្តត្រូវតែធ្វើយ៉ាងណា ខិតខំជំរុញក្នុងដំណើរការផ្សារនេះ បើផ្សារនេះត្រូវបរាជ័យ នោះអភិបាលខេត្តក៏ត្រូវអស់ដំណែងផងដែរ។

នៅថ្ងៃនេះផងដែរ សម្តេចតេជោនាយករដ្ឋមន្ត្រីក៏បានប្រកាស ថានឹងបើកផ្សារព្រំដែននេះ ជាបន្តទៀតនៅច្រកព្រំដែនកម្ពុជា-វៀតណាម នៅខេត្តកំពត និងនៅខេត្តស្វាយរៀង។ សម្តេចក៏បានស្នើទៅវៀតណាមរួចហើយ តែវៀតណាមមិនទាន់មានការឆ្លើយតប។ តែទោះជាយ៉ាងណាក៏ដោយសម្តេចតេជោ នឹងប្រើប្រាស់ថវិកាជាតិ តែម្តង ក្នុងការសាងសង់ផ្សារព្រំដែននេះ ដែលផ្សារមួយត្រូវចំណាយ ថវិកាប្រមាណជា២លានដុល្លារតែប៉ុណ្ណោះ ដូច្នេះ សម្តេចតេជោក៏បានអោយអភិបាលខេត្តកំពត និងខេត្តស្វាយរៀង ត្រូវរកដីត្រៀមទុកអោយហើយសំរាប់បើកផ្សារព្រំដែននេះ៕