ផ្តល់ជំនួយឥតសំណង ដល់អង្គភាពស៊ីម៉ាក់ គាំទ្រការអនុវត្តគម្រោងបោសសំអាតមីន និងសង្គ្រោះជនពិការដោយសារមីន
ភ្នំពេញ៖ លោកYuichi Sugano ប្រធានទីភ្នាក់ងារសហប្រតិបត្តិការអន្តរជាតិជប៉ុន(JICA ) និងលោក ហេង រតនា អគ្គនាយកស៊ីម៉ាក់បានចុះហត្ថលេខាលើកិច្ចសហប្រតិបតិ្តការបច្ចេកទេស ដែលJICA នឹងផ្តល់គម្រោងកិច្ចសហប្រតិបតិ្តការបច្ចេកទេសជូនរាជរដ្ឋាភិបាល ដើម្បីគាំទ្រដល់អង្គភាពស៊ីម៉ាក់សម្រាប់រយៈពេល៤ឆ្នាំ និងផ្តល់ថវិកាជាជំនួយឥតសំណង ចំនួន១លាន៧៩ម៉ឺនដុល្លារអាមេរិក ដល់អង្គភាពស៊ីម៉ាក់ គាំទ្រការអនុវត្តគម្រោងសមាហណរកម្មការបោសសំអាតមីន និងសង្គ្រោះជនពិការដោយសារមីន ។
លោក ហេង រតនា អគ្គនាយកស៊ីម៉ាក់ បានថ្លែងថា នៅថ្ងៃទី២៤ ខែធ្នូ ឆ្នាំ២០១៩នេះ នៅទីបញ្ជាការស៊ីម៉ាក់ភ្នំពេញ មានកម្មវិធីសំខាន់ពីរគឺ ១-ការចុះហត្ថលេខា រវាងលោកYuichi Sugano ប្រធានទីភ្នាក់ងារសហប្រតិបត្តិការអន្តរជាតិជប៉ុន(JICA ) និងខ្ញុំលើកិច្ចសហប្រតិបតិ្តការបច្ចេកទេស ដែលJICA នឹងផ្តល់គម្រោងកិច្ចសហប្រតិបតិ្តការបច្ចេកទេសជូនរាជរដ្ឋាភិបាល ដើម្បីគាំទ្រដល់អង្គភាពស៊ីម៉ាក់សម្រាប់រយៈពេល៤ឆ្នាំ កុម្ភៈ ២០២០-កុម្ភៈ ២០២៤។ និង ២- ការប្រកាសផ្តល់ថវិកាជាជំនួយឥតសំណង ចំនួន១លាន៧៩ម៉ឺនដុល្លារអាមេរិក ដល់អង្គភាពស៊ីម៉ាក់ គាំទ្រការអនុវត្តគម្រោងសមាហណរកម្មការបោសសំអាតមីន និងសង្គ្រោះជនពិការដោយសារមីន សម្រាប់រយៈពេល៦ខែ ចាប់ពីថ្ងៃទី០១ មករា-៣០ មិថុនា ២០២០ ហើយគាំទ្រកម្លាំងអ្នកបច្ចេកទេសជិត៤៥០នាក់។
ជំនួយនេះផ្តល់ជូនរាជរដ្ឋាភិបាល តាមរយៈក្រសួងសេដ្ឋកិច្ចនិងហិរញ្ញវត្ថុ នៃគម្រោងថវិកាបដិភាគរាជរដ្ឋាភិបាលកម្ពុជា-ជប៉ុន។
ក្នុងកម្មវិធីដ៏មានអត្ថន័យនេះ មានការអញ្ជើញចូលរួមជាសាក្សីពីសំណាក់ លោក នាយឧត្តមសេនីយ៍ មាស សុភា ទេសរដ្ឋមន្ត្រី ទទួលបន្ទុកការងារ មីន យុទ្ធភណ្ឌមិនទាន់ផ្ទុះ និងកងវិស្វកម្មនៃកងយោធពលខេមរភូមិន្ទ លោក ខឹម សោភ័ណ្ឌ ប្រធានក្រុមប្រឹក្សាភិបាលស៊ីម៉ាក់ និងលោក Masahiro Mikami ឯកអគ្គរដ្ឋទូតជប៉ុនប្រចាំកម្ពុជា៕