បុរសម្នាក់បើករថយន្តបុកទ្រូងផ្លូវ បាក់កស្លាប់ ក្នុងរថយន្តយប់មិញ
ភ្នំពេញ៖បុរសម្នាក់បាក់កស្លាប់ក្នុងរថយន្ត បន្ទាប់ពីបើករថយន្តម៉ាកព្រូស យ៉ាងលឿនដូចហោះរួចជ្រុលចង្កូតទៅបុកនឹងរបាំងថ្មពុះចែកទ្រូងផ្លូវពេញទំហឹងកាលពីម៉ោងទៀបភ្លឺឈានចូលថ្ងៃទី២៦ ខែធ្នូ ឆ្នាំ២០១៩ នៅចំណុចស្តុបមេភ្លើងមហាវិថីព្រះមុនីវង្ស កែងនិងផ្លូវ ៣៦០ ក្នុងសង្កាត់ បឹងកេងកងទី១ ខណ្ឌបឹងកេងកង រាជធានីភ្នំពេញ។
ជនរងគ្រោះស្លាប់ឈ្មោះ តាំង វាសនា អាយុ៣២ឆ្នាំសង្កាត់ ទូលសង្កែ ខណ្ឌឫស្សីកែវ។
ប្រភពពីកន្លែងកើតហេតុគេនិយាយថាមុនពេលកើតហេតុខាងលើនេះគេឃើញរថយន្តម៉ាក តូយូតាព្រូស ពណ៌ទឹកប្រាក់ ពាក់ផ្លាកលេខភ្នំពេញ 2Y 7332 បើកបរដោយបុរសម្នាក់តាមបណ្ដោយផ្លូវ៣៦០ ទិសដៅពីលិចទៅកើតក្នុងល្បឿនលឿន ខណៈមកដល់ចំណុចស្តុបកែងនិងមហាវិថីព្រះមុនីវង្សក៏បត់ឆ្វេងដៃមិនបង្អង់ ក៏ជ្រុលទៅបុកនឹងរបាំងថ្មពុះចែកទ្រូងផ្លូវយ៉ាងពេញទំហឹងបណ្ដាលឲ្យរថយន្តដាច់ចង្កូតបោកផ្ទប់ដើមទ្រូងបណ្ដាលបាក់កកស្លាប់ភ្លាមៗមួយរំពេចនៅនឹងកន្លែងកើតហេតុ បង្កឱ្យមានការភ្ញាក់ផ្អើលយ៉ាងខ្លាំងដល់អ្នកដំណើរនិងសមត្ថកិច្ចចុះមកជួយអន្តរាគមន៍ ខណះនោះក៏មានយុវជនប្រុសស្រី២នាក់បានរក្សាទ្រព្យសម្បត្តិរបស់គាត់បានទាំងលុយនិងទាំងទូរស័ព្ទ។ ដោយលុយរបស់ជនរងគ្រោះជិត ៤ពាន់ដុល្លារនិងទូរស័ព្ទ ២គ្រឿង ដើម្បីរក្សាទុកឲ្យក្រុមគ្រួសារសាច់ញាតិយកទៅវិញ។
ក្រោយកើតហេតុ សមត្ថកិច្ចជំនាញបានចុះមកវាស់វែងស្ទូចយករថយន្តទៅរក្សាទុក រង់ចាំដោះស្រាយគ្នានៅពេលក្រោយ និងធ្វើកំណត់ហេតុប្រគល់សពឲ្យទៅក្រុមគ្រួសារ ដឹកយកទៅតំកល់ទុកនៅវត្តទួលអស់លោក សង្កាត់គីឡូម៉ែត្រលេខ៦ ធ្វើបុណ្យផងដែរ៕