ក្រសួងសាធារណការ បានបញ្ជាក់ថា មិនទាន់មានការផ្លាស់ប្តូរមន្ត្រីបម្រើការងារនៅស្ថានីយជញ្ជីងថ្លឹងរថយន្តណាម្នាក់
ភ្នំពេញ៖ ក្រសួងសាធារណការ បានបញ្ជាក់ថា ក្រសួង មិនទាន់មានការផ្លាស់ប្តូរមន្ត្រីបម្រើការងារនៅស្ថានីយជញ្ជីងថ្លឹងរថយន្តណាម្នាក់ ដែលកំពុងបំពេញភារកិច្ចនៅតាមបណ្តាស្ថានីយជញ្ជីងរថយន្តទូទាំង២៧ទីតាំងនៅឡើយ ហេតុនេះសូមកុំមានការយល់ច្រឡំ។ ការចេញសេចក្តីប្រកាសព័ត៌មាន បែបនេះ បន្ទាប់ពីលោកពេជ្រ ស្រស់ ប្រធានគណបក្សយុវជនកម្ពុជា និងជាសមាជិកឧត្តមក្រុមប្រឹក្សាពិគ្រោះនិងផ្តល់យោបល់ បានសរសេរសារលើហ្វេសប៊ុក នៅថ្ងៃទី៦ ខែមករា ឆ្នាំ២០២០ បានឲ្យដឹងថា មានក្លិនស្អុយជះចេញពីផ្ទៃក្នុងរបស់ក្រសួងសាធារណការ និងដឹកជញ្ជូន។
សេចក្តីប្រកាសព័ត៌មាន របស់អ្នកនាំពាក្យក្រសួងសាធារណការ និងដឹកជញ្ជូននៅថ្ងៃទី៦មករា សូមជម្រាបជូនសាធារណជនឱ្យ
បានជ្រាបថា ថ្មីៗនេះមានព័ត៌មានថា ក្រសួងសាធារណការ និងដឹកជញ្ជូននឹងធ្វើការផ្លាស់ប្ដូរមន្ត្រីបម្រើការងារនៅតាមបណ្តាស្ថានីយជញ្ជីងថ្លឹងរថយន្តទូទាំង២៧ទីតាំង ដែលការផ្សាយដូចខាងលើនោះ ជាព័ត៌មានមិនពិតឡើយ។
ពាក់ព័ន្ធនឹងករណីនេះ អ្នកនាំពាក្យក្រសួងសាធារណការ និងដឹកជញ្ជូន សូមជូនដំណឹងដល់សាធារណជន មេត្តាជ្រាបថា រហូតមកដល់ពេលនេះ ក្រសួងមិនទាន់មានការផ្លាស់ប្ដូរមន្ត្រីបម្រើការងារនៅស្ថានីយជញ្ជីងថ្លឹងរថយន្តណាម្នាក់នៅឡើយទេ។ ក្នុងករណី
មានការផ្លាស់ប្តូរ ក្រសួងនឹងរៀបចំអនុវត្តទៅតាមនីតិវិធីច្បាប់ជាធរមាន។
លោកពេជ្រ ស្រស់ បានសុំអរគុណចំពោះការឆ្លើយតបរបស់ក្រសួងសាធារណការ និងដឹកជញ្ជូនហើយខ្ញុំនឹងតាមដានបន្តទៀត ព្រោះថាខ្ញុំមានភស្តុតាជាសម្លេងមន្រ្តីជាន់ខ្ពស់ខាងក្រសួងនិងមន្រ្តីស៊ីវិលមួយចំនួនបានផ្តាំផ្ញើរគ្នាឲ្យធ្វើចិត្តទៅនៅថ្ងៃខាងមុខ នឹងដកទាំងអស់ហើយ ដោយខណៈនេះបញ្ជីឈ្មោះមន្រ្តីថ្មីខាងនាយកដ្ឋាននីមួយៗ បានផ្ញើរឈ្មោះទៅអស់ហើយ។ នេះជាការបញ្ជាក់ក្នុងខ្សែអាត់សម្លេង។ ខ្ញុំនឹងបង្ហោះសម្លេងរបស់មន្រ្តីជាន់ខ្ពស់ម្នាក់នោះ បើសិនមានភាពចាំបាច់ណាមួយ។ ទោះបីជាយ៉ាងណាខ្ញុំសង្ឃឹមថាការផ្លាស់ប្តូរមន្រ្តីរាជការគឺផ្លាស់ប្តូរឲ្យតម្លាភាពនិងយុត្តិធម៌ជៀសវាងធ្វើឲ្យមន្រ្តីល្អៗបាក់ទឹកចិត្ត។
លោកពេជ្រ ស្រស់ បានថ្លែងថា តម្រុយផ្ទៃក្នុងគឺ មន្រ្តីស៊ីវិលនៅទូទាំង ២៧ ស្ថានីយ៍សរុបចំនួន ១៦២ រូប កំពុងយំខ្សឹបខ្សួលនៅក្នុងឱរា គឺដោយសារតែការកំណែទម្រង់ដែលស៊ីជ្រៅហួសរបស់រដ្ឋមន្រ្តី ស៊ុន ចាន់ថុល គឺស៊ីទាំងខ្ចីស៊ីទាំងចាស់ ធ្វើឲ្យមន្រ្តីស្ថានីយ៍ថ្លឹង
រថយន្តស្ទើរតែគាំងបេះដូងគ្រប់គ្នា។
លោកថា មន្រ្តីស៊ីវិល២៧ស្ថានីយ៍ថ្លឹងរថយន្តមួយចំនួនបានប្រាប់ខ្ញុំថា៖ រដ្ឋមន្រ្តីស៊ុន ចាន់ថុល នឹងដកមន្រ្តីស៊ីវិលដែលកំពុងតែបម្រើការតាមស្ថានីយ៍ថ្លឹងរថយន្តទូទាំងប្រទេស មិនថាមន្រ្តីចាស់ឬថ្មីនោះឡើយ ហើយជំនួសមកវិញនូវមន្រ្តីថ្មីទាំងអស់ដែលមិនទាន់ចេះធ្វើការងារផង។
មន្រ្តីដែលកំពុងរងការដកចោលទាំងនោះ បានប្រាប់ខ្ញុំបន្ថែមទៀតថា៖ បើរដ្ឋមន្រ្តី ស៊ុន ចាន់ថុល លុបស្ថានីយ៍ថ្លឹងរថយន្តចោលទាំងអស់ទូទាំងប្រទេសតែម្តងទៅ គឺល្អជាងដើម្បី កុំឲ្យមានរឿងអយុត្តិធម៌កើតលើមន្រ្តីល្អៗដែលគ្មានកំហុសសោះ ពីព្រោះការដកអ្នកចាស់ ដាក់អ្នកថ្មីម៉ៅរួមទាំងនេះ គឺធ្វើឲ្យមន្រ្តីបាក់ទឹកចិត្តខ្លាំងណាស់ ដោយសារមានមន្រ្តីខ្លះមិនបានប្រព្រឹត្តនូវកំហុសអ្វីសោះ ក៏ត្រូវដកចោលដូចកូនស្ពៃដែរនោះ។
ពួកគាត់បានរៀបរាប់ប្រាប់ខ្ញុំទៀតថា បើរដ្ឋមន្រ្តី ស៊ុន ចាន់ថុល ធ្វើកំណែទម្រង់វះកាត់ សូមរដ្ឋមន្រ្តីវះកាត់តែមន្រ្តីស្អុយទៅបានហើយ សុំកុំម៉ៅរួមដូច្នេះ ពីព្រោះប៉ះដល់មន្រ្តីល្អៗដែរ។
បន្ថែមពីនេះទៅទៀតគឺពួកគាត់ដាក់ការសង្ស័យថា៖ ការដកនូវមន្ត្រីស៊ីវិលទាំង១៦២រូប ទាំងចាស់ទាំងថ្មី ដែលកំពុងបម្រើការក្នុងស្ថានីយ៍ថ្លឹងរថយន្តដោយជំនួសអ្នកថ្មីទាំងអស់នោះ គឺអាចដាក់ឃ្នីគ្នារបស់ពួកគេពីក្រសួង
ទាំងអស់ឬជាបក្ខពួករបស់គេតែម្តង។
ក្រោយពីខ្ញុំ ពេជ្រ ស្រស់ បានស្តាប់ការរៀបរាប់របស់មន្រ្តីស៊ីវិលខាងលើរួចមក ខ្ញុំក៏ទទួលបានភស្តុតាងថែមទៀតពី មន្រ្តីជាន់ខ្ពស់ មួយរូបរបស់រដ្ឋមន្រ្តី ស៊ុន ចាន់ថុល ថានឹងមានការដកដូចមន្រ្តីទាំងនោះរៀបរាប់ពិតមែន ហើយការដកមន្រ្តីទាំងនោះនឹងធ្វើឲ្យ
ពួកគាត់បាក់ទឹកចិត្តយ៉ាងខ្លាំង ព្រោះថាមានមន្រ្តីខ្លះមិនបានប្រព្រឹត្តកំហុសផង បែរជាត្រូវក្រសួងដកចោលដែរ...។
ចំពោះករណីខាងលើខ្ញុំនឹងសិក្សាថែមទៀត ដើម្បីធានាបាននូវតម្លាភាពនិងយុត្តិធម៌ ជាពិសេសគឺទប់ស្កាត់នូវការប្រព្រឹត្តអំពើពុករលួយ៕