អាមេរិកផ្ដល់ជំនួយ ៧៥.០០០ដុល្លារ ដើម្បីឱ្យថែរក្សាភស្តុតាង ដែលបានបន្សល់ទុកពីសម័យខ្មែរក្រហម នៅសារមន្ទីរទួលស្លែង
ភ្នំពេញ៖ ការអភិរក្ស សម្លៀកបំពាក់ជនរងគ្រោះក្នុងរបបខ្មែរក្រហម នៅមន្ទីរស២១នេះឯកអគ្គរដ្ឋទូតសហរដ្ឋអាមេរិក លោក Patrick Murphy និងរដ្ឋមន្ត្រីក្រសួងវប្បធម៌ និងវិចិត្រសិល្បៈ លោកស្រី ភឿង សកុណា នៅថ្ងៃទី១៦ខែមករានេះ បានចុះហត្ថលេខាលើកិច្ចព្រមព្រៀងស្ដីពី ការអភិរក្ស និងរៀបចំឯកសារកាតាឡុកនៃសម្លៀកបំពាក់ជនរងគ្រោះនៅមន្ទីរ ស២១ ដែលមានទឹកប្រាក់ចំនួន ៧៥០០០ដុល្លារ។ នេះបើតាមការផ្សព្វផ្សាយ របស់ក្រសួងព័ត៌មាន។
“មន្ទីរ ស-២១” មានឈ្មោះថា គុកទួលស្លែង មានទីតាំងក្នុងអតីតវិទ្យាល័យទួលស្លែង ស្ថិតក្នុងក្រុងភ្នំពេញ ។ មន្ទីរស-២១ ត្រូវបានពួកខ្មែរក្រហមបង្កើតឡើង តែប៉ុន្មានខែប៉ុណ្ណោះ ក្រោយពីពួកគេឡើងកាន់អំណាច នៅឆ្នាំ១៩៧៥ ។ នៅចន្លោះឆ្នាំ១៩៧៥-១៩៧៩ មានមនុស្សជាង១ម៉ឺននាក់ ត្រូវបានពួកខ្មែរក្រហម ចាប់ខ្លួនយកទៅឃុំឃាំងនៅក្នុងមន្ទីរស-២១។
ឯកអគ្គរដ្ឋទូតសហរដ្ឋអាមេរិក លោក Patrick Murphy ថ្លែងក្នុងពិធីចុះហត្ថលេខាថា នេះជាដំណាក់កាលទីពីរនៃគម្រោងអភិរក្សរបស់របរដែលសេសសល់របស់ជនរងគ្រោះ កាលពីសម័យខ្មែរក្រហម។ លោកបន្តថា ក្រៅពីផ្ដល់ថវិកាសម្រាប់រក្សាសម្លៀកបំពាក់ជនរងគ្រោះនៅមន្ទីរ ស២១ លោកថា អាមេរិកក៏បានផ្ដល់ថវិកា សម្រាប់អភិរក្សបេតិកភណ្ឌវប្បធម៌ផ្សេងៗផងដែរ។
លោកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ មានប្រសាសន៍ថា ក្រសួងរំពឹងសហរដ្ឋអាមេរិកនឹងផ្ដល់ជំនួយលើគម្រោងទី៣បន្តទៀត ដើម្បីឱ្យថែរក្សារបស់បរបន្សល់ទុកពីសម័យខ្មែរក្រហម។
កាលពីឆ្នាំ២០១៧ សហរដ្ឋអាមេរិកបានផ្តល់មូលនិធិចំនួន ៥៥ ៥០០ដុល្លារដល់ក្រសួងវប្បធម៌ និងវិចិត្រសិល្បៈ សម្រាប់ការពារសម្លៀកបំពាក់របស់ជនរងគ្រោះដែលជាវត្ថុតាងនៃរបបខ្មែរក្រហមនៅសារមន្ទីរឧក្រិដ្ឋកម្មប្រល័យពូជសាសន៍ទួលស្លែង ឬហៅមន្ទីរស២១៕