វេជ្ជបណ្ឌិតចិនស្លាប់ដោយសារវីរុសកូរ៉ូណា ក្រោយលោកជាមនុស្សដំបូងគេដែលបានព្រមានពីការផ្ទុះវីរុសមរណៈនោះ
វេជ្ជបណ្ឌិតចិន ដែលជាមនុស្សដំបូងគេបង្អស់ដែលបានព្រមានសាធារណៈពីការផ្ទុះវីរុសកូរ៉ូណា និងត្រូវបានអាជ្ញាធរកោះហៅសាកសួរពីបទចែកចាយពាក្យចចាមអារ៉ាម បានស្លាប់ដោយសារវីរុសដ៏កាចសាហាវនេះនៅព្រឹកថ្ងៃសុក្រនេះ។ នេះបើតាមមន្ទីរពេទ្យរបស់លោកប្រកាស។
លោកវេជ្ជបណ្ឌិត Li Wenliang ធ្វើពេទ្យឯកទេសព្យាបាលរោគភ្នែក នៅទីក្រុងវូហាន នៅពេលដែលគាត់ពិនិត្យអ្នកជំងឺដែលមានរោគសញ្ញាស្រដៀងទៅនឹងជំងឺសារ (SARS) ដែលផ្ទុះក្នុងប្រទេសចិនកាលពីឆ្នាំ ២០០២-២០០៣។
កាលពីថ្ងៃទី ៣០ ខែធ្នូ លោកបានផ្ញើសារទៅព្រមានទៅដល់អ្នកធ្វើការទាំងអស់ជាមួយគាត់ពីការផ្ទុះវីរុសកូរ៉ូណា ប៉ុន្តែក្រោយមក គាត់ត្រូវបានប៉ូលីសកោះហៅពីបទចែកចាយពាក្យចចាមអារ៉ាម។
ក្រោយមក គាត់ក៏បានឆ្លងវីរុសកូរ៉ូណា នៅពេលដែលលោកព្យាបាលអ្នកជំងឺម្នាក់ ហើយលោកត្រូវបានអ្នកប្រើប្រាស់អ៊ីនធឺណេតក្នុងប្រទេសចិនចាត់ទុកជាវីរៈបុរស។
មន្ទីរពេទ្យកណ្តាលវូហាន ស្ថិតក្នុងខេត្តហូបេ កន្លែងដែលលោកវេជ្ជបណ្ឌិតវ័យ ៣៤ឆ្នាំខាងលើធ្វើការ បានប្រកាសពីការស្លាប់របស់គាត់។
សូមបញ្ជាក់ថា តួលេខចុងក្រោយនេះអ្នកស្លាប់ដោយសារវីរុសកូរ៉ូណា ក្នុងប្រទេសចិន បានកើនឡើងដល់ចំនួន ៦៣៦នាក់ ខណៈអ្នកឆ្លងមានលើស ៣០.០០០នាក់។
នៅក្នុងចំណោមអ្នកឆ្លង មានចំនួន ៤.៨០០នាក់កំពុងស្ថិតក្នុងស្ថានភាពធ្ងន់ធ្ងរ៕