ប្រយុទ្ធប្រឆាំងការនាំចូលផលិតផល និងការចែកចាយនូវផលិតផល ឱសថ គ្រឿងសំអាងក្លែងក្លាយ
រាជធានីភ្នំពេញ ៖ គណៈកម្មាធិការប្រយុទ្ធប្រឆាំងផលិតផលក្លែងក្លាយដែលបង្កគ្រោះថ្នាក់មានហានិភ័យខ្ពស់ដល់សុខភាព និងសុវត្ថិភាពសង្គម ជាមួយនិងសមាគមសហព័ន្ធវិនិយោគិនកម្ពុជា(សមាគមអ្នកលក់ឱសថកម្ពុជា) បានចុះអនុស្សរណៈយោគយល់គ្នា ស្តីពីកិច្ចសហប្រតិបត្តិការ ដើម្បីប្រយុទ្ធប្រឆាំងការនាំចូលផលិតផល និងការចែកចាយនូវផលិតផល ឱសថ គ្រឿងសំអាងក្លែងក្លាយ នាំចូលគ្មានការអនុញ្ញាតរំលោភកម្មសិទ្ធិបញ្ញា និងរំលោភសិទ្ធិនាំចូលផ្ដាច់មុខនៅក្នុងព្រះរាជាណាចក្រកម្ពុជា នាព្រឹកថ្ងៃទី៩ កុម្ភៈនេះ នៅទីស្តីការក្រសួងមហាផ្ទៃ ។
ក្នុងឱកាសនោះដែរ លោកបណ្ឌិត ឡីសុភាព ប្រធានសមាគមសហព័ន្ធវិនិយោគិនកម្ពុជា បានលើកឡើងថា ជាការពិតណាស់ហើយ ការចុះអនុស្សរណៈនៃការយោគយល់គ្នារវាង គណៈកម្មាធិការប្រយុទ្ធប្រឆាំងផលិតផលក្លែងក្លាយ និងសមាគមសហព័ន្ធវិនិយោគិនកម្ពុជា មិនត្រឹមតែផ្ដល់ប្រយោជន៍ដល់អ្នកប្រើប្រាស់ប៉ុណ្ណោះទេ គឺថែមទាំងការពារពាណិជ្ជករ វិនិយោគសុចរិត និងសហគ្រាសទាំងឡាយ ដែលប្រកបការងារ និងមុខរបរស្របច្បាប់មានភាពស្មោះត្រង់ ក្នុងការរកស៊ីប្រកួតប្រជែងដោយភាពត្រឹមត្រូវ ដើម្បីចូលរួមចំណែកក្នុងការអភិវឌ្ឍសេដ្ឋកិច្ច និងពិតជាបានដល់នៃសុវត្ថិភាពជូនដល់ប្រជាជនកម្ពុជាយើងផងដែរ ។
លោកបន្តថា សមាគមអ្នកលក់ឱសថកម្ពុជា ដែលជាវិនិយោគិន សហគ្រិន ពាណិជ្ជករ អាជីវករ សិប្បករ យុវជន អ្នកលក់គ្រឿងសំអាង អ្នកលក់អាហារបំប៉ន អ្នកធុរកិច្ចទីផ្សារបណ្តាញ បរិក្ខារពេទ្យ អ្នកលក់ឱសថ អ្នកលក់ផលិតផល តាមបណ្តាញសង្គម អនឡាញ ដែលជាម្ចាស់មូលដ្ឋានអាជីវកម្ម អ្នកគ្រប់គ្រងទូទៅ តាមឱសថស្ថាន ផ្សារទំនើប ម៉ាត បេប៊ីម៉ាត បណ្តាញសង្គមអនឡាញ អគារឱសថបូរាណ បន្ទប់ថែទាំ បន្ទប់ពិគ្រោះ និងព្យាបាលជំងឺទូទៅ គ្លីនិក ក្រុមហ៊ុននាំចូល និងចែកចាយ ពិតជាមានសុទិដ្ឋិនិយមយ៉ាងមុតមាំ លើការដឹកនាំប្រកបដោយភាពហ្មតចត់ របស់នាយឧត្តមសេនីយ៍ប្រធានគណៈកម្មាធិការ នឹងធ្វើឲ្យខ្លឹមសារដែលមានចែងក្នុងអនុស្សរណៈក្លាយទៅជាផែនការ និងសកម្មភាព ក្នុងការប្រយុទ្ធប្រឆាំងផលិតផលក្លែងក្លាយ ទទួលបានប្រសិទ្ធភាពខ្ពស់។ លោកបានបន្តថា សមាគម បានត្រៀមខ្លួនរួចជាស្រេច ក្នុងការសហការយ៉ាងជិតស្និទ្ធ ជាមួយនឹងគណៈកម្មាធិការ ប្រយុទ្ធប្រឆាំងផលិតផលក្លែងក្លាយ ក្នុងការអនុវត្តន៍នូវខ្លឹមសារអនុស្សរណៈនេះ។
លោកនាយឧត្តមសេនីយ៍ មៀច សុផាន់ណា ប្រធានគណៈកម្មាធិការប្រយុទ្ធប្រឆាំងផលិតផលក្លែងក្លាយបានជំរុញឲ្យអ្នករកស៊ីតាមអនឡាញក៏ដូចជា រកស៊ីចែកចាយផលិតផលផ្សេងៗ នៅតាមគេហដ្ឋានធ្វើការពិនិត្យផលិតផលឲ្យបានហ្មត់ចត់មុននឹងលក់ ។
លោក មៀច សុផាន់ណា រដ្ឋលេខាធិការក្រសួងមហាផ្ទៃ និងជាប្រធានគណៈកម្មាធិការប្រយុទ្ធប្រឆាំងផលិតផលក្លែងក្លាយបានស្នើដល់អ្នករកស៊ីតាមប្រព័ន្ធអនឡាញ ដែលបានចុះបញ្ជីការត្រឹមត្រូវនៅក្រសួងមហាផ្ទៃ ត្រូវធ្វើការពិនិត្យឲ្យបានហ្មត់ចត់រួចរាល់ តែយកលទ្ធផលទាំងឡាយ មកលក់ចែកចាយលើទីផ្សារនៃក្នុងប្រទេសកម្ពុជា ។ ចំណុចនេះ គឺដើម្បីធ្វើយ៉ាងណាការពារឲ្យបាននៃការនាំចូលផលិតផលក្លែងក្លាយ និងផលិតខូចគុណភាពដែលធ្វើឲ្យប៉ះពាល់សុខភាពដល់អ្នកប្រើប្រាស់ ។ លោកបានបន្តថា ក្រោមការដឹកនាំរបស់សម្ដេចតេជោហ៊ុន សែន នាយករដ្ឋមន្ត្រីកម្ពុជា បានក្លាយជាប្រទេសមួយកំពុងធ្វើសមាហរណកម្មខ្លួនយ៉ាងសកម្មនៅក្នុងគ្រប់កិច្ចការតំបន់ និងឆាកអន្តរជាតិ ហើយក៏ជាប្រទេសស្ថិតក្នុងចំណោមប្រទេសកំពុងអភិវឌ្ឍន៍ដែលបានសម្រេចនៃវឌ្ឍនភាពដ៏ប្រសើរ ។ សម្តេចតេជោ ក៏បានយកចិត្តទុកដាក់ខ្ពស់គិតគូរអំពីផលប៉ះពាល់យ៉ាងធ្ងន់ធ្ងរដល់សុខភាព សុខុមាលភាព សុខភាពសាធារណៈ និងជីវភាពប្រចាំថ្ងៃ របស់ប្រជាពលរដ្ឋ ដោយសម្តេច បានដាក់ចេញនូវវិធានការណ៍ ដើម្បីអប់រំ ទប់ស្កាត់ បង្ការបង្រ្កាបបទល្មើស និងលុបបំបាត់នូវបណ្តាបាតុភាពអវិជ្ជមាននានាក្នុងសង្គម ដូចជាការប្រយុទ្ធប្រឆាំងនឹងផលិតផលក្លែងក្លាយ និងឱសថក្លែងក្លាយជាដើម។
នាយឧត្តមសេនីយ៍ បានបញ្ជាក់ថា កន្លងមកថ្មីៗនេះ គណៈកម្មាធិការក៏បានប្រតិបត្តិការបង្ក្រាប និងបំផ្លាញចោលផលិតផលខុសច្បាប់ ជាច្រើនលើក និងមានចំនួនរាប់រយតោន រួមមាន ផលិតផលឱសថ គ្រឿងសំអាង ផលិតផលប្រើប្រាស់ និងគ្រឿងឧបភោគ បរិភោគ ខុសច្បាប់ និងខូចគុណភាពបជាច្រើនសន្ធឹកសន្ធាប់ និងបានឃាត់ខ្លួនជនសង្ស័យបញ្ជូនទៅតុលាការ ដើម្បីផ្តន្ទាទោសតាមច្បាប់ជាច្រើននាក់ផងដែរ។
សូមជម្រាបថា សមាគមសហព័ន្ធវិនិយោគិនកម្ពុជា មានសមាជិកភាពរបស់ខ្លួនជាង 5000 ក្រុមហ៊ុន រកទទួលទានលើវិស័យដូចជា វេជ្ជសាស្ត្រ ឱសថសាស្ត្រ ទន្តសាស្ត្រ សេដ្ឋកិច្ច ពាណិជ្ជកម្ម ៕
