អ្នកស្លាប់ដោយសារវីរុសកូរ៉ូណា នៅចិនជាង ៩០០នាក់
ចំនួនអ្នកស្លាប់ដោយសារវីរុសកូរ៉ូណាថ្មី នៅក្នុងប្រទេសចិន បានកើនដល់ចំនួន ៩១០នាក់ ដែលតួលេខនេះលើសចំនួនអ្នកស្លាប់ ដោយសារការផ្ទុះជំងឺសារ (SARS) នៅចិន និងហុងកុងកាលពីជិត ២០ឆ្នាំមុន។
ក្នុងរយៈពេល ២៤ម៉ោង មានអ្នកស្លាប់ថ្មីចំនួន ៩១នាក់។ នេះជាការបញ្ជាក់របស់គណៈកម្មការសុខភាពចិន។
តួលេខនេះ បានកើនឡើងយ៉ាលឿន ហើយវាបានលើសតួលេខអ្នកស្លាប់ ដោយសារជំងឺសារដែលមានផ្តាច់ជីវិតមនុស្សត្រឹម ៦៥០នាក់ ក្នុងឆ្នាំ ២០០២ និង ២០០៣។
មានករណីឆ្លងថ្មីចំនួន ២.៦១៨ ហើយតួលេខនៃអ្នកឆ្លងសរុបនៅក្នុងប្រទេសចិន បានកើនដល់ចំនួន ៣៩.៨០០នាក់។
សូមបញ្ជាក់ថា វីរុសមរណៈកូរ៉ូណា ចាប់ផ្តើមផ្ទុះដំបូងកាលពីខែ ធ្នូ នៅក្នុងទីក្រុងវូហាន នៃខេត្តហូបេ៕