COVID-19៖ អ្នកស្លាប់នៅចិនកើនដល់ជាង ២.១០០នាក់ ខណៈករណីឆ្លងធ្លាក់ចុះយ៉ាងខ្លាំង
ចិនបានប្រកាសថា ករណីឆ្លងវីរុសកូរ៉ូណា ឬ COVID-19 មានការធ្លាក់ចុះយ៉ាងខ្លាំង ប៉ុន្តែអ្នកវិទ្យាសាស្រ្តព្រមានថា វីរុសនោះអាចរីករាលដាលកាន់តែស្រួលជាងអ្វីដែលយើងជឿពីមុនមក។
តួលេខអ្នកឆ្លងវីរុសមរណៈនេះ មានត្រឹមតែ ៣៩៤ករណីប៉ុណ្ណោះកាលពីថ្ងៃពុធម្សិលមិញ មានការធ្លាក់ចុះយ៉ាងខ្លាំងបើធៀបទៅនឹងថ្ងៃអង្គារ ដែលមានការឆ្លងរហូតដល់ ១.៧៤៩ករណី។ នេះបើតាមគណៈកម្មការសុខភាពជាតិរបស់ចិន ឲ្យដឹងនៅថ្ងៃព្រហស្បតិ៍នេះ។
ចំនួនការឆ្លងសរុបនៅក្នុងប្រទេសចិនបានកើនដល់ ៧៤.៥៧៦ករណី ខណៈអ្នកស្លាប់បានកើនដល់ ២.១១៨នាក់ នៅចុងថ្ងៃពុធម្សិលមិញនេះ។ អ្នកស្លាប់ថ្មីនៅក្នុងខេត្ត ហូបេ មានចំនួន ១០៨នាក់ ក្នុងនោះមាន ៨៨នាក់ស្លាប់នៅទីក្រុងវូហាន នៃខេត្តនេះ។
សូមបញ្ជាក់ថា កាលពីថ្ងៃពុធម្សិលមិញនេះ អ្នកវិទ្យាសាស្រ្តបានចុះផ្សាយការរកឃើញបឋម ដោយបានលើកឡើងថា វីរុសកូរ៉ូណាអាចរីករាលដាលយ៉ាងស្រួល រួមមានតាមរយៈអ្នកជំងឺដែលគ្មានរោគសញ្ញា៕