ឃាត់ខ្លួនជនសង្ស័យម្នាក់ អនុវត្តតាមដីកាបង្គាប់ឲ្យចាប់ខ្លួនករណីរំលោភសេពសន្ថវៈ កាលពី៤ឆ្នាំមុន
ខេត្តកណ្ដាល៖ ជនសង្ស័យម្នាក់ ដែលជាប់ពាក់ព័ន្ធករណីរំលោភសេពសន្ថវៈ កាលពីឆ្នាំ២០១៦ ហើយបានរត់គេចខ្លួនអស់ជាច្រើនឆ្នាំ ត្រូវបានសមត្ថកិច្ចនគរបាលស្រុកខ្សាច់កណ្តាល ឃាត់ខ្លួន អនុវត្តតាមដីកាបង្គាប់ឲ្យចាប់ខ្លួន ។
ដោយអនុវត្តតាមដីកាបង្គាប់ឲ្យចាប់ខ្លួនលេខ ២៨៩ ចុះថ្ងៃទី ១៩ ខែឧសភា ឆ្នាំ២០១៧ របស់លោក ផូង វណ្ណ ចៅក្រមជំនុំជម្រះ នៃសាលាដំបូងខេត្តកណ្តាល កម្លាំងអធិការដ្ឋាននគរបាលស្រុក បានសហការជាមួយកម្លាំងប៉ុស្តិ៍នគរបាលរដ្ឋបាលពុកឬស្សី បានធ្វើការស្រាវជ្រាវ និងបង្ក្រាបឃាត់ខ្លួនជនសង្ស័យម្នាក់ ករណីរំលោភសេពសន្ថវៈ ប្រព្រឹត្តនៅ ភូមិពុកឬស្សីលើ ឃុំពុកឬស្សី ស្រុកខ្សាច់កណ្ដាល ខេត្កកណ្តាល កាលពីថ្ងៃទី១៧ ខែតុលា ឆ្នាំ២០១៦ ។
មន្ត្រីនគរបាលស្រុកខ្សាច់កណ្ដាល បានឲ្យដឹងថា ជនជាប់ចោទឈ្មោះ ឃឺន ចន្ធី ភេទប្រុស អាយុ២០ឆ្នាំ ជនជាតិ ខ្មែរ មុខរបរ កសិករ ទីលំនៅបច្ចុប្បន្ន ភូមិពុកឬស្សីលើ ឃុំពុកឬស្សី ស្រុកខ្សាច់កណ្ដាល ខេត្តកណ្តាល ។ ជនជាប់ចោទត្រូវបាននគរបាលឃាត់ខ្លួន នៅថ្ងៃទី២០ ខែកុម្ភៈ ឆ្នាំ២០២០ កាលពីវេលាម៉ោង៩ព្រឹក ស្ថិតនៅត្រង់ចំណុច ភូមិពុកឬស្សីលើ ឃុំពុកឬស្សី ស្រុកខ្សាច់កណ្តាល ខេត្តកណ្តាល ។
បច្ចុប្បន្នជនសង្ស័យ ត្រូវបានសមត្ថកិច្ចជំនាញកសាងសំណុំរឿង ចាត់ការតាមនីតិវិធី ៕
