បង្ការការឆ្លងជំងឺគ្រុនផ្ដាសាយបក្សីH5N1 ពិសេសខេត្តជាប់ព្រំដែន ខណៈវៀតណាមភាគខាងត្បូងកំពុងផ្ទុះជំងឺនេះ
ភ្នំពេញ៖លោករដ្ឋមន្ត្រីក្រសួងសុខាភិបាល ម៉ម ប៊ុនហេង នៅថ្ងៃទី 26 ខែកុម្ភៈឆ្នាំ 2020 នេះបានចេញសេចក្តី ជូនដំណឹងដល់អភិបាល នៃគណៈអភិបាលរាជធានី ខេត្ត ក្នុងការបង្កើនការប្រុងប្រយ័ត្ន និងមានវិធានការបង្ការការឆ្លងជំងឺគ្រុនផ្ដាសាយបក្សីH5N1។
លោករដ្ឋមន្ត្រីក្រសួងសុខាភិបាល បានថ្លែងថា ស្របពេលជាមួយការជំរុញការអប់រំផ្សព្វផ្សាយព័ត៌មាន និងវិធានការការពារជំងឺកូរ៉ូណា ជូនដល់ប្រជាពលរដ្ឋ នៅក្នុងសហគមន៍ និងជាមួយគ្នានេះ ដោយផ្អែកតាមព័ត៌មានពីខេត្តត្រា ភាគខាងត្បូងនៃសាធារណរដ្ឋសង្គមនិយមវៀតណាម កាលពីថ្ងៃទី 17 ខែកុម្ភៈ ឆ្នាំ 2020 មានផ្ទុះជំងឺគ្រុនផ្ដាសាយបក្សីH5N1នេះ ហើយអាជ្ញាធរវៀតណាម បានកម្ទេចសត្វមាន់ប្រមាណ 5.5000 ក្បាល ក្រសួងសុខាភិបាល សូមឯកឧត្តម លោកជំទាវ អភិបាលនៃគណៈអភិបាលរាជធានី ខេត្ត បង្កើនការប្រុងប្រយ័ត្ននិងធ្វើការណែនាំ អប់រំប្រជាពលរដ្ឋ ដើម្បីបង្ការទប់ស្កាត់ ការឆ្លងជំងឺគ្រុនផ្ដាសាយបក្សីH5N1នេះ មកមនុស្ស ជាពិសេសនៅតាមបណ្ដាខេត្តជាប់ព្រំដែន ជាមួយប្រទេសវៀតណាម ដូចជាខេត្តកណ្ដាល ស្វាយរៀង ព្រៃវែង ត្បូងឃ្មុំ កំពត រតនគិរី មណ្ឌលគិរី កែប និងខេត្តតាកែវ ដោយមិនត្រវទទួលទានសត្វបក្សីឈឺ និងរាល់បសុបក្សីសម្រាប់បរិភោគ ត្រូវចម្អិនឲ្យបានឆ្អិនល្អ។ បើបុគ្គលណាម្នាក់មានគ្រុនក្តៅ លើសពី 38,5 អង្សាសេ ក្អក ពិបាកដកដង្ហើម នឹងមានប្រវត្តិប៉ះពាល់ជាមួយបសុបក្សីឈឺ ឬ ងាប់ក្នុងអំឡុងពេល 14 ថ្ងៃ មុនចេញរោគសញ្ញា សូមទំនាក់ទំនងទូរស័ព្ទទាន់ហេតុការណ៍ 115៕
