សមត្ថកិច្ចចាប់ផ្តើមត្រួតពិនិត្យ អ្នកបើកបរមានជាតិស្រវឹងទូទាំងរាជធានីភ្នំពេញ
ភ្នំពេញ៖ កម្លាំងនគរបាលនឹងចាប់ផ្តើមត្រួតពិនិត្យការបើកបរក្រោមឥទ្ធិពលជាតិស្រវឹង តាមគោលដៅសំខាន់ៗនៅទូទាំងរាជធានីភ្នំពេញ ចាប់ពីថ្ងៃចន្ទនេះ ចាប់ម៉ោង១១យប់ រហូតដល់ម៉ោង២៖៣០នាទីរំលងអធ្រាត្រ។
ស្នងការនគរបាលរាជធានីភ្នំពេញ លោកឧត្តមសេនីយ៍ឯក ស ថេត ធ្លាប់បានបញ្ជាក់ថា វិធានការនេះ ជាការចូលរួមចំណែកក្នុងការទប់ស្កាត់ការ បើកបរក្រោមឥទ្ធិពលជាតិស្រវឹង ដែលជាបច្ច័យមួយនាំឱ្យកើតមានគ្រោះថ្នាក់ចរាចរណ៍ ជាក់ស្ដែងកម្លាំងចម្រុះស្នងការដ្ឋាននគរបាលរាជធានីភ្នំពេញ ដឹកនាំផ្ទាល់ដោយលោកឧត្តមសេនីយ៍ឯក ស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ សហការជាមួយកម្លាំងអធិការដ្ឋានខណ្ឌចំការមន បានចុះដាក់គោលដៅត្រួតពិនិត្យការបើកបរក្រោមឥទ្ធិពលជាតិស្រវឹង ទៅលើអ្នកបើកបរយានយន្តគ្រប់ប្រភេទ និងអ្នកបើកបរទោចក្រយានយន្តទាំងអស់ និងពង្រឹងច្បាប់ចរាចរណ៍ជើងគោក នៅចំណុចមុខអតីតមជ្ឈមណ្ឌលកម្សាន្តរ៉ក់ លើកំណាត់មហាវិថីព្រះមុនីវង្ស សង្កាត់បឹងត្របែក ខណ្ឌចំការមន រាជធានីភ្នំពេញ ហើយការអនុវត្តច្បាប់នេះក្នុងគោលបំណង ដើម្បីការពារអាយុជីវិតរបស់ប្រជាពលរដ្ឋទូទៅប៉ុណ្ណោះ។
យោងតាមមាត្រា ៧៧ថ្មី នៃច្បាប់ស្តីចរាចរណ៍ផ្លូវគោក បានចែងថា ជនណាបើកបរយានយន្តពេលខ្លួនស្ថិតក្រោមឥទ្ធិពលជាតិស្រវឹង ដោយមានជាតិអាល់កុលចាប់ពី ០,៤០មិល្លីក្រាមក្នុងមួយលីត្រខ្យល់ ឬចាប់ពី ០,៨០ក្រាម ក្នុងមួយលីត្រឈាមឡើងទៅ ត្រូវពិន័យជាប្រាក់ ២០ម៉ឺនរៀល សម្រាប់អ្នកបើកបរម៉ូតូ ម៉ូតូកង់បី ឬម៉ូតូសណ្តោងរ៉ឺម៉ក, ៤០ម៉ឺនរៀល សម្រាប់យានយន្តធុនស្រាល និង ៨០ម៉ឺនរៀល សម្រាប់យានយន្តធុនធ្ងន់។
ដោយឡែកជនបើកក្រោមឥទ្ធិពលជាតិស្រវឹង ហើយធ្លាប់ទទួលរងការពិន័យម្តងរួចមកហើយ តែនៅតែបន្តប្រព្រឹត្តខុសក្នុងកំលុងពេល៦ខែរាប់ពីការពិន័យលើកមុននោះ នឹងត្រូវផ្តន្ទាទោសដាក់ពន្ធនាគារពី ១ខែ ទៅ ៦ខែ និងពិន័យជាប្រាក់ពី ៨០ម៉ឺនរៀល ទៅ ៤លានរៀល។
ក្នុងរង្វង់ប្រតិបត្តិការនេះជាក់ស្ដែង កម្លាំងនគរបាល ដោយមានការចួលរួម ពីលោក ឧត្ដមសេនីយ៍ឯក សថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ លោកស្នងការរង ទទួលសន្តិសុខ និងលោក វរសេនីយ៍ឯក យិនសាន អធិការនគរបាលខណ្ឌចំការមន រួមទាំងកម្លាំងចម្រុះជាច្រើនអ្នក បានដាក់គោលដៅ អនុវត្តន៍ច្បាប់ចរាចរណ៍និងជាតិស្រវឹង ជាក់ស្ដែង សមត្ថកិច្ចបានធ្វើការឃាត់ ម៉ូតូ ល្មើសច្បាប់ចរាចរណ៍ ចំនួន៤០ម៉ូតូ ក្នុងនោះមានជាតិស្រវឹង លើកំរិតចំនួន៥គ្រឿង
ហើយក្នុងករណីនេះ ម៉ូតូដែរល្មើសច្បាប់ចរាចរណ៍ សមត្ថកិច្ចត្រូវបានឃាត់ទុករយៈពេល៣ថ្ងៃ ទើបធ្វើការដោះស្រាយជូនវិញ ៕
