រកឃើញករណីជនបរទេស២នាក់ផ្ទុកមេរោគCovid-19 នៅរាជធានីភ្នំពេញ
ភ្នំពេញ៖
ក្រសួងសុខាភិបាលបានប្រកាសនៅព្រលប់ថ្ងៃទី១៣ខែមីនាឆ្នាំ២០២០នេះថាមានអ្នកឆ្លងជំងឺកូវីដ១៩ចំនួន២នាក់បន្ថែមទៀតនៅរាជធានីភ្នំពេញ។
ម្នាក់ជាបុរសជនជាតិកាណាដាអាយុ៤៩ឆ្នាំនិងម្នាក់ទៀតជាបុរសជនជាតិប៊ែលហ្សិកអាយុ៣៣ឆ្នាំ។បុរសបរទេសទាំងពីរនាក់ត្រូវបានយកមកដាក់ឲ្យសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀតក្នុងរាជធានីភ្នំពេញ។
យោងតាមសេចក្តីប្រកាសរបស់ក្រសួងសុខាភិបាលបានឲ្យដឹងថាករណីថ្មីចំនួន២នាក់ទៀត(មិនពាក់ព័ន្ធទៅនឹងនាវីWiking Cruise Journey ទេ) គឺត្រូវបានរកឃើញវិជ្ជមានវីរុសកូវីដ១៩លើបុរសជនជាតិកាណាដាអាយុ៤៩ឆ្នាំនិងបរុសជនជាតិប៊ែលហ្សិកអាយុ៣៣ឆ្នាំនៅរាជធានីភ្នំពេញ(លទ្ធផលចេញនៅវេលាម៉ោង១៦៖០០នាទីរសៀលថ្ងៃទី១៣ខែមីនាឆ្នាំ២០២០) ហើយបុរសវិជ្ជមានវីរុសកូវីដ១៩ទាំងពីរនាក់នោះត្រូវបានយកមកដាក់ឱ្យព្យាបាលនៅមន្ទីរមិត្តភាពខ្មែរ–សូវៀតការងារដែលត្រូវធ្វើបន្តគឺត្រូវស្រាវជ្រាវរកអ្នកដែលប៉ះពាល់ផ្ទាល់ឬប្រយោលជាមួយបុរសជនជាតិកាណាដានិងជនជាតិប៊ែលហ្សិកដែលក្រុ្មការងារសុខាភិបាលកំពុងតែសកម្មធ្វើ។
សូមបញ្ជាក់ថារហូតដល់ពេលនេះកម្ពុជាបានរកឃើញកូវីដ១៩ចំនួន៧ករណីហើយដោយក្នុងនោះមាន៖
ទី១៖បុរសជនជាតិចិនមកពីទីក្រុងវូហាន(ជាសះស្បើយ)
ទី២៖បុរសជនជាតិខ្មែរវ័យ៣៨ឆ្នាំនៅខេត្តសៀមរាប
ទី៣៖ស្រ្តីជនជាតិអង់គ្លេសវ័យ៦៥ឆ្នាំអ្នកដំណើរនាវាViking Cruise Journey នៅខេត្តកំពង់ចាម
ទី៤៖បុរសជនជាតិអង់គ្លេសវ័យ៧៣ឆ្នាំអ្នកដំណើរនាវាViking Cruise Journey នៅខេត្តកំពង់ចាម
ទី៥៖ស្រីជនជាតិអង់គ្លេសវ័យ៦៩ឆ្នាំអ្នកដំណើរនាវាViking Cruise Journey នៅខេត្តកំពង់ចាម។
ទី៦៖ បុរសជនជាតិកាណាដាអាយុ៤៩ឆ្នាំនៅរាជធានីភ្នំពេញ
ទី៧៖បុរសជនជាតិប៊ែលហ្សិកអាយុ៣៣ឆ្នាំនៅរាជធានីភ្នំពេញ៕
