ប្រធានាធិបតីបារាំង ប្រកាសសង្គ្រាមប្រឆាំង COVID-19
ប្រធានាធិបតីបារាំង លោក Emmanuel Macron កាលពីថ្ងៃចន្ទ បានបញ្ជាឲ្យចាត់វិធានការឲ្យតឹងរឹង ដើម្បីរឹតត្បិតលើការធ្វើដំណើររបស់ប្រជាជន ក្នុងគោលបំណងបន្ធូរបន្ថយការរីករាលដាលនៃវីរុសកូរ៉ូណា។
លោកក៏បានលើកឡើងដែរថា កងទ័ពក៏នឹងត្រូវត្រៀមខ្លួន ដើម្បីបញ្ជូនអ្នកជំងឺទៅកាន់មន្ទីរពេទ្យដែរ។
បារាំងបានចាត់វិធានការរួចរាល់ហើយ ដូចជាការបិទភោជនីយដ្ឋាន បារ និងសាលារៀនជាដើម ប៉ុន្តែលោក Macron និយាយថា ត្រូវចាត់វិធានការថ្មីៗបន្ថែមទៀត ខណៈដែលចំនួនអ្នកឆ្លងវីរុសបានកើនឡើងទ្វេដង ក្នុងរយៈពេលរៀងរាល់ ៣ថ្ងៃម្តង ចំណែកអ្នកស្លាប់ក៏មានការកើនឡើង។
ថ្លែងនៅកាន់ប្រជាជាតិ លោក Macron បាននិយាយថា ចាប់ពីថ្ងៃអង្គារពេលថ្ងៃទៅ ប្រជាជនទាំងអស់គួរស្នាក់នៅផ្ទះ លើកលែងតែទៅទិញគ្រឿងបរិភោគ ធ្វើដំណើរទៅធ្វើការ ហាត់ប្រាណ ឬទៅទិញថ្នាំពេទ្យជាដើម។
លោកលើកឡើងថា “ពួកយើងមិនមែនក្រោកឈរតទល់នឹងកងទ័ព ឬប្រជាជាតិណាមួយឡើយ ប៉ុន្តែសត្រូវគឺនៅទីនោះ៖ មើលមិនឃើញ ពិបាកយល់ ប៉ុន្តែវារីករាលដាល”។
លោកថ្លែងបន្តថា ត្រូវចាត់វិធានការតឹងជាងមុន ក្រោយពេលប្រជាជនជាច្រើន មិនបានអើពើនឹងវិធានការដំបូងៗ ហើយពួកគេនៅតែជុំគ្នានៅសួន និងនៅតាមដងផ្លូវ នៅថ្ងៃចុងសប្តាហ៍ ដែលវាគឺជាការប្រថុយប្រថានចំពោះសុខភាពពួកគេ។
សូមបញ្ជាក់ថា វីរុសកូរ៉ូណា បានផ្តាច់ជីវិតមនុស្សចំនួន ១៤៨នាក់ និងឆ្លងទៅកាន់មនុស្សជាង ៦.៦០០នាក់ ក្នុងប្រទេសបារាំង៕