ស្គាល់មុខសញ្ញាជនដៃដល់ចាក់សម្លាប់សន្តិសុខ នៅធនាគារភ្នំពេញ ពាណិជ្ជ (PPC Bank)ព្រឹកមិញហើយ
ភ្នំពេញ៖ តាមរយៈកាមេរ៉ាសុវត្ថិភាព គឺបានបង្ហាញមុខជនដៃដល់ដែលបានចាក់សម្លាប់សន្តិសុខម្នាក់ នៅចំណុចធនាគារភ្នំពេញ ពាណិជ្ជ PPC Bank ស្ថិតនៅតាមបណ្តោយផ្លូវមុនីរ៉េត ក្នុងសង្កាត់ទួលស្វាយព្រៃទី២ ខណ្ឌបឹងកេងកង រាជធានីភ្នំពេញ នាព្រឹកថ្ងៃទី១៩ ខែមីនា ឆ្នាំ២០២០ ។
សង្ឃឹមថាសមត្ថកិច្ចនឹងចាប់ខ្លួនបាន នាពេលឆាប់ៗខាងមុខនេះ ពេលឃើញពីសកម្មភាពជនសង្ស័យ មុនធ្វើសកម្មភាព ជិៈកង់ និងកាន់កាំបិតចុងស្រួច ចូលមកចាក់ជនរងគ្រោះ។
សមត្ថកិច្ច បានអះអាងថា សពមានឈ្មោះ ប៊ុន សុខចំរើន ភេទប្រុស អាយុជាង៤៦ឆ្នាំ មានមុខរបរសន្ដិសុខឯកជន ស្នាក់នៅសង្កាត់ស្ទឹងមានជ័យទី២ ខណ្ឌមានជ័យ មានប្រពន្ធនិងកូនៗចំនួន៦នាក់ ។
តាមប្រភពព័ត៌មានពីប្រជាពលរដ្ឋ នៅជិតកន្លែងកើតហេតុ បានអោយដឹងថា ៖ ជនរងគ្រោះគឺជាសន្តិសុខឯកជន ដែលមកធ្វើការនៅធនាគារនៅកន្លែងកើតហេតុទើបតែបានជាង១ខែ និង តែងតែឃើញមានមិត្តភក្តិ ឧស្សាហ៍មកលេង និងផឹកស៊ី ដល់យប់ជ្រៅ ។
លុះមកដល់ព្រឹកកើតហេតុ ក៏ស្រាប់តែផ្អើលឆោឡោឡើង នៅខាងមុខធនាគារ ភ្នំពេញ ពាណិជ្ជ (PPC Bank) និង បានឃើញជនរងគ្រោះដេកស្លាប់ក្នុងថ្លុកឈាម ថែមទាំងមានស្នាមកាំបិត ចាក់ចំដើមទ្រូងតែម្តង ។
ពាក់ព័ន្ធករណីនេះ សមត្ថកិច្ចមូលដ្ឋាន មិនទាន់បានបញ្ជាក់ថាជា ករណីអ្វីនៅឡើយទេ ដោយសមត្ថកិច្ចជំនាញកំពុងស្រាវជ្រាវបន្តសិន ។
ក្រោយពេលកើតហេតុកម្លាំងសមត្ថកិច្ចផ្នែកកោសល្យវិច័យ បានយកសពទៅធ្វើកោសល្យវិច័យនៅវត្តស្ទឹងមានជ័យនិងប្រគល់សពជូនក្រុមគ្រួសារដើម្បីយកទៅធ្វើបុណ្យតាមប្រពៃណី។
បើទោះជាសមត្ថកិច្ចមិនទាន់ប្រាប់ពីមុខសញ្ញាជនសង្ស័យជាឃាតក ក៏ដោយ ចៀសវាងប៉ៈពាល់ដល់ដំណើរការនីតិវិធីនោះ ក៏គេអាចសន្និដ្ឋានថា សមត្ថកិច្ចអាចក្តោបមុខសញ្ញានេះបាន ឈានដល់ការស្វែងរកចាប់ខ្លួនយកមកផ្តន្ទាទោស៕
