នគរបាលបង្ក្រាបរថយន្តដឹកឈើ ២គ្រឿង
កំពង់ស្ពឺ ៖ ស្នងការដ្ឋានគរបាលខេត្តកំពង់ស្ពឺ បានចេញរបាយការណ៍ករណីនគរបាល រួមចំណែកក្នុងការបង្ការ បង្ក្រាបបទល្មើសព្រៃឈើ និងរឹបអូសយកវត្ថុតាងបញ្ជូនទៅរដ្ឋបាលព្រៃឈើ ផាកពិន័យតាមច្បាប់ ដើម្បីបង្កើនចំណូលថវិកាជាតិ។
ក្រោមការបញ្ជាដឹកនាំពីរលោកឧត្ដមសេនីយ៍ទោ សម សាមួន ស្នងការនគរបាលខេត្ត បានដាក់ចេញបទបញ្ជាឱ្យជំនាញការិយាល័យប្រឆាំងបទល្មើសេដ្ឋកិច្ចខេត្ត និងអធិការដ្ឋាននគរបាលក្រុង ស្រុក ត្រូវយកចិត្ដទុកដាក់ចូលរួមអនុវត្ដន៍បង្ក្រាបបទល្មើសព្រៃឈើ បទល្មើសធនធានធម្មជាតិ ឲ្យមានប្រសិទ្ធភាពខ្ពស់ ជាក់ស្ដែង ។
កាលពីថ្ងៃសុក្រ វេលាម៉ោង២០ និង៣០នាទីថៃ្ងទី ២៧ ខែមីនា ឆ្នាំ២០២០ នៅចំណុចផ្លូវកោងស្ថិតក្នុងភូមិអូរផ្តៅ ឃុំរស្មីសាមគ្គី ស្រុកឱរ៉ាល់ ខេត្តកំពង់ស្ពឺ កម្លាំងនគរបាល ដឹកនាំដោយលោកវរសេនីយ៍ឯក ប៊ុត ប៊ុនធឿន អធិការនគរបាលស្រុកឱរ៉ាល់ រួមមានកម្លាំងប៉ុស្តិ៍នគរបាលរដ្ឋបាលរស្មីសាមគ្គី បានឃាត់រថយន្តដឹកឈើខុសច្បាប់មួយគ្រឿង ម៉ាក TITAN ប្រភេទ ទម្ងន់ ២តោនកន្លះ
ពណ៌ខៀវ ពាក់ផ្លាកលេខ ឆ ១៤៩៥- ភព២ អ្នកបើកបរ រត់គេចខ្លួនពេលសមត្ថកិច្ចប្រតិបត្ដិការ។
តាមការបញ្ជាក់ពីលោក វរសេនីយ៍ឯក ប៊ុត ប៊ុនធឿន អធិការស្រុកឱរ៉ាល់ ថាករណីរថយន្ដដឹកឈើនេះ គឺបានដឹកចូលមកក្នុងភូមិសាស្ដ្រស្រុកឱរ៉ាល់ តាំងពីថៃ្ងទី២៦ ខែមីនា ឆ្នាំ២០២០ ប៉ុន្តែបានធ្វើការលាក់ទុកក្នុងព្រៃដើម្បីបន្លំភ្នែកសមត្ថកិច្ច
មុនបន្ដដំណើរទៅមុខទៀត ប៉ុន្តែដោយសារកម្លាំងលោកមានជំនាញច្បាស់ “កម្លាំសម្ងាត់” ឈ្មួញរកស៊ីដូចគ្នា ប៉ុន្តែត្រូវបានកែខ្លួនបញ្ឈប់សកម្មភាពយូរឆ្នាំ និងងាកមកស្រឡាញ់បរិស្ថានព្រមទាំងស្ម័គ្រចិត្ដ សហការជាមួយសមត្ថកិច្ច ដើម្បីចូលរួមទប់ស្កាត់ ការពារធនធានធម្មជាតិ បរិស្ថាននៅកម្ពុជាប្រកបដោយចីរភាព ឱ្យមានសក្ដានុពលទៅថៃ្ងអនាគត លើផ្នែកអេកូទេសចរណ៍ រក្សាបានកម្ដៅភពផែនដី និងឧស្ម័នផ្ទះកញ្ចក់ ។
អនុផលព្រៃឈើ ដែលសមត្ថកិច្ចចាប់បានគឺឈើប្រភេទ ឃ្នាប មានចំនួនសរុប ៦,២៧៦ ម៉ែត្រគូប និងឈើដុលឡាំងជ្រុង ប្រភេទ ឈើរាជផ្កុលហៅម្រេញ ជាច្រើនកំណាត់ បច្ចុប្បន្ន សមត្ថកិច្ចបានកសាងសំណុំរឿងអ្នកពាក់ព័ន្ធ (អញ្ញាតជន)ជាម្ចាស់ ចំណែកឈើបានប្រគល់ជូនរដ្ឋបាលព្រៃឈើដើម្បីចាត់ការតាមនីតិវិធី ។ សូមបញ្ជាក់ ករណីទាំង២ខាងលើក ត្រូវបានបញ្ជូនទៅរដ្ឋបាលព្រៃឈើទាំងអស់៕
