អាមរិក អ៊ីតាលី និងអេស្ប៉ាញ មានមនុស្សស្លាប់ដោយសារវីរុស Covid-19 ក្នុងចន្លោះពី ៧០០ ទៅ ៨០០នាក់ ក្នុងមួយថ្ងៃ
បរទេស៖ លោក អាន់តូនី ហ្វ៊ូស៊ី (Anthony Fauci) អ្នកជំនាញផ្នែកជំងឺឆ្លង និងជាទីប្រឹក្សាផ្នែកសុខភាព នៅសេតវិមាន សហរដ្ឋអាមេរិក បាននិយាយថា សហរដ្ឋអាមេរិក ប្រទេសអ៊ីតាលី និងអេស្ប៉ាញ មានចំនួនមនុស្សស្លាប់ដោយសារវីរុស Covid-19 ក្នុងចន្លោះពី ៧០០ ទៅ ៨០០នាក់ ក្នុងមួយថ្ងៃ ដែលមានន័យថា មនុស្សម្នាក់បានស្លាប់រៀងរាល់ ២នាទី ដែលនេះបើតាមការចុះផ្សាយរបស់ CNA ។
ក្នុងរយៈពេល ២៤ម៉ោង ក្នុងចន្លោះពីថ្ងៃអង្គារ ដល់ព្រឹកថ្ងៃពុធ ទី០១ ខែមេសា ឆ្នាំ២០២០នេះ នៅសហរដ្ឋអាមេរិក មានមនុស្សស្លាប់ចំនួន ៣,៨៥០នាក់ ដោយបូកបន្ថែមមនុស្សស្លាប់ថ្មីចំនួន ៧០៩នាក់ នៅអ៉ីតាលីមានមនុស្សស្លាប់ ១២,៤២៨នាក់ ដោយបូកបន្ថែមមនុស្សស្លាប់ថ្មីចំនួន ៨៣៧នាក់ និងនៅប្រទេសអេស្ប៉ាញ មានមនុស្សស្លាប់ ៨,៤៦៤នាក់ ដោយបូកបន្ថែមមនុស្សស្លាប់ថ្មីចំនួន ៧៤៨នាក់ ។
សូមបញ្ជាក់ជូនថា សហរដ្ឋអាមេរិកឈរក្នុងលំដាប់លេខ១ នៅលើពិភពលោក ដែលមានមនុស្សឆ្លងវីរុស Covid-19 ច្រើនជាងគេ បន្ទាប់មកគឺប្រទេសអ៉ីតាលី អេស្ប៉ាញ ចិន អាល្លឺម៉ង់ បារាំង អង់គ្លេស និងប្រទេសស្វីស៕
