ថ្ងៃនេះ គ្មានអ្នកកើតជំងឺកូវីដ១៩ និងជាសះស្បើយ១៥នាក់ថ្មីទៀត
ភ្នំពេញ៖ នៅថ្ងៃទី៤ខែមេសានេះ ក្រសួងសុខាភិបាល បានចេញប្រកាសនូវដំណឹងថា នៅថ្ងៃទី៣មេសា មិនមានករណីវិជ្ជមានវីរុសកូវីដ១៩ថ្មីនោះទេ។ ក្រសួងដដែល បានប្រកាសទៀតថា អ្នកជំងឺកូវីដ១៩ បានជាសះស្បើយរហូតដល់ ១៥នាក់ថ្មីទៀត ធ្វើឲ្យចំនួនអ្នកជាសះស្បើយកើនឡើងរហូតដល់៤៩នាក់ ។
ក្រុមការងាររបស់ក្រសួងសុខាភិបាល កំពុងតែធ្វើកិច្ចការស្រាវជ្រាវករណីថ្មីជាបន្តទៀត ហើយនឹងបន្តជម្រាបជូនដល់បងប្អូនសាធារណជន ប្រសិនបើមានរកឃើញវិជ្ជមានវីរុសកូវីដ១៩ថ្មី ណាផ្សេងទៀត។
ក្រសួងសុខាភិបាល បានលើកឡើងថា គិតត្រឹមម៉ោង៧ព្រឹកថ្ងៃទី៤មេសានេះ ស្ថានភាពជំងឺកូវីដ១៩ នៅកម្ពុជា មាន ៖ អ្នកព្យាបាលជាសះស្បើយ សរុបចំនួនកើនដល់ ៤៩នាក់ (ស្នើនឹង៤២,៩៨ភាគរយ ធៀបនឹងចំនួនអ្នកមានវីរុសកូវីដ១៩ទាំងអស់) ដែលមានសរុបជនជាតិចិន ១នាក់ ស្ត្រីជនជាតិអង់គ្លេស២នាក់ បុរសជនជាតិអង់គ្លេស១នាក់ បុរសជនជាតិបែលហ្ស៊ិក១នាក់ បុរសជនជាតិបារាំង ៨នាក់ (ក្នុងនេះ មានទារកអាយុ៨ខែ) ស្ត្រីជនជាតិបារាំង៩នាក់ បុរសជនជាតិម៉ាឡេស៊ី៣នាក់ បុរសជនជាតិខ្មែរ ២៣នាក់ និងស្ត្រីជនជាតិខ្មែរ ១នាក់ (គិតចាប់ពីខែមករា ដល់បច្ចុប្បន្ននេះ)។ ចំណែកអ្នកកំពុងសម្រាកព្យាបាលជំងឺកូវីដបានថយចុះមកត្រឹមចំនួន៦៥នាក់ នៃអ្នកឆ្លងសរុប១១៤នាក់ ដែលកំពុងសម្រាកព្យាបាល នៅមន្ទីរពេទ្យរដ្ឋនៅថ្នាក់ជាតិ និងថ្នាក់ខេត្ត។
