អ្នកស្លាប់កើនលើស ១០០.០០០នាក់ និងឆ្លងជិត ១.៧០០.០០០នាក់
ចំនួនអ្នកស្លាប់ដោយសារវីរុសកូរ៉ូណាទូទាំងពិភពលោក បានកើនឡើងលើស ១០០.០០០នាក់នៅថ្ងៃសុក្រនេះ (ថ្ងៃសៅរ៍នៅកម្ពុជា) ខណៈដែលអ្នកឆ្លងសរុបមានជិត ១.៧០០.០០០នាក់។
ប្រទេសចិន ដែលជាកន្លែងផ្ទុះនៃវីរុសដ៏កាចសាហាវនេះ មានស្ថានភាពធូរស្រាលខ្លាំង និងមានការឆ្លងថ្មីក្រោម ១០០ករណីក្នុងមួយថ្ងៃ ដោយភាគច្រើនជាការឆ្លងមកពីប្រភពខាងក្រៅ ខណៈដែល អាមេរិច អ៊ីតាលី អាឡឺម៉ង បារាំង អង់គ្លេស និងអ៊ីរ៉ងជាដើម កំពុងតែមានការរាតត្បាតខ្លាំង និងមានអ្នកឆ្លងរាប់សែននាក់ និងស្លាប់រាប់ម៉ឺននាក់។
ប្រទេសជាច្រើនដែលកំពុងរងការវាយប្រហារ ពីវីរុសបានប្រកាសបិទព្រំដែន ជើងហោះហើរ និងប្រទេស ដោយចាត់វិធានការឲ្យប្រជាជនស្នាក់នៅតែផ្ទះ ដើម្បីទប់ស្កាត់ការរីករាលដាលថ្មី។
ចំណែកចិន ដែលបានធូរស្រាលពីវីរុសកូរ៉ូណា បានប្រកាសដកបម្រាមដើរហើរចេញ និងអនុញ្ញាតឲ្យប្រជាជន នៅក្នុងទីក្រុងវូហាន ធ្វើការដើរហើរបានធម្មតាវិញ។
នៅថ្ងៃសុក្រនេះដែរ ប្រធានអង្គការសុខភាពពិភពលោក បានធ្វើការព្រមានពីការដកវិធានការ រឹតបន្តឹងក្នុងប្រទេស។
លោក Tedros Adhanom Ghebreyesus លើកឡើងថា “ការដកការរឹតបន្តឹងឡើងវិញលឿនពេក អាចបណ្តាលឲ្យមានការស្លាប់ឡើងវិញ។ ផ្លូវចុះក្រោមអាចមានគ្រោះថ្នាក់ដូចផ្លូវឡើងលើដែរ ប្រសិនជាគ្រប់គ្រងមិនបានល្អ”។
ប្រទេសមួយចំនួន ជាពិសេសនៅក្នុងតំបន់អាស៊ី មានការព្រួយបារម្ភពីលទ្ធភាពនៃការឆ្លងវីរុសពីប្រភពខាងក្រៅឡើងវិញ ពីការធ្វើដំណើរចូលស្រុកវិញរបស់ប្រជាជនពួកគេ។
សូមបញ្ជាក់ថា វីរុសកូរ៉ូណា ឬ COVID-19 បានផ្ទុះឡើងដំបូងពីទីក្រុងវូហាន ប្រទេសចិន កាលពីចុងឆ្នាំ ២០១៩ និងបានរីករាលដាលយ៉ាងលឿនទៅកាន់ប្រទេសទូទាំងពិភពលោក៕
