ល្បីថា មេដឹកនាំក្រុងព្យុងយ៉ាង គីម ជុងអ៊ុន ឈឺធ្ងន់ធ្ងរ
ពាក្យចចាមអារាមជាច្រើនដែលថា មេដឹកនាំកូរ៉េខាងជើង គីម ជុងអ៊ុន ឈឺធ្ងន់បន្ទាប់ពីការវះកាត់បេះដូង គឺជាព័ត៌មានមិនពិត។
លោក គីម ជុងអ៊ុន មានជំងឺធ្ងន់ធ្ងរ “ស្លាប់ខួរក្បាល” ឬ “ជាសះស្បើយពីការវះកាត់” គឺតែងតែមិនអាចបញ្ជាក់បាននោះទេ។ ប៉ុន្តែការិយាល័យប្រធានាធិបតីនៅទីក្រុងសេអ៊ូល បាននិយាយថា មិនមានសញ្ញាជាក់លាក់ណាមួយពីខាងកូរ៉េខាងជើង ដើម្បីបង្ហាញថា មេដឹកនាំវ័យក្មេងអាយុ ៣៦ ឆ្នាំ រូបនេះ មានជំងឺធ្ងន់ធ្ងរនោះទេ។
នេះមិនមែនជាលើកទីមួយទេ ដែលគេបង្កើតពាក្យចចាមអារាមអំពីសុខភាពរបស់ គឹម ជុងអ៊ុន បានធ្វើឱ្យមានការភ្ញាក់ផ្អើលយ៉ាងខ្លាំងដែលមិននឹកស្មាន តែក្រោយៗមក ក៏ត្រូវបានគេបំភ្លេចចោល។
កាលថ្មីៗនេះ លោក គីម ជុងអ៊ុន ត្រូវបានគេកត់ស្គាល់ថា បានខកខានការប្រារព្ធខួបកំណើត ជីតារបស់លោក កាលពីថ្ងៃទី១៥ ខែមេសា ជាព្រឹត្តិការណ៍ដ៏ធំបំផុតមួយប្រចាំឆ្នាំ ដែលរម្លឹកថ្ងៃខួបកំណើតនៃស្ថាបនិករបស់ប្រទេសនេះ។
គីម ជុងអ៊ុន មិនដែលខកខានសម្រាប់ព្រឹត្តិការណ៍នេះទេ ហើយវាហាក់ដូចជាមិនទំនងទេ ដែលថាគាត់នឹងជ្រើសរើស មិនបង្ហាញវត្តមាននោះ។ ពិតណាស់ហើយ អវត្តមានរបស់គាត់ បានជំរុញឲ្យមានការគិតស្មាន និងពាក្យចចាមអារាមនេះឡើង ។
លោក គីម ជុងអ៊ុន បានបង្ហាញខ្លួនចុងក្រោយនៅក្នុងប្រព័ន្ធផ្សព្វផ្សាយរដ្ឋ កាលពីថ្ងៃទី១២ ខែមេសា ដើម្បីចូលរួម “ត្រួតពិនិត្យក្រុមយន្ដហោះតាមប្រដេញវាយប្រហារមួយ” នៅក្នុងឯកសារដែលមិនត្រូវបានបញ្ជាក់ពេលវេលា។
ពាក់ព័ន្ធករណីនេះ លោកប្រធានាធិបតី Trump បាននិយាយកាលពីថ្ងៃអង្គារថា បានសម្តែងនូវការភ្ញាក់ផ្អើលថា លោកមិនដឹងថាតើមេដឹកនាំកូរ៉េខាងជើងលោក គីម ជុងអ៊ុន មានជំងឺដែរ ឬយ៉ាងណានោះទេ ប៉ុន្តែបានជូនពរឱ្យលោកមានសំណាងជាមួយនឹងជំងឺដែលអាចកើតមាន។
លោក Trump បាននិយាយថា “ខ្ញុំគ្រាន់តែអាចនិយាយបានថា ខ្ញុំសូមជូនពរដល់គាត់ប៉ុណ្ណោះ” ។
លោក Trump បានប្រាប់អ្នកយកព័ត៌មានថា “ទាំងនេះគឺជារបាយការណ៍ដែលចេញមកហើយៗ យើងក៏មិនដឹងដែរទេ” ។
ទូរទស្សន៍ CNN បានរាយការណ៍នៅល្ងាចថ្ងៃចន្ទថា មន្ត្រីអាមេរិកកំពុងឃ្លាំមើលការស៊ើបការណ៍សម្ងាត់ ដែលបង្ហាញថា មេដឹកនាំកូរ៉េខាងជើងអាយុ ៣៦ ឆ្នាំ រូបនេះកំពុងស្ថិតក្នុងគ្រោះថ្នាក់ដ៏ធ្ងន់ធ្ងរដែរឬយ៉ាងណា? បន្ទាប់ពីទទួលការវះកាត់។
ប៉ុន្តែរដ្ឋាភិបាលកូរ៉េខាងត្បូងកាលពីថ្ងៃអង្គារ បាននិយាយថា មិនមានសញ្ញាប្លែកណាមួយដែលបង្ហាញថាលោក គីម មានជំងឺនោះទេ៕
