អាមេរិចចង់បន្ថយការផ្តល់ជំនួយ ដល់ WHO ពី ៤៥០លានដុល្លាមកត្រឹម ៤០លានដុល្លារ
ប្រធានាធិបតីអាមេរិច ដូណាល់ ត្រាំ បានធ្វើការវាយប្រហារស្ថាប័នសុខភាពរបស់អង្គការសហប្រជាជាតិ ដោយបានហៅអង្គការសុខភាពពិភពលោក (WHO)ថាជា “អាយ៉ងរបស់ចិន” កាលពីថ្ងៃចន្ទ និងបានធ្វើការបញ្ជាក់ថា លោកកំពុងពិចារណាកាត់ផ្តាច់ជំនួយ ឬលុបចោលការគាំទ្ររបស់អាមេរិចចំពោះស្ថាប័ននោះ។
លោកថ្លែងនៅសេតវិមានថា “ពួកគេជាអាយ៉ងរបស់ចិន”។
លោកត្រាំ ថ្លែងទៀតថា សហរដ្ឋអាមេរិចបានផ្តល់ជំនួយប្រហែល ៤៥០លានដុល្លារជារៀងរាល់ឆ្នាំ ទៅដល់អង្គការសុខភាពពិភពលោក ដែលវាគឺជាការផ្តល់ជំនួយដ៏ច្រើនបំផុតជាងប្រទេសណាៗទាំងអស់។ លោកថា ផែនការកំពុងត្រូវរៀបចំដើម្បីផ្តាច់ជំនួយទាំងនោះ ដោយសារតែពួកគេប្រព្រឹត្តិលើពួកយើងមិនត្រឹមត្រូវ។
លោកបញ្ជាក់ថា “ពួកគេបានផ្តល់យោបល់អាក្រក់ជាច្រើនដល់ពួកយើង”។
ការថ្លែងរបស់លោក កើតឡើងចំពេលដែលអង្គការសុខភាពពិភពលោក កំពុងតែរៀបចំសន្និបាតប្រចាំឆ្នាំ ដើម្បីពិភាក្សាទៅលើវិធានការដើម្បីដោះស្រាយវិបត្តិ COVID-19 ដែលកំពុងញាំញីអាមេរិចធ្ងន់ធ្ងរជាងគេ។
លោក និយាយថា ចិនផ្តល់ទឹកប្រាក់ប្រមាណ ៤០លានដុល្លារក្នុងមួយឆ្នាំដល់អង្គការសុខភាពពិភពលោក ហើយមានគំនិតមួយសម្រាប់ទីក្រុងវ៉ាស៊ីនតោនដើម្បីបន្ថយទឹកប្រាក់ ៤៥០ លានដុល្លារឲ្យធ្លាក់មកត្រឹម ៤០ លានដុល្លារ ប៉ុន្តែនៅតែមានអ្នកខ្លះគិតថា វាគឺច្រើនខ្លាំងណាស់។ លោកចង់សំដៅថា អាមេរិចចង់បន្ថយការផ្តល់ជំនួយពី ៤៥០លានដុល្លាមកត្រឹម ៤០លានដុល្លារ៕
