ឃ្លានទុរេនខ្លាំងពេក ក្មេងប្រុស ជំទង់បីនាក់លូច បេះទុរេនបាន១ផ្លែត្រូវម្ចាស់ចម្ការដេញចាប់ បានទា១០០០ដុល្លារ
កំពត ៖ វាពិតហួសហេតុពន្ធពែកហើយ ខណៈដែលក្មេងប្រុសជំទង់បីនាក់ លួចបេះផ្លែទុរេនគេត្រឹមតែ១ផ្លែ ទម្ងន់ប្រមាណ២គីឡូក្រាម ហើយត្រូវម្ចាស់ចម្ការទុរេនដេញចាប់បាន ប្រគល់ឲ្យប៉ូលិសនិងបានទារសំណងរហូតដល់១ពាន់ដុល្លារនោះ។
ករណីចោរកម្មលួចទុរេន១ផ្លែនេះបានកើតឡើងកាលពីព្រឹកថ្ងៃទី២៥ ខែឧសភា ឆ្នាំ២០២០ ត្រង់ចំណុចចម្ការទុរេនមួយកន្លែង ស្ថិតក្នុងភូមិសាស្ត្រភ្នំវល្លិ៍ ជាប់ព្រំប្រទល់រវាងខេត្តកែប និងខេត្តកំពត។
យោងតាមប្រភពពីសមត្ថកិច្ចបានឲ្យដឹងថា កាលពីវេលាខាងលើ ក្មេងជំទង់បីនាក់រួមមាន ៖
ទី១-ឈ្មោះ ល ត ភេទប្រុស អាយុ១៦ឆ្នាំ ជាសិស្ស ,២-ឈ្មោះ ស ឯ ភេទប្រុស អាយុ១៦ឆ្នាំ ជាសិស្ស និងទី៣-ឈ្មោះស ច ភេទប្រុស អាយុ១៥ឆ្នាំ ជាសិស្ស អ្នកទាំងបីមានទីលំនៅភូមិកណ្តាលទួល ឃុំកំពង់ត្រាចខាងលិច ស្រុកកំពង់ត្រាច បានទៅស៊ីឈ្នួលបេះម្រេចឲ្យគេនៅភូមិសាស្ត្រកើតហេតុ។ លុះបន្តិចក្រោយមក ក្មេងប្រុសទាំងបីនាក់បានជិះម៉ូតូបំណងទៅចាក់សាំង ហើយក៏ឃើញផ្លែទុរេនក្នុងចម្ការគេក្បែរនោះ ក៏ចូលទៅលួចបេះ១ផ្លែ បំណងហែកចែកគ្នាហូប ស្រាប់តែម្ចាស់គេឃើញ ក៏ស្រែកឆោឡោតែម្ដង។
សមត្ថកិច្ចបានបន្តថា ពេលដឹងថាម្ចាស់គេឃើញក្មេងទាំងបីនាក់ក៏ជិះម៉ូតូឌុបគ្នាគេចខ្លួន តែត្រូវអ្នកយាមចម្ការទុរេនដេញតាមរហូតមកដល់ផ្ទះរបស់ក្មេងទាំងបីនាក់នៅភូមិកណ្តាលទួល ឃុំកំពង់ត្រាចខាងលិច ស្រុកកំពង់ត្រាច ខេត្តកំពតហើយចាប់ប្រគល់ជូនសមត្ថកិច្ចឲ្យជួយចាត់ការ ខណៈម្ចាស់ចម្ការទុរេនទារសំណងផ្លែទុរេនមួយផ្លែ គឺ ១ពាន់ដុល្លារស្មើនឹង ៤,០០០,០០០រៀល ឯណោះ។
បច្ចុប្បន្ន ក្មេងប្រុសជំទង់បីនាក់ដែលពាក់ព័ន្ធនឹងករណីលួចផ្លែទុរេនគេ១ផ្លែ សមត្ថកិច្ចកំពុងចាត់ការតាមនីតិវិធី។
ទាក់ទិននឹងរឿងរ៉ាវខាងលើ មតិមហាជនជាច្រើនបានលើកឡើងថា ករណីចោរកម្ម គឺជាបទល្មើសមួយដែលត្រូវចាត់ការតាមផ្លូវច្បាប់ដោយមិនអាចលើកលែង។ ប៉ុន្តែករណីចោរកម្មតូចតាច ត្រឹមតែលួចបេះផ្លែទុរេនគេ១ផ្លែ ទម្ងន់មិនបាន២គីឡូក្រាមផង បែរជាម្ចាស់ចម្ការទារសំណងរហូតដល់ទៅ១ពាន់ដុល្លារអាមេរិក គិតទៅទុរេនមួយផ្លែដូចជាថ្លៃពេកហើយ៕