ទីកន្លែងលួចប្រព្រឹត្តិល្បែងទឹកភ្លៀង នៅក្រុងបាត់ដំបង ត្រូវសមត្ថកិច្ចនគរបាលចុះបង្ក្រាប
បាត់ដំបង៖ កាលពីថ្ងៃ សុក្រ ទី ៣ ខែ កក្កដា ឆ្នាំ២០២០ វេលាម៉ោង ១៤និង៣០នាទី ឯកឧត្តម ឧត្តមសេនីយ៍ទោ អ៊ុច សុខុន ស្នងការនៃស្នងការដ្ឋាននគរបាលខេត្តបាត់ដំបង បានដាក់បទបញ្ជាដល់លោកវរសេនីយ៍ទោ លឹម ពុទ្ធីឡា ស្នងការរងផែនការងារនគរបាលព្រហ្មទ័ណ្ឌ ឱ្យដឹកនាំកម្លាំងក្នុងផែនចេញប្រតិបត្តិការបង្ក្រាបទីតាំងលួចប្រ ព្រឹត្តិល្បែងទឹកភ្លៀងមួយកន្លែងនៅចំណុចវាល ស្រែភូមិចំការសំរោង២ សង្កាត់ចំការសំរោង ក្រុងបាត់ដំបង ខេត្តបាត់ដំបង ។
លោកវរសេនីយ៍ទោ លឹម ពុទ្ធីឡា ស្នងការរង ផែនការងារនគរបាលព្រហ្មទណ្ឌ ដែលដឹកនាំកិច្ចប្រតិបត្តិការនេះបានឱ្យដឹងថា ដោយសារភូមិសាស្ត្រចំណុចនោះស្ថិតនៅទីវាល ហើយពេលសមត្ថកិច្ចទៅដល់អ្នកប្រព្រឹត្តិបានរត់គេចខ្លួនពីទីកន្លែងនោះ តែសមត្ថកិច្ចបាននាំខ្លួនបុរសចំនួន០៣នាក់កំពុងស្ថិតនៅបរិវណនោះមកធ្វើការសាកសួរ ក្រៅពីនោះមានបន្សល់ទុកនូវភស្តុតាងមួយចំនួនរួមមាន៖- សម្ភារៈកែច្នៃ ( ទទឹកភ្លៀង ) ០១- វិទ្យុទាក់ទង ចំនួន ០៦ គ្រឿង- ឆ្នាំងសាកវិទ្យុទាក់ទង ចំនួន ០៣គ្រឿង – ម៉ូតូម៉ាកហុងដាឌ្រីម សេ ១២៥ ពណ៌ខ្មៅ ចំនួន ០២គ្រឿង ។
លោកស្នងការរងបញ្ជាក់ថា ទោះបីជាអ្នកប្រព្រឹត្តិ មួយចំនួនបានគេចខ្លួនពីទីតាំងនោះមែនប៉ុន្តែសមត្ថកិច្ចនគរបាលបន្តស្រាវជ្រាវកំណត់ពីអត្តសញ្ញាណខ្លះនៃអ្នកប្រព្រឹត្តិនោះហើយ ដែលកិច្ចការនេះសមត្ថកិច្ចលោកនឹងស្នើសុំគោលការណ៍ថ្នាក់ដឹកនាំស្នងការដើម្បីចាត់វិធានការបន្តជាមួយនេះដែរទីតាំងមួយនេះត្រូវបានសមត្ថកិច្ចរុះរើបំផ្លាញចោលនូវសម្ភារ:មួយចំនួន។
ទាក់ទងនឹងករណីល្បែងទឹកភ្លៀងដែលបណ្តាញសារព័ត៌មាននិងបណ្តាញសង្គមតែងលើកឡើងថាមានការអនុញ្ញាតឱ្យលេងឬមិនមានវិធានការបង្ក្រាបនោះឯកឧត្តម ឧត្តមសេនីយ៍ទោ អ៊ុច សុខុន ស្នងការនៃស្នងការដ្ឋាននគរបាលខេត្តបាត់ដំបងធ្លាប់បានបញ្ជាក់ជូនហើយថា ឯកឧត្តមនឹងចាត់វិធានការបង្ក្រាបបើករណីនេះកើតមានក្នុងមូលដ្ឋាន៕
