គិតត្រឹមម៉ោង ៧ព្រឹកនេះ កម្ពុជាមានអ្នកឆ្លងជំងឺកូវីដ ១៩ ថ្មី ចំនួន ១៥នាក់ទៀត ទើបមកពីប្រទេសអារ៉ាប់ប៊ីសាអូឌី
ភ្នំពេញ ៖ បើយោងតាមសេចក្តីប្រកាសព័ត៌មាន របស់ក្រសួងសុខាភិបាល ត្រឹមម៉ោង ៧:០០ព្រឹក ថ្ងៃទី១២ ខែកក្កដា ឆ្នាំ២០២០ នេះ កម្ពុជារកឃើញមានអ្នកឆ្លងជំងឺកូវីដ ១៩ ថ្មី ចំនួន ១៥នាក់បន្ថែមទៀត ។
អ្នកជាសះស្បើយទូទាំងប្រទេស ចំនួន ១៣៣នាក់ ។ អ្នកកំពុងសម្រាកព្យាបាល ចំនួន ២៣នាក់។ អ្នកឆ្លងជំងឺកូវីដ ១៩ ទូទាំងប្រទេស ចំនួន ១៥៦នាក់។
សូមពុកម៉ែ បងប្អូនប្រជាពលរដ្ឋទាំងអស់ រួមគ្នាការពារ ទប់ស្កាត់ និងបង្ការពីការរាតត្បាត នៃជំងឺកូវីដ ១៩ ដោយអនុវត្តតាមវិធានអនាម័យរបស់ក្រសួងសុខាភិបាល លាងដៃជាមួយសាប៊ូ ឬអាល់កុល ឬជែល និងត្រូវថែរក្សាសុខភាពឲ្យបានជាប្រចាំ ។
តាមសេចក្ដីប្រកាសព័ត៌មានបានបញ្ជាក់ថា អ្នកដំណើរមកពីប្រទេសអារ៉ាប់ប៊ីសាអូឌី ១៥នាក់ មានលទ្ធផលតេស្ត វិជ្ជមានវីរុសកូវីដ-១៩ ក្នុងចំណោមអ្នកដំណើរសរុបចំនួន ៩៤នាក់។
បុរសទាំង១៥នាក់ ជាអ្នកធ្វើដំណើរមកពីប្រទេសអារ៉ាប់ប៊ីសាអូឌី បន្តជើងហោះហើរពីប្រទេសម៉ឡេស៊ី មកដល់កម្ពុជា កាលពីថ្ងៃទី១០ ខែកក្តដា ឆ្នាំ២០២០ វេលាម៉ោង១៧:២៥នាទីល្ងាច ហើយធ្វើការវិគាគវត្ថុសំណាកដោយវិទ្យាស្ថានប៉ាស្ទ័រកម្ពុជា បានបង្ហាញលទ្ធផល វិជ្ជមានវីរុសកូវីដ-១៩។
បច្ចុប្បន្ន អ្នកជំងឺទាំង១៥នាក់នេះ ត្រូវបានដាក់ឲ្យសម្រាកព្យាបាលនៅមណ្ឌលសុខភាពចាក់អង្រែ រាជធានីភ្នំពេញ។
សូមបងប្អូនទាំងអស់ត្រូវប្រុងប្រយ័ត្នថែមទៀត ជាពិសេសត្រូវរក្សាគម្លាត និង ធ្វើអនាម័យអោយបានត្រឹមត្រូវ ៕
