រថយន្តធំសណ្តោងរ៉ឺម៉ក ដាច់ក្បាលវេចង្កូត ទៅបុករថយន្តមួយទៀត បណ្តលឲ្យរងរបួសមនុស្សប្រុសស្រី២នាក់
ពោធិ៍សាត់៖ នៅថ្ងៃទី១៣ ខែកក្កដា ឆ្នាំ២០២០ វេលាម៉ោង ៨និង២០ នាទី មានករណីគ្រោះថ្នាក់ចរាចរណ៍បង្កឡើងដោយរថយន្តធំម៉ាកDEWO សណ្តោងរ៉ឺម៉កដាច់ក្បាលវេចង្កូតទៅបុករថយន្តមួយទៀតម៉ាកសាំងយ៉ុងបណ្តលឲ្យរងរបួសស្រាល មនុស្សប្រុសស្រី២នាក់និងខូចខាតរថយន្តទាំងសងខាង នៅលើផ្លូវជាតិលេខ៥ ចន្លោះបង្គោលគីឡូម៉ែត្រលេខ១៤០-១៤១ ស្ថិតនៅភូមិខ្សាច់ល្អិត ឃុំអន្សាចំបក់ ស្រុកក្រគរ ខេត្តពោធិ៍សាត់។ ក្រោយពេលកើតហេតុ ជនរងគ្រោះទាំងពីរនាក់ត្រូវបានគេបញ្ជូន ទៅព្យាបាលនៅមណ្ឌលសុខភាពអន្សាចំបក់។
តាមរបាយការណ៍របស់អធិការដ្ឋាននគរបាលស្រុកក្រគរបានឲ្យដឹងថា រថយន្តបង្កម៉ាក DEWO ពាក់ផ្លាកលេខ ភ្នំពេញ៣F.២៤៨០ពណ៌ទឹកប្រាក់ ធ្វើចរាចរណ៍ពីកើតទៅលិច បើកបរដោយឈ្មោះ វង់ រក្សា អាយុ ៣៩ ឆ្នាំភេទប្រុស ជនជាតិខ្មែរ រស់នៅភូមិអូររំដួល ឃុំព្រះប្រឡាយ ស្រុកត្រពាំងប្រាសាទ ខេត្តឧត្តរមានជ័យ។ លុះមកដល់ចំណុចកើតហេតុខាងលើបាន ដាច់ក្បាលវេចង្កូតទៅបុករថយន្តមួយទៀតម៉ាក Sang Yong ពាក់ផ្លាកលេខភ្នំពេញ ២I.៧៣៤៧ ពណ៌ស ធ្វើចរាចរណ៍បញ្រ្ចាសទិសគ្នា
បើកបរដោយឈ្មោះ អ៊ុក រុន អាយុ ៣២ឆ្នាំ ភេទប្រុស ជនជាតិខ្មែរ រស់នៅ ភូមិព្រៃខ្លុង ឃុំរកាត ស្រុកភ្នំក្រវាញ រងរបួសស្រាល និងអ្នករួមដំណើរឈ្មោះ ផល មាន អាយុ ១៧ ឆ្នាំភេទស្រី ជនជាតិខ្មែរ រស់នៅភូមិឃុំជាមួយគ្នា រងរបួសស្រាល។
បច្ចុប្បន្នរថយន្តទាំង២គ្រឿងត្រូវបានយកមករក្សាទុកនៅប៉ុស្តិ៍នគរបាលរដ្ឋបាលអន្សាចំបក់ជាបណ្ដាះអាសន្នដើម្បីចាត់ការបន្តតាមនីតិវិធី៕