ឥណ្ឌាឆ្លងវីរុសកូរ៉ូណាជាង ១លាននាក់
ករណីឆ្លងវីរុសកូរ៉ូណានៅក្នុងប្រទេសឥណ្ឌាបានកើនលើស ១លានករណី នៅថ្ងៃសុក្រនេះ។ នេះបើតាមទិន្នន័យផ្លូវការ ខណៈដែលអាជ្ញាធរកំពុងតែតស៊ូពិនិត្យមើលការរាត្បាតរបស់វីរុសមរណៈនេះនៅក្នុងប្រទេស។
បច្ចុប្បន្ន អាមេរិច និងប្រេស៊ីល ជាប្រទេសដែលមានអ្នកឆ្លងច្រើនជាងគេបំផុត។
ទិន្នន័យរបស់ក្រសួងសុខាភិបាលឥណ្ឌាបានឲ្យដឹងថា មានការឆ្លងចំនួន ១.០០៣.៨៣២ករណីនៅក្នុងប្រទេសឥណ្ឌា និងមានអ្នកស្លាប់សរុប ២៥៦០២នាក់។
មនុស្សជាង ៦០០នាក់ស្លាប់ជារៀងរាល់ថ្ងៃ ដោយសារវីរុសកូរ៉ូណានៅក្នុងប្រទេសឥណ្ឌា ដែលមានប្រជាជនជាង ១,៣ពាន់លាននាក់។
រដ្ឋាភិបាលបានធ្វើការបិទប្រទេសសារជាថ្មី ដោយសង្ឃឹមថានឹងអាចគ្រប់គ្រងការរាតត្បាតបាន បន្ទាប់ពីមានការបន្ធូរបន្ថយការរឹតបន្តឹងក្នុងរយៈពេលប៉ុន្មានសប្តាហ៍ថ្មីៗនេះ។
សូមបញ្ជាក់ថា វីរុសកូរ៉ូណា បានផ្ទុះដំបូងចេញពីទីក្រុងវូហាន ប្រទេសចិន កាលពីចុងឆ្នាំ ២០១៩ ហើយវីរុសមរណៈនេះបានរាតត្បាតយ៉ាងលឿនជុំវិញពិភពលោក។ បច្ចុប្បន្ន វីរុសនេះបានឆ្លងទៅកាន់មនុស្សជាង ១៣,៧លាននាក់ និងផ្តាច់ជីវិតមនុស្សជាង ៥៨៦.០០០នាក់ទូទាំងពិភពលោក៕
