ក្នុងឆមាសទី១ ឆ្នាំ២០២០ អ្នកប្រើទូរស័ព្ទអចល័ត និងអ៊ីនធឺណេតអចល័តមានការកើនឡើង ខណៈអ្នកប្រើទូរស័ព្ទ និងអ៊ីនធឺណេតចល័ត មានការធ្លាក់ចុះ
ភ្នំពេញ ៖ ឯកឧត្ដម អឹម វុត្ថា អ្នកនាំពាក្យក្រសួងប្រៃសណីយ៍ និងទូរគមនាគមន៍បានគូសបញ្ជាក់ថា ក្នុងឆមាសទី១ ឆ្នាំ២០២០នេះ ការប្រើប្រាស់ទូរស័ព្ទអចល័ត និងអ៊ីនធឺណេតអចល័តមានការកើនឡើង ខណៈពេលដែលការប្រើប្រាស់ទូរស័ព្ទចល័ត និងអ៊ីនធឺណេតចល័ត មានការធ្លាក់ចុះ។
ថ្លែងប្រាប់ទីភ្នាក់ងារសារព័ត៌មានកម្ពុជា AKP នាថ្ងៃទី២០ ខែកក្កដា ឆ្នាំ២០២០នេះ ឯកឧត្ដម អឹម វុត្ថា បានលើកឡើងថា ចំពោះការប្រើប្រាស់ទូរស័ព្ទអចល័ត និងអ៊ីនធឺណេតអចល័តដែលមានការកើនឡើងនេះ ដោយសារតែការចុះបញ្ជីសហគ្រាសធុនតូច និងមធ្យមមានការកើនឡើង ហើយពួកគាត់ត្រូវការប្រើទូរស័ព្ទ និងអ៊ីនធឺណេតនេះជាប្រចាំ និងចាត់ទុកថាមានគុណភាពសម្រាប់ដំណើរការអាជីវកម្មរបស់គាត់។ ឯកឧត្ដមបាន ពន្យល់ថា កត្ដាកើនឡើងនៃការប្រើប្រាស់ទូរស័ព្ទអចល័ត និងអ៊ីនធឺណេតអចល័តនេះ ដោយសារតែក្នុងអំឡុងស្ថានភាពកូវីដ-១៩ បានធ្វើឱ្យសិស្សានុសិស្សមិនបានទៅសិក្សានៅសាលារៀន ហើយងាកមកសិក្សាតាមប្រព័ន្ធអនឡាញនៅផ្ទះវិញ និងមនុស្សមួយចំនួនក៏ត្រូវការធ្វើការតាមអនឡាញនៅផ្ទះដែរ។ ឯកឧត្ដមបានបន្ដថា កំណើននៃការធ្វើអាជីវកម្ម តាមអនឡាញក្នុងអំឡុងពេលបច្ចុប្បន្នក៏មានការកើនឡើង ដែលត្រូវការអ៊ីនធឺណេតអចល័តនេះខ្លាំងសម្រាប់ផ្ដល់គុណភាពល្អដល់ពួកគាត់ក្នុងការឡាយផ្ទាល់លក់ផលិតផល ឬក៏ផ្ដល់រូបភាពបានល្អជាងការប្រើប្រាស់អ៊ីនធឺណេតចល័ត។ ទន្ទឹមនេះ អ៊ីនធឺណេតអចល័តនេះ ភាគច្រើនប្រើប្រាស់ខ្សែកាបអុបទិច ដែលមានល្បឿនលឿន និងសេវាល្អធ្វើឱ្យបងប្អូនប្រជាពលរដ្ឋ អាជីវករ ពាណិជ្ជករ ឬអ្នកប្រកបអាជីវកម្មផ្សេងៗត្រូវការសេវានេះសំខាន់ដែលអាចចែករំលែក wifi ប្រើប្រាស់ដល់សមាជិកនៅក្នុងកន្លែងជាមួយគ្នាបានទាំងអស់គ្នា។
តែទោះបីយ៉ាងណាក្ដី ឯកឧត្ដម អឹម វុត្ថា អ្នកនាំពាក្យក្រសួងប្រៃសណីយ៍ និងទូរគមនាគមន៍បានកត់សម្គាល់ឃើញថា ចំពោះទូរស័ព្ទចល័ត និងអ៊ីនធឺណេតចល័ត មានការធ្លាក់ចុះក្នុងអំឡុងពេលដើមឆ្នាំ២០២០នេះ ដោយសារតែកត្ដាទីផ្សារ និងអ្នកប្រើប្រាស់ឆ្អែត ហើយស៊ីមកាតដែលក្រុមហ៊ុនទូរស័ព្ទបានចែកចាយផ្ដល់ឱ្យអ្នកប្រើប្រាស់គឺមានចំនួនលើសពីចំនួនប្រជាជនសរុបនៅទូទាំងប្រទេសជាង១៦លាននាក់។ ឯកឧត្ដមបានបន្ដទៀតថា កត្ដាមួយទៀត ការធ្លាក់ចុះការប្រើប្រាស់ទូរស័ព្ទចល័ត និងអ៊ីនធឺណេតចល័តនេះ ដោយសារក្នុងសម័យកូវីដ-១៩នេះ ភ្ញៀវទេសចរដែលមកកម្សាន្ដនៅក្នុងប្រទេសកម្ពុជា មានការធ្លាក់ចុះច្រើន ហើយភ្ញៀវដែលមកទស្សនកិច្ច មកប្រជុំ និងភ្ញៀវទេសចរមកកម្សាន្ដនៅក្នុងប្រទេសកម្ពុជាយើងគឺមានការប្រែប្រួលទៅតាមស្ថានភាពនេះដែរ។
យោងតាមរបាយការណ៍របស់ក្រសួងប្រៃសណីយ៍ និងទូរគមនាគមន៍បានឱ្យដឹងថា ស្ថិតិសេវាទូរគមនាគមន៍ (គិតត្រឹមចុងខែឧសភា ឆ្នាំ២០២០) ក្នុងឆមាសទី១ ឆ្នាំ២០២០នេះ អ្នកជួលជាវសេវាទូរស័ព្ទចល័ត (ប្រតិបត្តិករចំនួន៦) សរុប ២០,៤៨១,០៥៤នាក់ (ឬស៊ីមកាត) ត្រូវនឹង ១២៤.០៩ភាគរយ នៃចំនួនប្រជាជនសរុប ថយចុះ -០.០៨ភាគរយ បើធៀបនឹង ៥ខែ ឆមាសទី១ ឆ្នាំ២០១៩។ អ្នកជួលជាវសេវាទូរស័ព្ទអចល័ត មានខ្សែនិងគ្មានខ្សែ (ប្រតិបត្តិករចំនួន ៦) សរុប ៥២,៤៨០ នាក់ ត្រូវនឹង ០.៣២ភាគរយ នៃចំនួនប្រជាជនសរុប ថយចុះ -២១.៦២ភាគរយ បើធៀបនឹង ៥ខែ ឆមាសទី១ ឆ្នាំ២០១៩។ អ្នកជួលជាវសេវាអ៊ីនធឺណេតចល័ត (ប្រតិបត្តិករចំនួន ៧) សរុប ១៤,៨៦៣,៤៣៥ នាក់ (ឬស៊ីមកាត) ត្រូវនឹង ៩០.០៥ភាគរយ នៃចំនួនប្រជាជនសរុប ថយចុះ -២.៣៦ភាគរយ បើធៀបនឹង ៥ខែ ឆមាសទី១ ឆ្នាំ២០១៩។ ចំពោះអ្នកជួលជាវសេវាអ៊ីនធឺណេតអចល័ត (ប្រតិបត្តិករចំនួន ៣៧) សរុប ២៤៩,១៣២នាក់ ត្រូវនឹងចំនួន ១.៥១ភាគរយ នៃចំនួនប្រជាជនសរុបកើនឡើង៣៣.០៧ភាគរយ បើធៀបនឹង៥ខែ ឆមាសទី១ ឆ្នាំ២០១៩។ ដោយឡែកចំនួនអ្នកប្រើប្រាស់គណនីហ្វេសបុកនៅកម្ពុជាមានចំនួនសរុប១០.៩៥០.០០០ គណនី។ ជាមួយគ្នានេះ សម្រាប់ការគ្របដណ្តប់សេវាតាមបច្ចេកវិទ្យា គិតត្រឹមត្រីមាសទី១ ឆ្នាំ២០២០នេះ រួមមាន បច្ចេកវិទ្យា 2G មាន ៩៩.២ភាគរយ នៃចំនួនប្រជាជនសរុប និងមានតំបន់គ្របដណ្តប់សេវា ៨៥.៧ភាគរយ នៃផ្ទៃប្រទេសកម្ពុជា។ បច្ចេកវិទ្យា 3G មាន ៨៥.១ភាគរយ នៃចំនួនប្រជាជនសរុប និងមានតំបន់គ្របដណ្តប់សេវា ៦០ភាគរយ នៃផ្ទៃប្រទេសកម្ពុជា។ បច្ចេកវិទ្យា 4G-LTE មាន ៨០.៣ភាគរយ នៃចំនួនប្រជាជនសរុប និងមានតំបន់គ្របដណ្តប់សេវា ៥២.៧ភាគរយ នៃផ្ទៃប្រទេសកម្ពុជា។ សម្រាប់បណ្តាញខ្សែកាប្លិ៍អុបទិកក្នុងប្រទេស (ប្រតិបត្តិករចំនួន ៣ មានសហគ្រាសរដ្ឋ ១ គឺទូរគមនាគមន៍កម្ពុជា) សរុបប្រវែង ៤៤,២៥១.៦គីឡូម៉ែត្រ ៕
