ឯកអគ្គរដ្ឋទូតចិន សន្យាថា នឹងគាំទ្រពេញលេញដល់ការអនុវត្ត គោលនយោបាយកំណែទម្រង់រដ្ឋបាលសាធារណៈរបស់កម្ពុជា
ភ្នំពេញ ៖ ឯកឧត្តម វ៉ាង វិនធាន ឯកអគ្គរដ្ឋទូតសាធារណរដ្ឋប្រជាមានិតចិនប្រចាំកម្ពុជា បានសន្យា ថានឹងគាំទ្រពេញលេញដល់ការអនុវត្តគោលនយោបាយកំណែទម្រង់រដ្ឋបាលសាធារណៈរបស់កម្ពុជា ដើម្បីរួមចំណែកពង្រឹង និងលើកកម្ពស់ទំនាក់ទំនងកិច្ចសហប្រតិបត្តិការជិតស្និទ្ធ ប្រកបដោយប្រសិទ្ធភាព និងផ្តល់ប្រយោជន៍ទៅវិញទៅមកសម្រាប់រដ្ឋាភិបាលនិងប្រជាជននៃប្រទេសទាំងពីរ កម្ពុជា-ចិន។ ការលើកឡើងរបស់ឯកឧត្ដម ឯកអគ្គរដ្ឋទូតនេះ ក្នុងឱកាសជួបសម្ដែងការគួរសម និងពិភាក្សាការងារជាមួយ ឯកឧត្តម ព្រុំ សុខា រដ្ឋមន្ត្រីក្រសួងមុខងារសាធារណៈ នាព្រឹកថ្ងៃទី២៩ ខែកក្កដា ឆ្នាំ២០២០។ នេះបើយោងតាមក្រសួងមុខងារសាធារណៈ។
ឯកឧត្តម វ៉ាង វិនធាន ឯកអគ្គរដ្ឋទូតសាធារណរដ្ឋប្រជាមានិតចិនប្រចាំកម្ពុជា បានវាយតម្លៃខ្ពស់អំពីការរីកចម្រើនយ៉ាងរឹងមាំនៃកិច្ចសហប្រតិបត្តិការភាពជាដៃគូយុទ្ធសាស្ត្រគ្រប់ជ្រុងជ្រោយរវាងរដ្ឋាភិបាលប្រទេសទាំងពីរ កម្ពុជា-ចិន។ ឯកឧត្ដមឯកអគ្គរដ្ឋទូតបានលើកឡើងថា មកដល់បច្ចុប្បន្ននេះ ទោះបីត្រូវប្រឈមនឹងវិបត្តិសកលនៃជំងឺកូវីដ-១៩ ចំណងមិត្តភាពដែកថែបរវាងប្រទេសទាំងពីរ កាន់តែត្រូវបានពង្រឹងនិងលើកកម្ពស់បន្ថែមទៀត សំដៅសម្រេចគោលដៅកសាងឱ្យបានសហគមន៍ជោគវាសនារួម។
ឯកឧត្តម ព្រំ សុខា រដ្ឋមន្ត្រីក្រសួងមុខងារសាធារណៈបានសម្តែងនូវការឯកភាពទាំងស្រុងលើការវាយតម្លៃរបស់ភាគីចិនចំពោះសន្ទុះដ៏ខ្លាំងក្លានៃទំនាក់ទំនងសហប្រតិបត្តិការរវាងរដ្ឋាភិបាលនៃប្រទេសទាំងពីរ ពិសេសលើវិស័យនយោបាយ សេដ្ឋកិច្ច សន្តិសុខ វប្បធម៌ និងការទូត ដែលបានឈានដល់កម្រិតមួយថ្មីទៀត។ ជាមួយគ្នានេះ កិច្ចព្រមព្រៀងពាណិជ្ជកម្មសេរីរវាងប្រទេសទាំងពីរនឹងត្រូវបានចុះហត្ថលេខាក្នុងពេលដ៏ខ្លីខាងមុខនេះ។
ឯកឧត្ដមរដ្ឋមន្រ្ដីបានឯកភាពលើសារៈសំខាន់នៃកិច្ចសហប្រតិបត្តិការលើវិស័យមុខងារសាធារណៈរវាងប្រទេសទាំងពីរកម្ពុជា-ចិន ពិសេសលើការកសាងអភិវឌ្ឍន៍ សមត្ថភាព ធនធានមនុស្សដែលជាមន្ត្រីរាជការបម្រើការងាររដ្ឋបាលសាធារណៈ៕
