វិហារឥស្លាម Al-Aqsa ក្នុងទីក្រុងហ្សេរុយសាឡឹមជាកន្លែងថ្វាយបង្គុំទី៣ ដែលនឹងត្រូវបិទ ដោយសារករណីឆ្លងកូវីដ១៩
អាជ្ញាធរដែលគ្រប់គ្រងទីសក្ការៈមូស្លីមរបស់ទីក្រុងបានប្រកាសថា ទីសក្ការៈបូជា Al-Aqsa នៅក្រុងហ្សេរុយសាឡឹមដែលជាកន្លែងសក្ការៈបូជាទី៣ របស់ឥស្លាម នឹងត្រូវបិទពីថ្ងៃសុក្រ បន្ទាប់ពីមានករណីឆ្លងវីរុសកូវីដ១៩ ។ នេះបេីតាមការចេញផ្សាយដោយសារព័ត៌មាន Al Arabiya នៅថ្ងៃទី១៦ ខែកញ្ញា ឆ្នាំ២០២០ ។
ជាមួយនឹងករណីជំងឺកូវីដ១៩ កំពុងតែកើនឡើងនៅក្នុងប្រទេសអ៊ីស្រាអែល និងទឹកដីប៉ាឡេស្ទីន អាជ្ញាធរវ៉ាកហ្វបានបើកកិច្ចប្រជុំបន្ទាន់មួយជាមួយមន្រ្តីសុខាភិបាល។ សមាជិក Waqf បានសម្រេចចិត្តបញ្ឈប់ការចូលគោរពបូជាដែលចាប់ផ្តើមពីរសៀលថ្ងៃសុក្រ ទី១៨ ខែកញ្ញា តទៅ សម្រាប់រយៈពេល ៣សប្តាហ៍ ។
សមាជិកសមាគម Waqf លោក Hatem Abdel Qader បានប្រាប់ AFP ថា “យើងសង្ឃឹមថាពលរដ្ឋនឹងយល់ពីនីតិវិធីនេះ ដើម្បីការពារសុខភាពនិងសុខុមាលភាពរបស់ពួកគេ” ៕
