ប្រភពព័ត៌មានទាន់ហេតុការណ៍ក្រុងភ្នំពេញ

ចិន ចោទសហរដ្ឋអាមេរិកថា កំពុងបំផ្លាញស្ថិរភាពក្នុងតំបន់ច្រកសមុទ្រតៃវ៉ាន់

9

អ្នកនាំពាក្យនៃទីបញ្ជាការយោធាភាគខាងកើតប្រទេសចិន លោក ចាង ឈុនហ៊ុយ (Zhang Chunhui) បានគូសបញ្ជាក់នៅក្នុងសេចក្តីថ្លែងការណ៍មួយថា យោធាចិនបាន តាមដាន និងឃ្លាំមើលនាវាពិឃាតអាមេរិក USS Barry មួយគ្រឿង ខណៈនាវានេះបានឆ្លងកាត់ច្រកឆ្លងសមុទ្រតៃវ៉ាន់ កាលពីថ្ងៃពុធម្សិលមិញនេះ។ រដ្ឋាភិបាលអាមេរិក នាពេលថ្មីៗនេះ ក៏បានបង្កើនការគាំទ្រដល់កោះតៃវ៉ាន់នេះផងដែរ ដោយសេតវិមានកំពុងតែជំរុញ ការឆ្ពោះទៅរកការលក់អាវុធទំនើបៗឱ្យកោះតៃវ៉ាន់ ក្នុងនោះរួមមានទាំង យន្តហោះគ្មានមនុស្សបើកប្រភេទ MQ-9 និងប្រព័ន្ធការពារមីស៊ីលនៅតាមឆ្នេរសមុទ្រ ដើម្បីគាំទ្រនូវអ្វីដែលខ្លួនចាត់ទុកថា តៃវ៉ាន់ជាទីតាំងប្រជាធិបតេយ្យដ៏សំខាន់មួយ។

ទីក្រុងប៉េកាំង បានចោទប្រកាន់ទីក្រុងវ៉ាស៊ីនតោន និងតៃប៉ិពី ការគប់គិតគ្នា ដើម្បីឆ្ពោះការប្រកាសឯករាជ្យជាផ្លូវការ និងបានបង្កើនសកម្មភាពកងទ័ពអាកាសនៅក្បែរ កោះតៃវ៉ាន់ក្នុងគោលបំណងចង់កំញើញ និងបង្ហាញសាច់ដុំ។ លោក ចាង ក៏បានព្រមានឱ្យសហរដ្ឋអាមេរិកបញ្ឈប់ពាក្យសម្ដី និងសកម្មភាពបង្កហេតុរបស់ខ្លួននៅក្នុងតំបន់ ច្រកសមុទ្រតៃវ៉ាន់ទៅ ដោយបន្ថែមថា យោធាចិននឹងការពារយ៉ាងរឹងមាំនូវបូរណភាពទឹកដីរបស់ប្រទេស និងរក្សាសន្តិភាព ក៏ដូចជាស្ថិរភាពនៅក្នុងតំបន់ ច្រកសមុទ្រតៃវ៉ាន់នោះ។

គួរជម្រាបថា ក្រសួងការពារជាតិតៃវ៉ាន់ បានគូសបញ្ជាក់នៅក្នុងសេចក្តីថ្លែងការណ៍ដាច់ដោយឡែកមួយថា នាវាចម្បាំង USS Barry បានធ្វើដំណើរតាមទិសដៅភាគខាងជើង ឆ្លងកាត់ច្រកសមុទ្រតៃវ៉ាន់ ហើយកងកម្លាំងរបស់ខ្លួនក៏បានតាមដាននាវាចម្បាំងនោះផងដែរ ដែលធ្វើដំណើរជាទម្លាប់ធម្មតា៕

អត្ថបទដែលជាប់ទាក់ទង