នគរបាលព្រហ្មទណ្ឌ នាំខ្លួនជនត្រូវចោទម្នាក់តាមដីកាតុលាការ ពីបទ ឆបោក
ភ្នំពេញ ៖ នៅថ្ងៃទី២៨ ខែតុលា ឆ្នាំ២០២០ វេលាម៉ោង១១ និង ០០ នាទី ការិយាល័យនគរបាលព្រហ្មទណ្ឌកម្រិតធ្ងន់ នៃស្នងការដ្ឋាននគរបាលរាជធានីភ្នំពេញ បានចុះអនុវត្តដីកាបញ្ជាឲ្យនាំខ្លួន លេខ ១៣៩០ ក១ ដ.ច.ន ចុះថ្ងៃទី២០ ខែតុលា ឆ្នាំ២០២០ របស់លោក ហុក ពៅ ចៅក្រមស៊ើបសួរ សាលាដំបូងរាជធានីភ្នំពេញ ។
សមត្ថកិច្ចបាននាំខ្លួនជនត្រូវចោទឈ្មោះ សុខ កៅ ភេទប្រុស អាយុ៥២ឆ្នាំ ជនជាតិខ្មែរ មុខរបរ បុគ្គលិកក្រុមហ៊ុនចិន ចោទប្រកាន់ពីបទ ឆបោក ប្រព្រឹត្តនៅរាជធានីភ្នំពេញ កាលពីអំឡុងខែមករា ឆ្នាំ២០១៧ ត្រូវបានចាប់ខ្លួននៅចំណុចមុខផ្សារសូរិយា សង្កាត់ផ្សារថ្មី២ ខណ្ឌដូនពេញ រាជធានីភ្នំពេញ ។
បច្ចុប្បន្ន កម្លាំងនគរបាលព្រហ្មទណ្ឌបានកសាងសំណុំរឿងបញ្ជូនទៅស្ថាប័នអយ្យការអមសាលាដំបូងរាជធានីភ្នំពេញ ដើម្បីអនុវត្តបន្តតាមនីតិវិធី ៕
