ភ្លើងឆេះព្រៃដែលកំពុងឆាបឆេះយ៉ាងឆាប់រហ័ស បានបង្ខំឲ្យជម្លៀសប្រជាជនជាង ១សែននាក់ និងរងរបួសធ្ងន់ ២នាក់នៅភាគខាងត្បូងរដ្ឋ California
បរទេស៖ភ្លើងឆេះព្រៃដែលកំពុងឆាបឆេះយ៉ាងឆាប់រហ័ស បានបង្ខំឲ្យជម្លៀសប្រជាជនជាង ១សែននាក់ និងរងរបួសធ្ងន់ ២នាក់នៅភាគខាងត្បូងរដ្ឋ California កាលពីថ្ងៃច័ន្ទ ខណៈដែលខ្យល់បក់ខ្លាំងនៅទូទាំងរដ្ឋ បានជំរុញឲ្យមានការកាត់ផ្តាច់ថាមពលអគ្គិសនីរាប់ម៉ឺនខ្នង ដើម្បីការពារឧបករណ៍ប្រើប្រាស់កុំឲ្យភ្លើងឆេះថ្មីបន្ថែមទៀត។ ភ្លើងដែលមានផ្សែងខ្មៅទ្រោលឡើង មានទំហំរហូតដល់ទៅជាង ២៩គីឡូម៉ែត្រក្រឡា បន្ទាប់ពីបានឆាបឆេះកាលពីព្រឹកព្រលឹមនៅតំបន់ Orange County ភាគខាងត្បូងទីក្រុង Los Angeles។ កម្លាំងខ្យល់បោកបក់បានធ្វើឲ្យអណ្ដាតភ្លើងឆេះ កាន់តែខ្លាំងនៅតាមជួរភ្នំ Silverado Canyon និងក្បែរផ្ទះប្រជាពលរដ្ឋជាច្រើនខ្នងនៅទីក្រុង Irvine ជាទីដែលមានប្រជាពលរដ្ឋរស់នៅប្រហែល ២៨ម៉ឺននាក់។ ហើយអណ្ដាតភ្លើងពុំទាន់អាចគ្រប់គ្រងបាននៅឡើយទេ។
