ប្រាក់ចំណូលពីការនាំចេញអង្កររបស់កម្ពុជា ក្នុងរយៈពេល១០ខែ ឆ្នាំ២០២០ ឈានដល់ ៣៦៦លានដុល្លារ សហរដ្ឋអាមេរិក
ភ្នំពេញ៖គិតត្រឹមរយៈពេល១០ខែ នៃឆ្នាំ២០២០ ប្រាក់ចំណូលដែលកម្ពុជាទទួលបានពីការនាំចេញអង្ករ ទៅក្រៅប្រទេស មានការកើនឡើងជិត៤៧លានដុល្លារសហរដ្ឋអាមេរិក ដែលកំណើននេះស្មើនឹង១៥% បើប្រៀបធៀបនឹងរយៈពេលដូចគ្នាក្នុងឆ្នាំ២០១៩។
ជារួម ទឹកប្រាក់សរុបដែលកម្ពុជាទទួលបានពីការនាំចេញអង្ករក្នុងរយៈពេល១០ខែ មានចំនួន ៣៦៦.៤៤លានដុល្លារសហរដ្ឋអាមេរិក ហើយការនាំចេញក្នុង១០ខែនេះ ក៏មានការកើនឡើង ជិត២០%ផងដែរ។
សហព័ន្ធស្រូវអង្ករកម្ពុជាបានចេញសេចក្តីជូនដំណឹងថា “គិតត្រឹមរយៈពេល១០ខែនៃឆ្នាំ២០២០ប្រាក់ចំណូលដែលកម្ពុជាទទួល បានពីការនាំចេញអង្ករទៅក្រៅប្រទេសមានការកើនឡើងជិត៤៧លាន ដុល្លារសហរដ្ឋអាមេរិក ដែលកំណើននេះស្មើនឹង១៥% បើប្រៀបធៀប នឹងរយៈពេលដូចគ្នាក្នុងឆ្នាំ២០១៩។ ជារួម ទឹកប្រាក់សរុបដែលកម្ពុជា ទទួលបានពីការនាំចេញអង្ករក្នុងរយៈពេល១០ខែ មានចំនួន ៣៦៦.៤៤ លានដុល្លារសហរដ្ឋអាមេរិក”។
ក្នុងរយៈពេល១០ខែ នៃឆ្នាំ២០២០នេះ បរិមាណអង្ករនាំចេញរបស់ កម្ពុជា មានចំនួន ៥៣៦ ០៣៥ តោន ដែលមានការកើនឡើង ១៧.១១% បើប្រៀបធៀបនឹងរយៈពេល១០ខែដូចគ្នា ឆ្នាំ២០១៩។
ចំពោះទីផ្សារចម្បងនៃការ នាំចេញអង្កររបស់កម្ពុជា គឺទៅកាន់ប្រទេស ចិន និងតំបន់ស្វយ័តរបស់ចិន (ហុងកុង ម៉ាកាវ តៃវ៉ាន់) មានចំណែក ៣៦% បន្ទាប់មកគឺ បណ្តាប្រទេសចំនួន២៧នៅក្នុងទ្វីបអឺរ៉ុបមាន ចំណែក៣២% ហើយទីផ្សារបន្តបន្ទាប់ មានដូចជា បណ្តាប្រទេសជា សមាជិកអាស៊ានចំនួន៦ មានចំណែក១៣% បណ្តាប្រទេសនៅក្នុង ទ្វីបអាហ្វ្រិកចំនួន១០ មានចំណែក៩% បណ្តាប្រទេសនៅក្នុង ទ្វីបអាស៊ីនិងអូសេអានី ជាពិសេសគឺប្រទេសអូស្ត្រាលី និងញូហ្សេឡេន មានចំណែក៦% បណ្តាដែនកោះដែលស្ថិតនៅក្រោមការគ្រប់គ្រង របស់ប្រទេសបារាំង និងអាមេរិក មានចំណែក២% និងចុងក្រោយគឺ បណ្តាប្រទេសនៅក្នុងទ្វីបអាមេរិកខាងជើង និងប្រទេសនៅក្នុងទ្វីបនៃមជ្ឈិមបូព៌ា មានចំណែក ២%៕