ប្រធានាធិបតីលោក Donald Trump ដែលជិតផុតអណត្តិ មិនមានគម្រោងធ្វើជាម្ចាស់ផ្ទះនៃកិច្ចប្រជុំកំពូលG7ទេ
ប្រធានាធិបតីលោក Donald Trump ដែលជិតផុតអណត្តិ មិនមានគម្រោងធ្វើជាម្ចាស់ផ្ទះនៃកិច្ចប្រជុំកំពូលG7ទេ បន្ទាប់ពីបានលុបចោលការប្រជុំមួយកាលពីខែមិថុនា ដោយសារតែការរីករាតត្បាតនៃមេរោគកូវីដ-១៩។
ការទូតមួយ និងប្រភពបួនទៀតដែលជិតស្និទនឹងបញ្ហានេះបាននិយាយថា ប្រធានាធិបតីមកពីគណបក្សសាធារណរដ្ឋ ដែលបានបដិសេធជ័យជំនះរបស់លោក Joe Biden មកពីគណបក្សប្រជាធិបតេយ្យ ក្នុងការបោះឆ្នោតកាលពីថ្ងៃទី ០៣ ខែវិច្ឆិកា មិនទាន់បានធ្វើការសម្រេចចិត្តចុងក្រោយអំពីការរៀបចំកិច្ចប្រជុំនៅឡើយទេ ប៉ុន្ដែជិតអស់ពេលវេលាហើយដើម្បីរៀបចំផែនការ សំរាប់កិច្ចប្រជុំកំពូលនេះមុនពេលដែលលោកត្រូវផ្ទេរអំណាចនៅថ្ងៃទី២០ ខែមករា។
ប្រភពការទូតចំនួន ៣ បាននិយាយថា រដ្ឋបាលរបស់លោក Trump មិនទាន់ផ្សព្វផ្សាយណាមួយពីកាលបរិច្ឆេទ ឬរបៀបវារៈសម្រាប់កិច្ចប្រជុំកំពូលG7ដែលអាចធ្វើឡើងនោះ។
ប្រភពមួយបាននិយាយថា ខណៈពេលដែលកិច្ចប្រជុំតាមប្រព័ន្ធអនឡាញនៅតែអាចធ្វើបាន តែមិនទាន់មានការងាររៀបចំជាសេចក្តីថ្លែងការណ៍រួម ដែលជាការងារត្រូវការពេលវេលាជាច្រើនខែ៕
