បើកម៉ូតូមិនប្រកាន់ស្ដាំ ឡានបើកបុកសន្លប់ធំ នៅស្រុកស្អាង
កណ្ដាល៖សមត្ថកិច្ចប៉ូលិសបានអោយដឹងថា ករណីគ្រោះថ្នាក់ចរាចរណ៍រវាងរថយន្តនិងម៉ូតូ បណ្ដាលឲ្យរបួសធ្ងន់ធ្ងរអ្នកបើកបរម៉ូតូម្នាក់និងខូចខាតម៉ូតូ ០១គ្រឿងផងដែរ។
ករណីនេះកើតឡើងនាថ្ងៃទី២០ ខែវិច្ឆិកា ឆ្នាំ២០២០នេះនៅចំណុចលើផ្លូវជាតិលេខ២១ (ខាងជើងផ្សារស្អាងខាងជើង) ស្ថិតក្នុងភូមិត្រពាំងឈូក ឃុំព្រែកគយ ស្រុកស្អាង ខេត្តកណ្តាល។
សមត្ថកិច្ចបន្តទៀតថា នៅថ្ងៃទីខែឆ្នាំកើតហេតុ ខាងលើនោះមានឈ្មោះប៉ែន ធីណា ភេទប្រុស អាយុ ២៧ឆ្នាំ មានទីលំនៅភូមិជ្រួយស្លែង ឃុំគីរី ស្រុកគីរីវង់ ខេត្តតាកែវ បានបើករថយន្តម៉ាកហ៊ីយ៉ាន់ដាយ ពណ៌ ទឹកប្រាក់ គ្មានពាក់ផ្លាកលេខ បើកបរក្នុងទិសដៅ ពីជើងទៅត្បូង(តាខ្មៅ-ជ្រៃធំ) លុះពេលធ្វើដំណើរមកដល់កន្លែងកើតហេតុ ក៏មានម៉ូតូ ០១គ្រឿង ម៉ាកហុងដា សេ១២៥ ពណ៌ខ្មៅ ពាក់ផ្លាកលេខ កណ្ដាល1AE-5568 បើកបរដោយឈ្មោះ ហេង សំអុល ភេទប្រុស អាយុ៦៥ឆ្នាំ មុខរបរ រត់ម៉ូតូឌុប មានទីលំនៅភូមិត្រពាំងឈូក ឃុំព្រែកគយ ស្រុកស្អាង ខេត្តកណ្ដាល ដដែលកំពុងបើកក្នុងទិសដៅស្របគ្នា (ពីជើងមកត្បូង) បណ្ដាលអោយដួលរងរបួសធ្ងន់ ។ បន្ទាប់ពីបានទទួលពត៌មានសមត្ថកិច្ចយើងបានចុះមកពិនិត្យ និងវាស់វែងកន្លែងកើតហេតុ ហើយបានដកហូតយកវត្ថុតាងទាំងពីរយកមករក្សាទុកនៅអធិការដ្ឋានស្រុកស្អាង ដើម្បីកសាងសំណុំរឿងតាមនីតិវិធីនៃច្បាប់ ។ ចំណែកអ្នករងរបួសត្រូវបានក្រុមគ្រួសារ ដឹកយកទៅព្យាបាលនៅមន្ទីពេទ្យភ្នំពេញ ។
តាមការសន្និដ្ឋានបឋម ករណីនេះបណ្ដាលមកពីអ្នកបើកម៉ូតូបើកមិនប្រកាន់ស្ដាំ ឬគន្លងផ្លូវរបស់ខ្លួន មានការធ្វេសប្រហែស ខ្ជីខ្ជា ខ្វះការប្រុងប្រយ័ត្ន ទើបបណ្ដាលអោយមានគ្រោះថ្នាក់ចរាចរណ៍កើតឡើង ៕