ការប្រកួតកីឡាលើកទម្ងន់ ជើងឯកថ្នាក់ជាតិប្រចាំឆ្នាំ២០២០ ពន្យារដល់ខែមករា ឆ្នាំ២០២១
ភ្នំពេញ៖លោក វ៉ាត់ ចំរើន រដ្ឋលេខាធិការ ក្រសួងទេសចរណ៍ និងជាអគ្គលេខាធិការ គណៈកម្មាធិការជាតិអូឡាំពិកកម្ពុជា និងប្រធានសហព័ន្ធកីឡាលើកទម្ងន់កម្ពុជា នាថ្ងៃទី២៣ខែវិច្ឆិកាឆ្នាំ២០២០ បើកកិច្ចប្រជុំត្រៀមរៀបចំការប្រកួតកីឡាលើកទម្ងន់ ជ្រើសរើសជើងឯកថ្នាក់ជាតិប្រចាំឆ្នាំ២០២០ ដែលនឹងប្រព្រឹត្តនាខែមករា ឆ្នាំ២០២១ នៅសាលតុមូលនៃគណៈកម្មាធិការជាតិអូឡាំពិកកម្ពុជា។
លោកវ៉ាត់ចំរើនបានមានប្រសាសន៍ថា ការប្រកួតជើងឯកថ្នាក់ជាតិប្រចាំឆ្នាំ២០២០ ជាការប្រកួតលើកទី១របស់សហព័ន្ធគ្រោងនឹងធ្វើឡើងថ្ងៃទី៦ និង៧ ខែមករា ឆ្នាំ២០២១ ដើម្បីអរអបសាទរខួបលើកទី៤២ ទិវាជ័យជម្នះ ៧មករា នៅខេត្តកណ្តាល ចំណែកវិញ្ញាសាវិញគណៈកម្មការនឹងកំណត់នៅពេលក្រោយ។
លោកសំសុខយីអគ្គលេខាធិការសហព័ន្ធកីឡាលើកទម្ងន់កម្ពុជា បានប្រាប់ឲ្យដឹងថា ការប្រកួតខាងលើកនេះដើម្បីចម្រាញ់រកកីឡាករ-កីឡាការិនីទម្ងន់កម្ពុជាឆ្នើម ចូលរួមជាក្រុមអត្តពលិកជម្រើសជាតិ២០២១ និងត្រៀមការប្រកួតកីឡា SEA GAMES 2021 នៅប្រទេសវៀតណាម និងការប្រកួតកីឡា SEA GAMES 2023 នៅកម្ពុជា៕