ក្នុងដំណាក់កាលនៃការពិនិត្យបញ្ជីឈ្មោះ និងការចុះឈ្មោះបោះឆ្នោត គ.ជ.ប ទទួលបណ្តឹង១២៨
ភ្នំពេញ ៖ គណៈកម្មាធិការជាតិរៀបចំការបោះឆ្នោតហៅកាត់ថា (គ.ជ.ប) បានបញ្ជាក់ថា បានទទួលបណ្តឹងជាង១០០បណ្តឹង នៅក្នុងដំណាក់កាលការដាក់ការទទួល និងការដោះស្រាយពាក្យបណ្តឹង នៃការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ២០២០។
យោងតាមសេចក្តីប្រកាសព័ត៌មានរបស់ គ.ជ.ប ចេញផ្សាយនៅថ្ងៃទី២៤ ខែវិច្ឆិកា ឆ្នាំ២០២០ បានឲ្យដឹងថា ក្នុងដំណាក់់កាលនៃការដាក់ ការទទួល និងការដោះស្រាយពាក្យបណ្តឹង នៃការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ២០២០ នៅថ្នាក់ក្រុមប្រឹក្សាឃុំ-សង្កាត់ (កបឃ.ស) និងនៅថ្នាក់ គ.ជ.ប មានបណ្តឹងសរុបចំនួន ១២៨ បណ្តឹង។
យោងតាមសេចក្តីប្រកាសព័ត៌មាន ស្តីពីការដាក់ ការទទួល និងការដោះស្រាយ ពាក្យបណ្តឹង ក្នុងដំណាក់កាលនៃការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ២០២០បានបញ្ជាក់ថា ក្នុងចំណោម ១២៨ បណ្តឹង មាន ១ បណ្តឹង បានប្តឹងបន្តទៅក្រុមប្រឹក្សាធម្មនុញ្ញ។
ជារួមពាក្យបណ្តឹងទាំងអស់ត្រូវបានដោះស្រាយដូចខាងក្រោម ៖ នៅថ្ងៃទី១៧ ខែវិច្ឆិកា ឆ្នាំ២០២០ ក្រុមប្រឹក្សាធម្មនុញ្ញ បានបើកសវនាការ ហើយជាលទ្ធផលបានលើកចោលពាក្យបណ្តឹង។ សេចក្តីសម្រេចរបស់ក្រុមប្រឹក្សាធម្មនុញ្ញ គឺជាសេចក្តីសម្រេចស្ថាពរ បិទផ្លូវតវ៉ា។
គ.ជ.ប បានលើកឡើងថា បណ្តឹងទាំង ១២៨ មានបណ្តឹងនៅថ្នាក់ កបឃ.ស សរុបចំនួន ៥៦ បណ្តឹង ជាបណ្តឹងសុំឱ្យផ្តន្ទាទោស។ បណ្តឹងទាំងនោះ មកពីគណបក្សសម្ព័ន្ធ ដើម្បីប្រជាធិបតេយ្យ មានចំនួន ៤៧ បណ្តឹង គណបក្សប្រជាជនកម្ពុជា មានចំនួន ៥ បណ្តឹង និងក្រុមចុះឈ្មោះបោះឆ្នោត មានចំនួន ៤ បណ្តឹង។
លទ្ធផលនៃការដោះស្រាយបណ្តឹង នៅថ្នាក់ឃុំ សង្កាត់ មានដូចខាងក្រោម ៖ ផ្សះផ្សា សះជា (ភាគីនៃបណ្តឹងយល់ព្រមស្រុះស្រួលគ្នា) ចំនួន២២ បណ្តឹង ផ្សះផ្សាមិនសះជា (ភាគីនៃបណ្តឹងមិនព្រមស្រុះស្រួលគ្នា) ចំនួន១០ បណ្តឹង ដើមបណ្តឹងសុំដកពាក្យបណ្តឹងវិញ ចំនួន៤ បណ្តឹង ធ្វើលិខិតជូនដំណឹងបដិសេធពាក្យបណ្តឹង ចំនួន១៩ បណ្តឹង លើកពាក្យបណ្តឹងចោលដោយសារដើមបណ្តឹងមិនចូលរួម ចំនួន១ បណ្តឹង។
ចំពោះនៅថ្នាក់ គ.ជ.ប មានបណ្តឹងសរុបចំនួន ៧៥ បណ្តឹង ក្នុងចំណោមបណ្តឹងទាំង ៧៥ នេះ មាន ៣ បណ្តឹង ជាបណ្តឹងប្តឹងបន្តមកពី កបឃ.ស ជាបណ្តឹងសុំឱ្យមានការផ្តន្ទាទោស។
ប្រភពបានបន្តថា លទ្ធផលនៃការដោះស្រាយបណ្តឹងនៅថ្នាក់ គ.ជ.ប មានដូចខាងក្រោម ៖
ធ្វើលិខិតជូនដំណឹងបដិសេធពាក្យបណ្តឹង ចំនួន៦៨ បណ្តឹង
ធ្វើលិខិតជូនដំណឹងទៅដើមបណ្តឹង និងលិខិតក្រើនរំលឹក ចំនួន៥ បណ្តឹង
ចារបដិសេធ ចំនួន១ បណ្តឹង
សេចក្តីសម្រេចបដិសេធពាក្យបណ្តឹង ចំនួន១ បណ្តឹង ។
គ.ជ.ប បានលើកឡើងថា ពាក្យបណ្តឹងភាគច្រើនពាក់ព័ន្ធទៅនឹង ៖
-ការចេញឯកសារបញ្ជាក់អត្តសញ្ញាណបម្រើឱ្យការចុះឈ្មោះបោះឆ្នោតខុសនីតិវិធី។
ការចេញលិខិតបញ្ជាក់ទីលំនៅរបស់អាជ្ញាធរជូនប្រជាពលរដ្ឋខុសនីតិវិធី។
ការចោទប្រកាន់មន្ត្រីបោះឆ្នោត និង កបឃ.ស ពាក់ព័ន្ធនឹងការហាមឃាត់ក្នុងការថតរូបបុគ្គល និងទិន្នន័យអ្នកចុះឈ្មោះបោះឆ្នោត៕