គណបក្សនយោបាយចំនួន៣ ធ្វើសន្នីសិទសារព័ត៌មាន បង្កើតសម្ព័ន្ធភាពអ្នកប្រជាធិបតេយ្យខ្មែរ
ភ្នំពេញ ៖ គណបក្សនយោបាយចំនួន៣ រួមមាន គណបក្សខ្មែររួបរួមជាតិរបស់លោក ញឹក ប៊ុនឆៃ គណបក្សសំបុកឃ្មុំសង្គមប្រជាធិបតេយ្យរបស់លោក ម៉ម សូណង់ដូ និងគណបក្សខ្មែរតែមួយរបស់ លោក កែម រិទ្ធិសិត បានប្រកាសធ្វើសន្នីសីទកាសែតរួមគ្នា បង្កើតសម្ព័ន្ធភាពអ្នកប្រជាធិបតេយ្យខ្មែរ កាលពីព្រឹកថ្ងៃទី២៥ ខែវិច្ឆិកានេះ នៅសណ្ឋាគារហ៊ីម៉ាវ៉ារី ។
យោងតាមការលើកឡើងរបស់ថ្នាក់ដឹកនាំសម្ព័ន្ធភាព អ្នកប្រជាធិបតេយ្យខ្មែរ បានបញ្ជាក់ថា ការបង្កើតសម្ព័ន្ធនេះ ឡើងក្នុងការបណ្តុះស្មារតីដល់យុវជន យុវនារីខ្មែរឲ្យចេះស្រឡាញ់គ្នា គ្មានវប្បធម៌លាបពណ៌គ្នា ក្នុងសង្គមខ្មែរយើង។ ក្នុងនោះក៏មានការជំរុញឲ្យមានការចុះហត្ថលេខា លើលិខិតទិញលក់ដោយមេឃុំ/ចៅសង្កាត់ ក្នុងទិញលក់អចលនព្រទ្យនិងចលនព្រទ្យនានា។
ថ្នាក់ដឹកនាំសម្ព័ន្ធអ្នកប្រជាធិបតេយ្យខ្មែរ បានបញ្ជាក់ថា គោលនយោបាយនៃការចងសម្ព័ន្ធភាពអ្នកប្រជាធិបតេយ្យខ្មែរក្នុងគោលបំណងបម្រើជាតិ និងប្រជាពលរដ្ឋខ្មែរឲ្យមានការរីកចម្រើនមានជីវភាពធូរធារសុខដុមរមនាប្រកបដោយប្រសិទ្ធិភាពខ្ពស់ និងដោយយល់ឃើញថា បញ្ហាធំៗដែលជាអាយុជីវិតជាតិមិនអាចដោះស្រាយដោយគណបក្សនយោបាយណាមួយផ្តាច់មុខម្នាក់ឯងបានទេ ។ ចំណែកលោកញឹក ប៊ុនឆៃ ប្រធានគណបក្សខ្មែររួបរួមជាតិបានលើកឡើងថា ការដឹកនាំប្រទេសកន្លងមានភាពល្អប្រសើរ ហើយមិនមានភាពល្អប្រសើរតែមិនគ្រប់គ្រាន់សម្រាប់ប្រជាពលរដ្ឋកម្ពុជាបាននោះទេ ៕